AYB yazıçı Anarın xəstəxanaya düşməsi xəbərinə münasibət bildirdi

Azərbaycan Yazıçılar Birliyinin (AYB) sədri Anarın səhhətinin pisləşdiyi, xəstəxanaya yerləşdirildiyi haqqında məlumatlar yayılıb. AYB-nin mətbuat xidmətinin rəhbəri Ədalət Əsgəroğlu da Publika.Az-a verdiyi açıqlamada xəbəri təkzib edib.

"Anar bu gün Fikrət Qocanın kitabının təqdimatında idi. Saat 14:00-da başlamış tədbiri Anar özü açdı. Tədbirdə sona qədər iştirak etdi. Onun səhhətində heç bir problem yoxdur" - qurumun mətbuat katibi bildirdi.

Ə.Əsgəroğlu mətbuatda bu kimi xəbərlərin yayılmasına hiddətləndiyini gizlətmədi: "Bu cür şər-şəbədə xarakterli yazıların yayılmasına nəzarət mexanizmi qoyulmalıdır. Anar haqqında demək olar ki, hər həftə yalan xəbərlər yayılır. Bunu kim edirsə, məqsədi ictimaiyyəti və ədəbi mühiti çaşğınlığa salmaqdır. Mənim adımdan da Anar haqqında yalan informasiyalar yayılır. Bu yaxınlarda bir neçə xəbər portalı yazmışdı ki, guya mən deyirəm, Anar gedir. Halbuki, mən belə açıqlama verməmişəm. Senzura ləğv olunsa da, mətbuata nəzarət lazımdır. Belə yalan xəbərlərlə ictimaiyyəti aldatmaq olmaz”.

---------
15:28

Azərbaycan Yazıçılar Birliyinin (AYB) sədri Anarın səhhətinin pisləşdiyi, xəstəxanaya yerləşdirildiyi haqqında məlumatlar yayılıb. Publika.Az xəbərlə bağlı AYB katibi Rəşad Məcidlə əlaqə saxlayıb.

Rəşad Məcid xəbəri təkzib edib:

“Anar dəf kimidir. Hazırda bir yerdə, tədbirdəyik. Hətta tədbirdəki çıxışıma görə mənə təşəkkür etdi. Kimin şübhəsi varsa, buyurub gələ bilər. Tamamilə yalan məlumatdır. Allah Anara uzun ömür versin”.

Günay
Publika.Az