İntihar edən 3 uşaq anasının son statusu: “Bəsdir, yoruldum” – FOTOLAR

Lökbatan qəsəbəsində intihar edən Zeynəb Muradova özünə qəsd edəcəyi barədə daha əvvəl mətbuata danışmışdı.

Dünən Bakının Qaradağ rayonunun Lökbatan qəsəbəsində 30 yaşlı qadının intihar etməsi hazırda ölkə mətbuatının ən çox müzakirə edilən mövzularından birinə çevrilib.

3 uşaq anasının övladlarını yetim qoyaraq həyatına qəsd etməsinə səbəb olan faktlar araşdırılıb. Ortaya isə bəzi tükürpərdici məqamlar çıxıb.

Külli miqdarda borc

1984-cü il təvəllüdlü Muradova Zeynəb Nəzirağa qızı gözəllik salonunda işləyirmiş.

Onun intiharına səbəb kimi külli miqdarda borcunun olduğu bildirilir. Hətta Z.Muradova borca görə yaşadığı mənzili də sataraq çalışdığı gözəllik salonunda qalırmış.

Z.Muradovanın 3 azyaşlı övladı var və uşaqları hazırda nənəsi ilə yaşayır. M.Zeynəbin həyat yoldaşının isə harada olduğu haqqında heç bir məlumat yoxdur.

Borcu qaytara bilmədiyi üçün “avtoritetlər” onu hədələyib

Məlum oldu ki, Zeynəbin borcla bağlı problemi olduğunu musavat.com saytı ötən ay yazıb.

Zeynəb özü mətbuata müraciət edərək bu barədə ətraflı danışıb. Gənc qadın deyir ki, sələmə götürdüyü pul onun başına böyük oyunlar açıb. Hətta “avtoritetlər” tərəfindən də hədələnib.

Z.Muradova həmin vaxt deyib ki, bir neçə ay bundan öncə, Arzu adlı qadından sələmə 24 min manat pul götürüb. 2 ay sonra pul aldığı Arzu Cabbarova ona borcunun 51 min manat olduğunu deyib. Bundan sonra aralarında razılığa gələrək notariusun təsdiqi ilə sənəd hazırlanıb. Həmin sənədə görə, Z.Muradova 51 min manat borcu noyabr ayına qədər geri verməli idi. Amma həmin vaxtın tamam olmamasına baxmayaraq, Arzu Cabbarova tez-tez onun iş yerinə gələrək ondan pul tələb edib. Hətta hədələyib də:

“Məni tez-tez hədələyir. Təhqiramiz mesajlar yazır. Gəlir dükandakı gəlinlikləri dağıdır. Təranə adlı bir avtoritet qadına mənim nömrəmi verib. O da mənə yazır ki, “Sənin başına oyun açaram. Doğrayıb ataram Bakının ucqar nöqtələrinə. Heç kim izini də tapa bilməz. Uşaqların məktəbə gedir. Onları fikirləş. Onları oğurlayarıq”.

Artıq çox qorxuram. Keçən gün bir neçə nəfərlə gəlmişdilər. Qapını sındırmaq istəyirdilər. Polis çağırmışam. Polislər də biganə yanaşırlar. Mənim həyati təhlükəm var. Məni mühafizə edəcək polis lazımdır”.

Təzyiqlərdən bezən Zeynəb neçə vaxtdır, özünü öldürəcəyini düşünürmüş

O deyir ki, sələmçi qadın onun işlədiyi yerə bir neçə adam göndərib və onlar da Zeynəbin üstünə bıçaq çıxarıblar:

“Mən üç uşaq anasıyam. Ən balacası 3 aylıqdır. Evim yoxdur deyə burada balaca bir otaq düzəltmişəm. İş yerimdə yaşayıram. O pulu ondan götürüb buranı açmışam. Hər gün gəlir, nə qazancım olursa aparır. Amma onun buna ixtiyarı yoxdur.

Pulun ödənilmə vaxtına hələ müəyyən qədər var. Amma buna baxmayaraq, məndən pulu tələb edirlər. Evimə hücum çəkiblər. Pəncərələrin şüşələrini qırıblar. Qanunsuz olaraq böyük miqdarda faizlər əlavə edib, borcumu şişirdiblər. Mən 3 uşaq anasıyam. Bu faizləri necə ödəyə bilərəm? Son çarəm intihardır”, - deyə mərhum Zeynəb Muradova çarəsiz şəkildə başına gələcək faciədən belə danışıb.

Görünən budur ki, noyabrın sonları yaxınlaşıb və Zeynəb sələmə götürdüyü pulu qaytara bilmədiyi üçün çıxış yolunu intihar etməkdə görüb.

Evini satışa çıxarıb

Mərhumun “Facebook” profilindən məlum olur ki, ötən ilin yayında o, yaşadığı evi satışa qoyub.

Sosial şəbəkədə fotoları paylaşan Zeynəb Muradova evini 70 min manata satışa çıxardığını bildirib.

“WhatsApp”da yazdığı son status: “Bəsdi, yoruldum”

Zeynəb Muradovanın yaxınlarından biri gənc qadının son statusunun yer aldığı bir fotonu redaksiyamıza göndərib.

Sonuncu dəfə “WhatsApp”a 24 noyabr 21:09-da daxil olduğu görünən Zeynəbdən, bu tarixdən sonra xəbər almaq mümkün olmayıb. O, son statusunda isə belə yazıb: “Bəsdir, yoruldum”.

Bəli, bütün təzyiqlərdən bezən 30 yaşlı üç uşaq anası həyatına son qoyub.

Yaxınları onunla əlaqə saxlaya bilmədiyi üçün işlədiyi, həm də qaldığı ünvana baş çəkib və qorxunc mənzərə ilə üzləşiblər.

Sonda qeyd edək ki, intihar faktı ilə bağlı hazırda cinayət işi açılıb. Hadisənin detallarını öyrənmək üçün istintaq aparılır.

Gün.Az