Qırmızı.az

Ağdaşda ağır qəza: 2 ölü, 1 yaralı - FOTOLAR

1 Sentyabr 2014 18:14

Ağdaş rayonu ərazisində 2 nəfərin ölümü, bir nəfərin yaralanması ilə nəticələnən avtomobil qəzası baş verib.

Publika.az-ın məlumatına görə, hadisə Bakı-Şamaxı-Yevlax avtomobil yolunun 256-cı kilometrliyində, Ağdaşın Şıxlı kəndi ərazisində qeydə alınıb.

Ağdaşın Şəmsabad kənd sakini, 1954-cü il təvəllüdlü Akif Səfərəliyevin idarə etdiyi “VAZ 2106” markalı minik maşını qarşı tərəfdən gələn “Mercedes” markalı minik maşını ilə toqquşub. Hadisə nəticəsində “Mercedes” yanaraq yararsız hala düşüb. Hadisə zamanı “VAZ 2106”-nın sürücüsü Akif Səfərəliyev və sərnişini, 1961-ci il təvəllüdlü İlqar Rəhimov hadisə yerində dünyasını dəyişib.

“Mercedes”in sürücüsü müxtəlif dərəcəli yanıq və sınıq xəsarətləri, ağır kəllə-beyin travması ilə ölümcül vəziyyətdə Ağdaş Mərkəzi rayon Xəstəxanasının reanimasiya şöbəsinə yerləşdirilib. Faktla bağlı Baş Dövlət Yol Polisi İdarəsinin İstintaq və Təhqiqat Şöbəsi tərəfindən araşdırma aparılır.

Bəhruz