Qənirə Paşayeva İstanbul Azərbaycan Kültür evi başqanı ilə görüşüb

Millət vəkili Qənirə Paşayeva İstanbul Azərbaycan Kültür evi başqanı Hikmet Elp ilə görüşüb.

Publika.Az-ın verdiyi xəbərə görə, görüş zamanı ölkələr arası münasibətlər üzərində ətraflı fikir mübadiləsi aparılıb. Azərbaycan həqiqətlərinin dünya ictimaiyyətinin diqqətinə daha geniş şəkildə çatdırılması üçün Azərbaycan diaspora təşkilatlarının üzərinə düşən vəzifələrə toxunan millət vəkili bu işdə türk diaspora təşkilatları ilə birgə hərəkət etmələrinin vacibliyini qeyd edib.

O, qardaş Türkiyədə fəaliyyət göstərən insanlarımızın qurduğu diaspor təşkilatlarının bir-birlərinə sıx dəstək vermələrinin və Türk dünyasını narahat edən bütün problemlərin həlli üçün bərabər çalışmalarını xüsusi diqqətə çatdırıb. Millət vəkili harada doğulmasından və harada yaşamasından asılı olmayaraq hər bir Türk insanının, dünyanın müxtəlif ölkələrində fəaliyyət göstərən Azərbaycan və türk diaspora təşkilatlarının Xocalı Soyqırımı, Qarabağ həqiqətlərinin dünyaya çatdırılması, bu soyqırımı törədənlərin öz layiqli cəzasını alması üçün birlikdə çalışmalarını sürətləndirmələrinin vacibliyini vurğulayıb. Təşkilatın bu günə qədər gördüyü işlər, Azərbaycan mədəniyyəti, tarixi, həqiqətlərinin yayılması istiqamətində həyata keçirdikləri layihələr barədə geniş məlumat verən İstanbul Azərbaycan Kültür evi başqanı Hikmet Elp Türkiyədə fəaliyyət göstərən Azərbaycan diaposr təşkilatları və bütün Türk diaspor təşkilatları ilə sıx əməkdaşlıq etdiklərini deyib. O, Azərbaycan həqiqətlərinin yayılması və təbliği istiqamətində səylərini bundan sonra daha da artıracaqlarını bildirib.

O, bəyan edib ki, təşkilat indiyə qədər olduğu kimi bundan sonra da daim Azərbaycan həqiqətlərinin daha geniş yayılması istiqamətində layihələr, tədbirlər həyata keçirəcək və bu istiqamətdə işləri daha da sürətləndirəcəklər. Təşkilatın rəhbəri bu istiqamətdə görülən işlər və həyata keçirməyi planlaşdırdıqları layihələr barədə millət vəkilinə məlumatlar verib.

Q.Paşayeva isə təşkilatın fəaliyyətində, həyata keçirdiyi layihələrdə hər zaman bir millət vəkili və Avrasiya Beynəlxalq Araşdırmalar İnstitutu İB-nin sədri kimi iştirak və dəstək verməyə hazır olduqlarını bildirib. Görüşün sonunda millət vəkili İstanbul Azərbaycan Kültür evi başqanı Hikmet Elpə Azərbaycanla bağlı və özünün müəllifi olduğu kitabları da hədiyyə edib.

Millət vəkili Qənirə Paşayeva İpəkyolu Media Qrupu başqanı Seyfullah Türksoy ilə də görüşüb və ətraflı fikir mübadiləsi aparılıb.

Publika.Az