• USD 1,7369 0,00% EUR 1,8716 +0,49%
    • GBP 2,1974 -0,10% RUB 0,0274 +0,73%

Ukraynada 3 azərbaycanlı girov götürüldü

Ukraynada 3 azərbaycanlı girov götürüldü

Ukraynanın Luqansk şəhərində silahlılar üç nəfər azərbaycanlını girov götürüblər.

Publika.az-ın məlumatına görə, Luqansk vilayəti üzrə Azərbaycanlılar Konqresinin sədri Rasim Uğurluyev bildirib ki, girov götürülən 23 yaşlı oğlu, vilayət üzrə azərbaycanlı gənclər təşkilatının keçmiş sədri Nahid Uğurluyev artıq azad olunub.

O, qeyd edib ki, Azərbaycan vətəndaşı olan digər iki nəfər – Lənkəran şəhərindən olan Fədail Cəfailov və Göyçay şəhərindən olan Vüsal Bağırov isə hələ də girovluqdadır: “Oğlumu bir müddət əvvəl girov götürərək yaxınlıqdakı meşəyə aparıb, onlarla bir yerdə döyüşməyi tələb ediblər. Oğlum bundan imtina etdikdə isə onu döyüblər, daha sonra isə azad olunmasının qarşılığında pul tələb ediblər. Biz dövlətin dəstəyi ilə onu azad edə bildik".

R. Uğurluyev digər iki Azərbaycan vətəndaşının isə hələ də girovluqda olduqlarını söyləyib: “Onları şəhərin mərkəzində tutublar. Özləri ilə döyüşmək üçün adam yığırmışlar. Azərbaycanlılar dərhal təklifdən imtina edib qaçmaq istəyiblər. Lakin onları yaralayıblar və özləri ilə aparıblar. Hələ də bir xəbər ala bilmirik”.

R. Uğurluyev qeyd edib ki, hadisə barədə Ukrayna xüsusi xidmət orqanları və digər güc strukturları məlumatlandırılıb. Azərbaycanlıların azad olunması üçün əməliyyat tədbirləri görülür.

Azərbaycanın Ukraynadakı səfirliyinin konsulluq məsələləri üzrə I katibi Asim Osmanov açıqlamasında bildirib ki, hadisə barədə Azərbaycan Daxili İşlər Nazirliyinin səfirlikdəki nümayəndəsi təlimatlandırılacaq və səfirlik adından Ukraynanın aidiyyəti orqanlarına müraciət olunacaq: “Eyni zamanda konqres sədri Rasim Uğurluyevin özü ilə də təhlükəsizliyi baxımından sıx əlaqələr yaradılacaq və müvafiq tədbirlər görüləcək. Tutulan şəxslərlə əlaqədar nəticə əldə olunan kimi, rəsmi məlumat veriləcək”.

Xəbər lenti

DAHA ÇOX XƏBƏR