• USD 1,7430 +0,35% EUR 1,8487 -1,24%
    • GBP 2,1929 -0,21% RUB 0,0275 +0,36%

Azərbaycanda gündəlik qəzetlərin sabahkı buraxılışı “ağ-qara” çıxa bilər

Azərbaycanda gündəlik qəzetlərin sabahkı buraxılışı “ağ-qara” çıxa bilər

Türkiyənin Soma şəhərində yerləşən kömür mədənində baş vermiş faciə ilə bağlı Azərbaycanda fəaliyyət göstərən gündəlik qəzetlərin növbəti buraxılışları (red: 16-20 may tarixləri arası) “ağ-qara” çap oluna bilər.

Publika.az-ın məlumatına görə, bir neçə ictimaiyyət nümayəndəsi və millət vəkilləri Azərbaycanda aparıcı qəzetlərin sabahkı buraxılışının “ağ-qara” formatda çıxmasını təklif edib.

Sözügedən məsələ ilə bağlı Mətbuat Şurasının (MŞ) sədri Əflatun Amaşov isə Publika.az-a açıqlamasında deyib ki, qəzetlərin sabahkı buraxılışlarının “ağ-qara” formatda çap olunması üçün xüsusi məsləhətləşmələrə ehtiyac yoxdur: “Bu, ümumi göstərişlə həyata keçiriləsi məsələ deyil. Bu, məsələ qəzet rəhbərlərinin fərdi istəyi ilə olan məsələdir. Bu məsələni ümumi məsələ kimi gündəmə gətirmək də doğru deyil. Hər bir qəzet öz buraxılışının hansı formatda çıxarılmasında, Türkiyədə baş verən faciəyə münasibətini bildirməkdə və materiallar hazırlamaqda azaddır. Yəqin ki, Azərbaycan mətbuatı da Türkiyədə baş vermiş bu faciə ilə bağlı öz oxucularına sonadək geniş məlumat verəcək. Burada əsas məsələ də məhz budur”.

Ə.Amaşov həmçinin Türkiyə xalqına da başsağlığı verib: “Türkiyədə kömür mədənində baş verən faciə bizi də çox üzüb. Türkiyənin faciəsini biz hər zaman öz faciəmiz hesab etmişik. Biz hər zaman “bir millət, iki dövlət” prinsipini əsas götürmüşük. Türk xalqının və dövlətinin başı sağ olsun!”.

Xatırladaq ki, Türkiyədə kömür mədənində baş vermiş partlayış nəticəsində ölənlərin sayı 274 nəfərə çatıb. Faciə ilə əlaqədar Türkiyədə üçgünlük matəm elan olunub.

Vasif Həsənli

Xəbər lenti

DAHA ÇOX XƏBƏR