“Şəkidə 7 bal və ondan güclü zəlzələ olmayacaq” – Qurban Yetirmişli

“Azərbaycanda sentyabrın 4-də baş vermiş zəlzələ güclü hesab edilir”.

Publika.az xəbər verir ki, bunu jurnalistlərə açıqlamasında Azərbaycan Milli Elmlər Akademiyasının (AMEA) Respublika Seysmoloji Xidmət Mərkəzinin baş direktoru Qurban Yetirmişli sentyabrın 4-də ölkə ərazisində baş vermiş zəlzələni şərh edərkən bildirib. Onun sözlərinə görə, zəlzələ Şəkidən 30 km cənub-qərbdə baş verib:

“Hazırda əməkdaşlarımız dövlət başçısının tapşırığına əsasən tədqiqatları davam etdirirlər. Onlar orda bir sıra profillər üzrə işlər aparır, o cümlədən ocaqda gedən prosesləri müşahidə edirlər.İlin sonuna qədər bu işlər davam edəcək. Çünki ocaqda proses birdən-birə dayanmır. Zəlzələnin fon səviyyəsinə çatması bəzən aylar tələb edir. Ümumiyyətlə, Şəki tektonik zonadır və 1875-ci ildən bu günə qədər bu bölgədə çoxsaylı zəlzələlər olub”.

Yetirmişli deyib ki, prezidentin tapşırığına əsasən orada seysmoloji stansiyalar quraşdırılır.

Q. Yetirmişlinin sözlərinə görə, həmin ərazidə güclü zəlzələlərin olacağı gözlənilmir:

“Həmin ərazidə 7 bal və ondan güclü zəlzələ olmayacaq, tarixən orada baş verən zəlzələlər bizə bunu deməyə imkan verir. Lakin xırda avtoşoklar, 5 bala qədər zəlzələ gözləmək olar. Bu zəlzələ digər ərazilərdəki ocaqları oyada bilər. Konkret bölgə adı çəkmək istəmirik. Tarixən Şamaxı və İsmayıllı aktiv zona hesab olunur”.

Gülxar