Ər-arvadı şantaj edildi - Gizli video ilə

Bu gün Bakı Ağır Cinayətlər Məhkəməsində ər və arvadı şantaj edən Ələt qəsəbə sakinləri Əkrəm Qayıbovun və İsmayıl İbrahimovun cinayət işi üzrə məhkəmə başlayıb.

Teleqraf.com xəbər verir ki, Qaradağ rayonunun Ələt qəsəbəsinin sakini Ramil Ağayev polisə ərizə ilə müraciət edərək həyat yoldaşı ilə aralarında olan mübahisəni gizli yolla mobil telefona çəkmiş həmyerliləri Əkrəm Qayıbovun və İsmayıl İbrahimovun videonu sosial şəbəkələrdə yayacaqları ilə hədələyib və ondan 500 manat pul tələb etdiklərini bildirib.

Qaradağ rayon Polis İdarəsi əməkdaşlarının keçirdikləri əməliyyat tədbirləri nəticəsində İsmayıl İbrahimov və Əkrəm Qayıbov 500 manat pulu Ramil Ağayevdən alarkən saxlanılıblar. Onlardan videoyazı olan mobil telefon da aşkar edilərək götürülüb. Hər iki təqsirləndirilən şəxs Cinayət Məcəlləsinin 182-ci (hədə-qorxu yolu ilə tələb etmə) maddəsi ilə ittiham edilir.

Hakim Əlisoltan Osmanovun sədrliyi ilə keçirilən prosesdə təqsirləndirilən şəxslər ifadə verib. Onlar elan olunmuş ittiham üzrə özlərini qismən təqsirli biliblər.

Məhkəmə iclası noyabrın 5-də davam etdiriləcək.

Hacı Zeynalov