• USD 1,7339 +0,12% EUR 1,8516 +0,84%
    • GBP 2,1859 +0,79% RUB 0,0272 +0,74%

QHT-yə universitet açmaq səlaihiyyətini kim verib? - QALMAQAL

QHT-yə universitet açmaq səlaihiyyətini kim verib? - QALMAQAL

Distant təhsillə bağlı qalmaqal böyüyür; tələbələr Anadolu Universitetinin Bakıdakı İnnovasiya Mərkəzini ittiham edir

Distant təhsil hər zaman çoxlarına qaranlıq qalan məsələ olub. Məlumat üçün qeyd edək ki, belə təhsil növündə tələbə ilə müəllim birbaşa ünsiyyətdə olmur. Bu daha çox ikinci təhsil növü kimi qeyd olunur. Tələbələr dərs materiallarını internet vasitəsilə əldə edir. Universitet tələbənin elektron poçtuna dərslikləri göndərir, müəllimlər telefon və “Skype” vasitəsilə tələbəyə keçilən dərsləri izah edir. Adıçəkilən təhsil növü ilk baxışdan sadə görünsə də, bir o qədər də qəlizdir. Tələbənin dərsləri mənimsəməsi üçün müəllimlə birbaşa, canlı ünsiyyət yarada bilməməsi onların mükəmməl təhsil almasına mane olur.

Tələbə şikayəti

Distant təhsil verən ali məktəblərdən biri də Türkiyənin Anadolu Universitetidir. Bu universitetin Bakıda da tərəfdaşı var. Bu gün mediada tələbələr həmin tərəfdaşa – “Avrasiya İnnovasiya İnstitutu” adlı QHT-yə qarşı ciddi ittihamlar səsləndiriblər. Tələbələr adıçəkilən qurum tərəfindən aldadıldıqlarını bildiriblər: “Reklamını görmüşdüm, maraqlandım, getdim universitetə. Orda mənə dedilər ki, öncə 1 ay müddətində türk dili kursları keçməliyəm... Tələbələr bilsəydilər ki, bu, filial deyil, tərəfdaş qurumdur, QHT-dir, əlbəttə ki, təhsil almaq istəməzdilər. Mən ilk olaraq kurs və imtahan zamanı şübhələndim ki, bu universitet pul tələsidir. Çünki həmin il kursa gələn də, gəlməyən də qəbul oldu”.

Tələbələr deyir ki, Anadolu Universitetinin özündə illik təhsil haqqı 400 türk lirəsi olduğu halda Azərbaycanda tələbələrdən 1200 avro pul alınır. Eyni zamanda tələbələr onlara verilən planşetlərin keyfiyyətsiz və Çin istehsalı olduğun deyiblər.

Araşdırmalarımız zamanı məlum oldu ki, adıçəkilən mərkəzin saytı (http://anadolu.edu.az/) və Facebook sosial şəbəkəsində səhifəsi var. Sosial şəbəkədəki səhifədə planşetlərin xarab çıxması barədə məlumat da öz təsdiqini tapır. Universitet qeyd edir: “Batareya tutumunda problem olan planşetlərin texniki servisinə başlanıb. Həftə içi hər gün, saat 10:00-12:00 arası yalnız batareya tutumunda problemi olan planşetlərinizi təmir üçün təhvil verə bilərsiniz. Planşetlərin ən son qəbul günü 28.02.2014-cü il tarixidir”.

Onu da qeyd edək ki, tələbələrə ödəniş etmək üçün Azəri-Türk Bank yardım edir. Adıçəkilən bank universitetin tələbələrinə kreditlər verir. Bu bankın türkiyəlilərlə bağlı olduğu da üzə çıxıb.

Qarşı tərəf təkzib edir

Avrasiya İnnovasiya İnstitutu İctimai Birliyinin ictimaiyyətlə əlaqələr üzrə mütəxəssisi Rövşən Əliyev “Yeni Müsavat”a açıqlamasında bildirib ki, tələbələrin dedikləri problemlər onlardan asılı deyil: “Anadolu Universiteti dünya üzrə tanınan, distant təhsil üzrə ilk sıralarda olan bir təhsil müəssisəsidir və 2 milyondan çox tələbəsi var. Bu məsələylə bağlı cavabları biz verə bilmirik. Bunun cavabdehi Anadolu Universitetidir. Biz onların işinə qarışmırıq. Təhsil sistemlərinə, yöntəmlərinə, qayda və qanunlarına qarışmaq səlahiyyətimiz yoxdur. Biz sadəcə tərəfdaşıq və öz vəzifələrimizi yerinə yetirik. Tələbələrin hər hansı şikayəti olanda biz onların şikayətlərini Anadolu Universitetinə göndəririk və o məsələlər oradan gələn cavab əsasında həll edilir”.

Daha sonra publika.az-a danışan R. Əliyev qəzetdə gedən yazıda fikirlərinin təhrif olunduğun bildirdi: “Bütövlükdə yazı çox təhrif olunub, gerçəyi əks elətdirmir. Eyni zamanda, oxuya bilməyən, kənarda qalan 2-3 tələbənin qərəzli fikri bu təhsildən məmnun olan bütün tələblərin fikri kimi göstərilməsi həqiqətdən uzaqdır”.

Ekspert: “QHT təhsillə məşğul ola bilməz”

Kimya elmləri namizədi, ekspert Səftər Nəhmətli isə deyir ki, distant təhsil yeni deyil: “20-ci əsrin əvvəllərindən inkişaf etmiş ölkələrdə distant təhsil var. Bu təhsil fiziki və əqli inkişafı zəif olan insanlar üçün yaranmışdı. Hərəkət məhdudiyyəti olan, tədris müəssisəsinə gedib-gələ bilməyən insanlar üçün nəzərdə tutulmuşdu. Sonradan isə distant təhsili normal adamlara da tətbiq etməyə başladılar. Bir sözlə, distant təhsil əsas təhsil sayılmır, ancaq ikinci təhsil üçün yararlı ola bilir. Mən də bu gün mətbuatdan oxudum distant təhsillə bağlı. Bir sözlə, universitet adında nə açırsansa bu distant təhsil adı altında, bu Azərbaycan Beynəlxalaq Universitetinin bir tayı olacaq. Yəni distant təhsil əqli və fiziki problemli insanlara yox, normal insanlara şamil olunursa, artıq məlum olur ki, həmin insan bazar açıb burada”.

S. Nəhmətli deyir ki, QHT adı ilə tədris müəssisəsi yaratmaq qanunla qadağandır: “Çünki QHT-ni yaradanda nizamnaməni Ədliyyə Nazirliyinə aparırlar. Nazirlikdəki məsul işçi də nizamnaməni oxumur və belə bir vəziyyət yaranır. Oxusa, nizamnamədəki həmin bəndi çıxarardı. Çünki QHT təhsil müəssisəsi aça bilməz. Bu qanunla qadağandır. QHT insan hüquqları ilə məşğul olur, quşların, heyvanların, ekologiyanın qorunması ilə məşğul olur. Bir sözlə cəmiyyəti narahat edən məsələlərlə məşğul olmalıdır. Amma QHT tədris müəssisəsi aça bilməz. Belə olsa, hərə bir QHT yaradıb istədiyi işlə məşğul olar”.

Məsələ ilə bağlı Təhsil Nazirliyinə də sorğu göndərdik. Lakin nazirlikdən sorğumuza cavab verilmədi.

Araşdırmanı davam etdirəcəyik.

Elmin Bədəlov

Xəbər lenti

DAHA ÇOX XƏBƏR