“Mətbuat Şurası silsilə tədbirlər keçirəcək”

Umud Rəhimoğlu: “Ölkə başçısının sərəncamı ilə bu sahədəki nöqsanlar aradan qaldırılacaq ”

“Prezident İlham Əliyevin Azərbaycan Silahlı Qüvvələrinin Ermənistan Silahlı Qüvvələri ilə təmas xəttində bəzi təhlükəsizlik tədbirləri haqqında sərəncamı günün tələbi idi”. Teleqraf.com-un xəbərinə görə, bunu Azərbaycan Mətbuat Şurasının sədr müavini Umud Rəhimoğlu bildirib.

Azərbaycan Prezidentinin imzaladığı sərəncamı şərh edən U.Rəhimoğlunun sözlərinə görə, avqust ayında müşahidə olunan xoşagəlməz hal, Azərbaycanın milli informasiya təhlükəsizliyinə zərbə vuran bu vəziyyət həm dövləti, həm də medianın təcrübəli rəhbərlərini ciddi düşünməyə vadar edib: “Təəssüf ki, Azərbaycan mediasının bir qismi bu gözlənilməz sınaqdan çıxa bilmədi. Bir çox hallarda milli təhlükəsizlik və müdafiə mülahizələrinə görə xüsusi əhəmiyyət kəsb edən obyektlərin dislokasiyası, təyinatı, silahlı birləşmələrin strateji, operativ və səfərbərlik üzrə yerləşdirilməsi, hərbi hissələrin təşkilati strukturu, şəxsi heyətinin sayı barədə informasiyalar mediada yer aldı. Halbuki belə informasiyaların yayılması birbaşa düşmən tərəfin dəyirmanına su tökməyə bərabər addım idi. Bəzi media təmsilçilərimiz bu mövzuda xəbər yaymağın həssas məsələ olduğunu, “Dövlət sirri haqqında” qanununa uyğun olaraq dövlət sirri təşkil edən məlumatların yayılmasına görə məsuliyyət daşıdıqlarını sanki unutmuşdular. Nəticə isə məlum olduğu kimi acınacaqlı oldu”.

Sədr müavini bəyan edib ki, Mətbuat Şurası prezidentin imzaladığı sərəncamdan irəli gələrək üzərinə düşən məsuliyyəti anlayır və ən qısa müddətdə hərbi sahədə Azərbaycanın milli təhlükəsizliyinə xələl gətirə bilən məlumatların kütləvi informasiya vasitələrində və internet informasiya ehtiyatlarında, o cümlədən sosial şəbəkələrdə yayılmasının qarşısının alınması məqsədilə silsilə tədbirlər keçirəcək. Xüsusilə də Mətbuat Şurası, kütləvi informasiya vasitələri və əhali arasında təbliğat-izahat işini daha da effektiv və səmərəli şəkildə təşkil etməyə çalışacaq.

U.Rəhimoğlu əmin olduğunu bildirib ki, başda şuranın sədri Əflatun Amaşov olmaqla, şura rəhbərliyi və üzvləri bu vacib işin öhdəsindən layiqincə gələcəklər.

Xatırladaq ki, prezident İlham Əliyev Azərbaycan Silahlı Qüvvələrinin Ermənistan Silahlı Qüvvələri ilə təmas xəttində bəzi təhlükəsizlik tədbirləri haqqında sərəncam imzalayıb. Sərəncamda dövlət sirri təşkil edən məlumatların kütləvi informasiya vasitələrində, sosial şəbəkələrdə yayılmasının qarşısı almaq üçün Nazirlər Kabinetinə və Müdafiə Nazirliyi xüsusi tapşırıqlar, Mətbuat Şurasına isə tövsiyələr yer alıb.