"Nar Mobile"ın elan etdiyi fotomüsabiqə başa çatdı

"Nar Mobile" mobil operatoru bu il Ramazan bayramı ərəfəsində maraqlı bir müsabiqə keçirmək qərarına gəldi. Gənclərin diqqətini Azərbaycanın zəngin tarix və mədəniyyətinə, xalqımızın milli irsi və adət-ənənələrinə cəlb etmək məqsədi daşıyan fotomüsabiqənin əsas ideyası çağdaş dünyada ailə dəyərlərinin əhəmiyyətini vurğulamaq, ahıl yaşlarının gözəlliyini qabartmaq və nəsillərarası əlaqəni xatırlatmaqdan ibarət idi. Belə ki, müsabiqəyə valideynlərin, baba və nənələrin gündəlik həyatını əks etdirən müəllif fotoşəkilləri təqdim edilirdi.

2014-cü ilin iyul ayı ərzində "Nar Mobile" mobil operatorunun "Facebook", "Twitter" və "Instagram" sosial şəbəkələrindəki rəsmi səhifələrinə göndərilən fotoşəkillər avqust ayında tanınmış simalardan ibarət münsiflər heyəti tərəfindən dəyərləndirildi. Münsiflər heyəti Azərbaycanın xalq yazıçısı Çingiz Abdullayev, teleaparıcı Nərgiz Cəlilova, fotoqraf Sitarə İbrahimova, rəssam İrina Eldarova və "Azerfon" şirkətinin İctimaiyyətlə əlaqələr bölməsinin rəhbəri Nigar Arpadaraidən ibarət idi.

Sentyabr ayının 9-da keçirilən mükafatlandırma mərasimində 1-ci yerin qalibi olan Ruslan Məmmədov "iPhone 5S", 2-ci və 3-cü yerə layiq görülən iştirakçılar isə "Samsung" mini-tablet, Nar-modem və 12 aylıq pulsuz internetlə mükafatlandırıldılar.

Azərbaycanın sürətlə inkişaf edən mobil operatoru "Nar Mobile" 2007-ci ildən etibarən abunəçilərinə xidmət göstərir. Fəaliyyət göstərdiyi illər ərzində "Nar Mobile" daima sərfəli qiymət siyasətinə sadiq qalaraq, müxtəlif tarif planları ilə abunəçilərinə ən sərfəli təkliflərini təqdim edib və onların rəğbətini qazanıb. Münasib danışıq tarifləri ilə yanaşı, mobil operatorun müxtəlifliyi və sərfəliliyi ilə seçilən internet paketləri, eləcə də abunəçilərin hər zona üzrə eyni qiymət ödədiyi sadə rouminq təklifləri xüsusilə qeyd edilməlidir.