Qırmızı.az

Bakı-Sumqayıt qatarında gediş haqqı havayı olacaq - FOTOLAR

12 Sentyabr 2015 19:32

"Yaxın iki gün ərzində Bakı-Sumqayıt marşrutu üzrə qatarlarda gediş havayı olacaq".

Bunu jurnalistlərə "Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov deyib.

Onun sözlərinə görə, Sumqayıta getmək istəyən sərnişinlər Bakıdan saat 08:00 və 20:00-da çıxan iki qatardan istifadə edə biləcəklər: "Sumqayıtdan Bakıya isə qatarlar saat 09:30 və 21:30-da yola düşəcək".

N.Əzməmmədov qeyd edib ki, sentyabrın 15-dən Bakı və Sumqayıt arasında gün ərzində 8 qatar hərəkət edəcək: "Onlardan 3-ü İsveçrənin "Stadler Rail Group" şirkətinin istehsal etdiyi 2 mərtəbəli KISS markalı qatardır, digər 5-i isə əsaslı şəkildə təmir olunan Riqa istehsallı qatardır".

Onun sözlərinə görə, qatarların qrafiki sentyabrın 15-dən pik saatları nəzərə alınmaqla tərtib olunub: "Saat 06:00-dan 12:00-dək və 16:00-dan 21:00-dək yarım saatlıq intervalla qatarlar Bakıdan Sumqayıta və əksinə yola düşəcək. 12:00-16:00 aralığında isə qatarlar bir saatlıq intervalla hərəkət edəcəklər. Qrafik gələcəkdə dəyişdirilə bilər".

Hər bir qatar 4 vaqondan (onlardan biri biznes-sinif) ibarətdir. Bütün vaqonlar pulsuz internetlə və baqaj yükü üçün yerlə təmin olunub. Biznes-sinif vaqonlarda isə sərnişinlərə çay və kofe də (biletin qiymətinə daxildir) təklif olunur.