Hovuzda uşaqları hansı təhlükə gözləyir?

Hovuzda və ya dənizdə üzdükdən sonra uşaqlarda yüksək hərarət, ürək bulanması, qusma, qarın ağrısı, sidikdə qan və s problemlər ciddi xəstəlikdən xəbər verir.

Bu əlamətlər müşahidə olunarkən mütləq həkimə müraciət etmək lazımdır. Publika.az-ın Türkiyə mətbuatına istinadən verdiyi xəbərə görə, bu əlamətlər uşaqlarda sidik yolu infeksiyalarının xəbərçisidir.

Problem oğlanlarla müqayisədə qızlarda daha az müşahidə edilir. Bunun üçün də uşağınız dənizdə və ya hovuzda üzdükdən sonra mütləq çimərlik paltarını soyunmalı, duş qəbul etməlidir. Daha sonra quru paltar geyinməlidir. Tərkibi şəkərsiz olan meyvə suları və ya adi su içilməlidir. Əks halda sudan bədənlərinə keçmiş infeksiyaların inkişafı üçün münbit şərait yaratmış olarsınız.

Çünki insanların burunları, dəriləri, sidik yolundakı mikroblar qısa zamanda dəniz və ya hovuz suyuna keçir. Sonradan orada üzənlərin həmin infeksiyaya yoluxma ehtimalı artır. Bundan başqa, dəniz suyu kanalizasiya suları ilə qarışır ki, bu da infeksiya riskini artırır. Dəniz suyu qulaq infeksiyaları, göz iltihabı, dəridə göbələk xəstəliyinə səbəb olur.

Başqalarını bu xəstəliyə yoluxdurmamaq üçün dəniz və ya hovuza girmədən əvvəl duş qəbul etmək məsləhət görülür.

Gülxar