Qənirə Paşayeva Bartın bələdiyyə başqanından Xocalı Soyqırımının tanınmasını xahiş edib

Q.Paşayeva Bartın bələdiyyə başqanından Xocalı abidəsi və Xocalı Soyqırımının tanınmasını xahiş edib.Bartında səfərdə olan millət vəkili Qənirə Paşayeva Bartın Bələdiyyə başqanı Cemal Akın ilə görüşdə ümummilli lider Heydər Əliyevin dediyi kimi Azərbaycan ilə Türkiyənin bir millət iki dövlət olduğunu, Azərbaycanla Türkiyə arasında əlaqələrin yüksək səviyyədə olmasının məmnuniyyətverici olduğunu deyib.

Qənirə Paşayeva Azərbaycan ilə Türkiyənin müxtəlif bölgələri, bələdiyyələri arasında da əlaqələrin getdikcə daha genişlənməsinin məmnuniyyətverici olduğunu və bu məsələnin vacibliyini qeyd edib. Millət vəkili Bartın Bələdiyyə başqanı Cemal Akın ilə görüşdə Azərbaycan ilə Türkiyənin bir çox şəhərlərinin və bələdiyyələrinin qardaş şəhərlər və bələdiyyələr olduğunu bildirərək, Bartın bələdiyyəsinin Azərbaycan bölgələrindən biri ilə qardaş olaraq görmək istədiklərini bildirib. Azərbaycanın tarixi, mədəniyyəti, Azərbaycan həqiqətləri ilə bağlı, Ermənistanın torpaqlarımızın 20%-ni işğal altında saxlaması, qaçqın və məcburi köçkünlərin uzun illərdir öz doğma yurdlarına dönə bilməməsi, Dağlıq Qarabağ və işğal edilmiş digər Azərbaycan ərazilərində dinc azərbaycanlılara qarşı ermənilər tərəfindən törədilən soyqırımlar, qətliamlar, Xocalı soyqırımı, tarixi abidələrin erməni vandalizminə məruz qalması da söhbət zamanı əsas müzakirə mövzusu olub və millət vəkili bunlarla bağlı Bartın Bələdiyyə başqanı Cemal Akına geniş məlumatlar verib. Millət vəkili Qənirə Paşayeva bələdiyyə başkanından Bartının mərkəzi parklarından birinə Qarabağ adını verilməsi və həmin parkda Xocalı soyqırımı abidəsinin qoyulmasını xahiş edib.

Bartın bələdiyyəsi tərəfindən bu cür addımın atılmasının böyük əhəmiyyətindən,vacibliyindən danışan Qənirə Paşayeva təklif etdiyi məsələlərin öz həllini tapacağına ümid etdiyini də deyib. Azərbaycanı çox sevdiyini deyən Bartın Bələdiyyə başqanı Cemal Akın Türkiyənin və Azərbaycanın bir millət iki dövlət olduğunu vurğulayaraq, iki ölkə arasında iqtisadi, siyasi iş birliyinin daha da genişləndirilməsinin önəmli olduğunu söyləyib və hər iki qardaş ölkənin bölgələri, bələdiyyələri arasında əlaqələrin daha da genişləndirilməsinin vacibliyini qeyd edib. Qarabağ problemi, Xocalı ağrısı bizim də problemimiz və ağrımızdır deyən Bartın Bələdiyyə başqanı Cemal Akın hər zaman qardaş Azərbaycanın yanındayıq deyib. Millət vəkili Qənirə Paşayevanın Bartının mərkəzi parklarından birinə Qarabağ adını verilməsi və həmin parkda Xocalı soyqırımı abidəsinin qoyulması, bələdiyyə tərəfindən Xocakı Soyqırımının tanınması ilə bağlı müraciətinə toxunan Bartın Bələdiyyə başqanı Cemal Akın məsələlərə müsbət yanaşıb və onlara mütləq baxılacağını deyib.

Millət vəkili "Qənirə Paşayeva ilə addım-addım Türk dünyası" seriyasından növbəti kitablarında Bartın ilə də bağlı geniş yazının da öz əksini tapacağını və Azərbaycanlı oxuculara Bartın ilə bağlı daha geniş bilgilər veriləcəyini deyib. Millət vəkili Bartın Bələdiyyə başqanı Cemal Akını Azərbaycana səfərə dəvət edib. Dəvəti məmnuniyyətlə qəbul edən Bartın Bələdiyyə başqanı Cemal Akın Azərbaycanda olmadığını, ölkəmizə səfər etmək istədiyini və bu səfərin Bartın bələdiyyəsi ilə Azərbaycanın bölgələri arasında əlaqələrin daha da inkişafına öz töhfəsini verəcəyinə inandığını deyib. Görüşün sonunda millət vəkili Qənirə Paşayeva Bartın Bələdiyyə başqanı Cemal Akına Azərbaycan həqiqətlərinə, tarixinə, mədəniyyətinə dair kitablar və materiallar, özünün müəllifi olduğu əsərləri də təqdim edib.

Millət vəkili Qənirə Paşayeva rəhbərlik etdiyi Avrasiya Beynəlxalq Araşdırmalar İnstutu İB-nin hazırladığı “Azərbaycan Həqiqətləri” sənədli filmlər kataloqunu və həmmüəllifi olduğu və Türkiyə türkcəsində çapdan çıxmış “Xocalı Soykırımı tanıkların dilinden” kitabını da təqdim edib. Qarabağın Azərbaycan musiqisində oynadığı böyük rol və yerdən danışan millət vəkili Heydər Əliyev Fondunun hazırladığı “Qarabağ xanəndələri” musiqi albomu kataloqunu da təqdim edib. Eyni zamanda tanınmış modelyer Gülnarə Xəlilova tərəfindən hazırlanmış Azərbaycan kişi milli geyimi də hədiyyə olunub.