Millət vəkili: “Televiziyalarda senzuraya gərək yoxdur“

"Televiziyaların səviyyəsinin yaxşılaşdırılması və veriliş siyasətinin formalaşması üçün senzura və ya digər oxşar mexanizmin tətbiqi gərəkli deyil”. Bunu Publika.Az-a açıqlamasında Milli Məclisin Mədəniyyət komitəsinin sədri Nizami Cəfərov deyib.

Komitə sədri hesab edir ki, televiziya rəhbərləri özləri tədbir görməli, davamlı olaraq səsləndirilən tənqidlərdən nəticə çıxarmalıdırlar: “Telekanallar özlərinin veriliş siyasətini müəyyən edərkən cəmiyyətin, peşəkarların və ziyalıların fikirlərini nəzərə almalıdırlar”.

Millət vəkili vurğulayıb ki, televiziyaların normal fəaliyyət göstərməsi üçün dövlət səviyyəsində işlər görülür, indi növbə televiziyalarındır:

“Televiziyalara təzyiq göstərib “onu vermə-bunu ver” demək də olmur, amma televiziya rəhbərləri cəmiyyəti düşünərək öz proqramlarını tənzimləməlidirlər”.

Televiziya eksperti Qulu Məhərrəmli də senzura xarakterli hər hansı mexanizmin tətbiqi məqsədəuyğun saymır:

“Bu, televiziyaları daha da ağır duruma salar. Milli Teleradio Şurasının vəzifəsi onda ibarətdir ki, televiziyaların qanundan kənara çıxıb-çıxmamasına nəzarət etsin. Eyni zamanda qurum müəyyən tövsiyələr verə bilər. Amma gərək telekanallar özləri məsələyə məsuliyyətlə yanaşsınlar. Kommersiya xatirinə ucuz şou proqramları ilə efirə doldurmağın mənası yoxdur”.

Rüfət Əhmədzadə

Publika.Az