Qırmızı.az
Pul üçün nələr edirmişlər...
Məşhurluğa son dərəcə orijinal yolla çatan adamlar bütün dövrlərdə olub. Onlar qeyri-adi qəhrəmanlıqlar göstərməyib, əlçatmaz, ünyetməz zirvələrə bayraq sancmayıb, təzə Amerika açmayıblar. Heç hansısa elmi kəşfə də imza atmayıblar. Bu adamlarin işi yalnız insanları aldatmaq olub - elə ustalıq və bacarıq nümayiş etdiriblər ki, adları tarixə düşüb.
Onlar kimdir onlar və hansı hoqqalardan çıxıblar?
"Eyfel qülləsini satıram"
Viktor Lüstiqin adı Ginnesin rekordlar kitabına bütün dövrlərin və
xalqların ən məşhur fırıldaqçısı kimi yazılıb. O, Eyfel
qülləsini... bir neçə nəfərə satmağa nail olub.
Lüstiq Çexiyanın Bogema şəhərində doğulmuşdu. Hələ 20 yaşında ikən
qəlp pul buraxan aqreqat icad eləmişdi. Qurğu o qədər ləng
işləyirdi ki, 100 dollarlıq bir əsginasın hazırlanmasına 6 saat
vaxt gedirdi. Lüstiq aqreqatı satmaq qərarına gəlir və dərhal
müştəri tapır. Alıcı aparatdan çıxan qəlp pulla əsl dolların heç
bir fərqi olmadığını görəndə tərəddüd etmədən qurğuya 30 min dollar
sayır.
6 saat sonra aqreqatdan dollar əvəzinə sadəcə ağ kağız çıxdığını
görəndə isə gözləri bərəlir və aldadıldığını anlayır. Lakin nə
fayda, Lüstiq artıq çox uzaqlarda idi.
1925-ci ilin mayında Viktor Lüstiq macəra axtara-axtara gəlib
Parisə çıxır. Qəzetlərin birində oxuyur ki, məşhur Eyfel qülləsi
yaxın vaxtlarda təmirə dayandırılacaq. Fırıldaqçı dərhal işə
başlayır. Əvvəlcə özünə poçt və teleqraf nazirinin müavini kimi
saxta sənəd düzəldir. Sonra Fransada təkrar metal emalı ilə məşğul
olan 6 tanınmış biznesmenə rəsmi məktub göndərir ki, guya qüllə
çəkilən xərcləri doğrultmadığına görə sökülür və dövlət onu qara
metal kimi qapalı hərraca çıxarır.
"Poçt və teleqraf nazirinin müavini" məktubda bir məqamı xüsusi
vurğulayır ki, ictimaiyyətin etirazlarının qarşısını almaq üçün bu
sirr mütləq gizli qalmalıdır. Tezliklə o, qüllənin sökülməsi
hüququnu biznesmen Andre Puassona satir və pulla dolu çamadanları
da götürüb Vyanaya qaçır.
Puasson öz maymaqlığından xəcalət çəkə-çəkə bu faktı açıb-ağartmır.
Elə Lüstiqə də bu lazım idi. O, yenidən Parisə qayıdır və Eyfel
qülləsini eyni sxemlə başqa bir biznesmenə sırıyır. Lakin bu dəfə
bəxti gətirmir - aldadılmış alıcı polisə xəbər verir. Lüstiq ABŞ-a
qaçmağa məcbur olur.
1934-cü ildə Viktor Lüstiq pul saxtalaşdırılamsına görə ABŞ-da həbs
olunur. Məhkəməyə bir gün qalmış o, Nyu-Yorkun federal
həbsxanasından qaça bilir. Lakin bir ay sonra onu Pitsburqda
yaxalayırlar.
Məhkəmədə Lüstiq bütün günahlarını etiraf etsə də, ona 20 il iş
kəsilir və cəzasını Kaliforniya ştatındakı Alkatras həbsxanasında
çəkəsi olur. O, 1947-ci ilin martında Sprinqfild şəhərindəki məhbəs
xəstəxanasında ağ ciyərin iltihabından dünyasını dəyişir.
"Bu oğlan əsl sehrbazdı..."
Fırıldaqçılığın daha bir nümayəndəsinin əməlləri adamı bu gün də
heyrətə salır. Çarlz Ponzi hələ "MMC"-lər mövcud olmamışdan xeyli
qabaq dünyada ilk maliyyə piramidası yaradan kəs olub (Azərbaycanda
"Vahidbank" təcürəbəsi 190 il sonra ortaya çıxdı – M.Z.).
1903-cü ildə paroxodla İtaliyadan Amerikanın Boston şəhərinə
gələndə onun cibində cəmi 2 dolları vardı. Düşünürdü ki, zəngin
sərvətlərə malik bu ölkədə böyük kapitala yiyələnmək elə də çətin
olmayacaq. Lakin ilk vaxtlar bir neçə sahəyə baş vursa da varlanmaq
niyyəti reallaşmır.
Bir gün Beynəlxalq Poçt İttifaqından Ponziyə məktub gəlir. Zərfin
içinə poçt markasına dəyişmək üçün kupon da əlavə edilmişdi ki,
cavab məktubunu pulsuz göndərmək mümkün olsun. Markanı görəndə
sevincdən Çarlzın gözləri işıqlanır və dərhal hesablamağa başlayır.
Məsələn, İtaliyada alınan marka valyutalardakı fərqə görə Amerikada
altı dəfə çox gəlir gətirə bilər.
Əgər müxtəlif ölkələrdən on minlərlə belə məktub göndərilsə, nə baş
verər? Onda çox qısa vaxt ərzində əsl milyonçuya çevrilmək olar
ki!..
Amma Çarlzın sonrakı hesablamaları göstərdi ki, məktubların
göndərilməsinə çəkilən xərclər gəliri büsbütün udur.
Ponzi bu reallığı bütün çılpaqlığı ilə dərk eləsə də,
açıb-ağartmadı. İdeyasını yaymaq üçün cani-dildən işə başladı.
1919-cu il dekabrın 26-da Boston qəzetlərinin birində belə bir elan
dərc olundu: "Poçt kuponları ilə əməliyyat. Gəliriniz 45 gündən
sonra 50 faiz artacaq. Çarlz Ponzi".
Çarlz öz ideyasını reallaşdırmaqla pulu necə qazanacağını hamıdan
yaxşı bilirdi. O, marka satmayacaqdı, lakin adamların "pulu necə
qazanırsan" sorğusunu cavablandırmaq üçün "poçt kuponları ilə
əməliyyatdan" deməsi bəs edəcəkdi.
İşə 200 dollar borc götürməklə başlayır. Ofis kirayələdikdən sonra
tanışları arasında kompaniyasının güclü reklamını qurur və qısa
müddətdə ilk əmanətçilərini də tora salmağa nail olur. Ponzi yenə
də kupon satmaqla milyonçuya necə çevrilməyin mümkünlüyü haqda
suallardan ustalıqla yayınır, "bu ciddi kommersiya sirridir"
deməklə canını qurtarırdı.
45 gündən sonra Ponzi ilk əmanətçiyə, söz verdiyi kimi, qoyduğu
vəsaitin 150 faizi həcmində pul ödəyir. Düzdür, bu məbləğ vəd
olunduğu kimi poçt kuponlarının satışından əldə edilməmişdi. Bu,
sadəcə sonrakı müştərilərin kompaniyaya yatırdığı vəsaitdən
ödənirdi. Bunu isə Ponzidən başqa heç kim bilmirdi.
Başqalarının bildiyi bir yalançı həqiqət vardı - Ponzi dahi
biznesmendir və əmanətçilərinin pulunu qısa vaxtda dəfələrlə artıra
bilir.
Selin qabağı açılmışdı-kompaniyaya pul yatırıb tezliklə milyonçu
olmaq istəyənlərin sayı-hesabı bilinmirdi. Ponzi əmanətçilərin
sayının çoxluğunu nəzərə alıb onların qeydiyyatını dəqiq aparmaq
üçün kompaniyaya əlavə işçilər götürür.
Elə həmin dövrdə "Nyu-York ivninq uorld" qəzetində dərc olunan
məqalə Ponzinin əl-qolunu daha da açdı: "Bəli, bu oğlan əsl
sehrbazdı. Pulunuzu ona etibar edin və bu dahi 45 gün ərzində sizi
böyük sərvət sahibinə çevirsin. Ponzi poçt markalarının
ticarətindən qazandığı milyonları arzu edənlərin hamısı ilə
bölüşməyə hazırdır".
Əmanətçilərin böyük əksəriyyəti faizlərini götürən kimi heç
fikirləşmədən onu təzədən kompaniyaya yatırırdı. Hakimiyyətdəkilər
isə başlarını itirmişdi-onların əlində belə fəaliyyətin qarşısını
almaq üçün heç bir qanun yox idi.
Maliyyə piramidasının mövcudluq şərtlərindən biri də yeni-yeni
əmanətçilərin şəbəkəyə fasiləsiz qoşulmasıdır. Lakin Ponzidə işin
bu tərəfi yaxşı qurulmamışdı. O, bu tip fırıldaqçılığın ilk
cığıraçanı olsa da, bu məqamı diqqətdən qaçırmışdı.
1920-ci ilin yayında Ponzinin keçmiş əməkdaşlarından biri "Boston
post" qəzetində çıxış edərək onun fəaliyyətini bütün çılpaqlığı ilə
açıb ortaya qoydu. Elə həmin vaxt polis də vəziyyət aydınlaşana
qədər Ponzinin yeni əmanətlər qəbul etməsinə qadağa qoydu. Bundan
sonra isə köhnə əmanətçilər pullarını geri almaq ümidi ilə
kompaniyaya axışmağa başladılar.
Ponzi başını itirmişdi. Lakin kompaniyanın vəsaiti tam tükənəndə və
əmanətçilərin pulunu ödəməyin mümkün olmadığıni bütün detalları ilə
anlayanda belə o, ölkədən qaçmadı. Beləcə, milyonlar hansı sürətlə
toplanmışdısa, həmin sürətlə də əldən çıxdı.
Çarlz Ponzinin həyatının sonrakı mərhələsi həbslər və azadlıqlarla
zəngin olub. O, bir ara hətta Benito Mussolininin müşaviri kimi də
fəaliyyət göstərib. Lakin bu, uzun çəkməyib-diktator onu tanıyan
kimi işdən qovub.
Keçmiş milyonçu həyatının qalan hissəsini Braziliyada ingilis
dilindən dərs deməklə keçirib, ömrünü çox ciddi ehtiyac və
məhrumiyyətlər içərisində başa vurub...
Mətin Zöhrabbəyli
Publika.Az
-
Magazin100:45
Könül Kərimova estetik əməliyyat etdirdi - FOTO
-
Qoroskop00:15
Günün ULDUZ FALI: qarşıdurmalar ola bilər
-
Sosial25 Aprel 23:48
Bakıda ayıq sürücü müştərinin "Land Rover”indən oğurluq etdi
-
Səhiyyə25 Aprel 23:12
Onkoloqdan XƏBƏRDARLIQ: bu xəstəliklər xərçəngə çevrilə bilər
-
Magazin125 Aprel 22:48
Müşfiq Musanın məşhur mahnısını oxudu - VİDEO
-
Magazin125 Aprel 22:00
Firuzə İbadova həmin xəbəri TƏKZİB ETDİ: "Onun ruhu şad olsun deyə..."
-
Sosial25 Aprel 21:24
Bakıda qızı açıq-saçıq geyiminə görə mağazadan qovdular - VİDEO
-
İnanc25 Aprel 20:24
Ağdam Cümə məscidində ilk Azan - VİDEO