Bakıda ər və hamilə arvadını maşın vurub öldürdü

Bakıda iki piyadanın ölümü ilə nəticələnən dəhşətli yol qəza hadisəsi baş verib.

Babək prospektində yüksək sürətlə hərəkətdə olan "VAZ 2107" markalı avtomobil ər və arvadın üstündən keçib. Onların hər ikisi yerindəcə keçinib. İki nəfərin ölümünə səbəb olan şəxs aradan çıxıb. Hadisə yerinə gələn polis burada ağlayan 4 yaşlı uşaq aşkarlayıb. Sonradan məlum olub ki, uşaq ölən şəxslərin övladıdır və o, qaranlıq küçədə bir müddət tək qalıb. Ölənlərin şəxsiyyəti müəyyənləşdirilib. Onlar Qazax rayonunun Astanbəyli kəndindən Bakıya bir müddət əvvəl tikintidə işləməyə gələn 1987-ci il təvəllüdlü Mustafayev Vüqar Vaqif oğlu və onun həyat yoldaşı 1989-cu il təvəllüdlü Mustafayeva Tünzalə Arif qızıdır. Nizami rayon polisi dərhal hadisə yerindən qaçan şəxsin axtarışına başlayıb və o, öz evində tutulub. Onun avtomobili cərimə meydançasına aparılıb. Gənc ailənin faciəsinə səbəb olan şəxs Xətai rayon sakini, Kaçalov küçəsi ev 16, mənzil 9-da yaşayan 1991-ci il təvəllüdlü Mehrəliyev Elmir Arif oğludur.

O, həmin gün toydan çıxdığını, içkili olduğunu deyib. Piyada keçidinin yaxınlığında maşınla nəyəsə toxunduğunu, amma bunun adam olduğunu anlamadığıı iddia edib. Elmir əgər adam vurduğunu bilsəydi heç vaxt qaçmayacağını bildirib. Sonda o, törətdiyi əməldən peşmançılıq çəkdiyini və bunu heç vaxt özünə bağışlamayacağını etiraf edib. Nizami rayon polis idarəsindən isə bildirilib ki, hadisəni törətdikdən sonra Elmir avtomobilin işıqlarını söndürərək təhlükəsizlik kameralarına düşməmək üçün qaranlıq yollarla aradan çıxıb. Hadisə nəticəsində dünyasını dəyişən Mustafayev Vüqar Vaqif oğlunun dayısı oğlu Rauf polisə qohumunun ölən həyat yoldaşının 7 aylıq hamilə olduğunu deyib.

Bu isə ekspertizanın rəyindən sonra məlum olacaq.