Su bahalaşmayacaq

““Azərsu” Açıq Səhmdar Cəmiyyəti (ASC) suyun qiymətinin artırılması ilə bağlı Tarif Şurasına rəsmi müraciət etməyib”.

Bunu virtualaz.org saytına açıqlamasında “Azərsu” ASC-nin ictimaiyyətlə əlaqələr departamentinin rəhbəri Anar Cəbrayıllı dedi.

A.Cəbrayıllı bildirdi ki, yaxın günlərdə suyun qiyməti ilə bağlı dəyişiklik gözlənilmir.

Tarif Şurası mətbuat xidmətinin rəhbəri Abbas Əliyev də su və enerjinin qiyməti ilə bağlı Tarif Şurasına müraciət daxil olmadığını deyib: “Bizə nə “Azıərenerji, nə də “Azərsu” ASC tərəfindən qiymət artımı ilə bağlı müraciət daxil olmayıb. Tarif Şurası yaxın günlərdə suyun və enerjinin qiymətlərinə baxmayacaq”.

Qeyd edək ki, ötən il noyabrın sonlarında benzinin qiymətinin artacağı ilə bağlı yayılan məlumatlar Nazirlər Kabineti də daxil olmaqla Tarif Şurası tərəfindən təkzib edilmişdi. Lakin Tarif Şurası dekabrın 2-də qiymət artımına qərar verdi.

İqtisadçı-ekspertlər isə martın birinci yarısınadək su və energi ilə yanaşı ictimai nəqliyyatda, o cümlədən metroda gediş haqlarının artırılacağını proqnozlaşdırırlar.