Qırmızı.az
Alternativ enerji erası başlayır-AKTUAL
Beynəlxalq Ekoenergetika Akademiyasının prezidenti:"Azərbaycan karbohidrogen
ehtiyatlarına arxayınlaşmayıb alternativ enerji ilə
bağlı iri layihələr həyata keçirməlidir"
Dünyada neft-qaz kimi ənənəvi enerji mənbələri tükənmək üzrə
olduğundan hazırda bütün inkişaf etmiş dövlətlər bu mənbələrdən
asılılığı tədricən azaltmaq və gələcəkdə ondan imtina etmək
istiqamətində fəaliyyətlərini gücləndiriblər. Fukusimadakı"2-cı
Çernobıl"dan sonra atom enerjisinin taleyi də şübhə altına düşüb.
Alternativ enerji mənbələrindən istifadəni artırmaq məsələsi
bəşəriyyətin qarşısında qlobal bir problem kimi dayanır.
Alternativ enerji potensialı nə qədərdir?
Konkret sərhədləri və konkret bərpa olunmayan ehtiyatlar
limiti olan Yer planetinin təbii resursları amansızcasına və
sürətlə istismar olunur. Hesablamalara görə, əsrin sonlarına doğru
neft-qaz və kömür yataqları tükənməyə başlayacaq. O vaxtadək
alternativ enerjiyə keçilməsə, bəşəriyyəti ağır günlər
gözləyir.
Ənənəvi enerji növlərinin ekologiyaya da ciddi zərər vurması əlavə
problemlər yaradır. Təbii enerji isə tükənməzlik və bərpaolunma
xüsusiyyəti, həmçinin ekoloji baxımdan təmizliyi ilə fərqlənir.
Ekoloqların və fiziklərin hesablamalarına görə, alternativ enerji
mənbələri bütün bəşəriyyəti istənilən qədər enerji ilə təmin etmək
qüdrətindədir.
Azərbaycanın irihəcmli neft-qaz ehtiyatları olsa da, hesablamalara
görə, yeni yataqlar kəşf olunmazsa, uzağı 2050-ci ildən sonra bu
ehtiyatlar tükənməyə başlayacaq. Bu isə ölkənin alternativ enerji
mənbələrinə keçid hazırlıqlarını sürətləndirməsini zəruri edir.
Artıq bir neçə ildir ki, ölkəmizdə külək və Günəş enerjisindən
istifadəyə başlanıb. Lakin hələlik bu çox zəif haldadır. Halbuki
Azərbaycanın alternativ enerji imkanları daha çoxdur.
Külək enerjisi hansı perspektiv vəd edir?
Hesab edilir ki, ilk külək mühərrikləri hələ 2 min il öncə
Çində, Yaponiyada və Tibetdə quraşdırılıb. Bizim eramızdan öncəki
dövrlərdə külək mühərrikləri Misirdə, Yaxın Şərqdə, o cümlədən
Azərbaycanda da mövcud olub.
Dünyada ilk 100 kVt gücündə külək elektrik stansiyası keçmiş Sovet
İttifaqında (Krımda) istismar olunub. İndi müxtəlif gücdə və fərqli
konstruksiyalarda olan külək mühərrikləri dünyanın bir çox
yerlərində və hətta daim küləkli dəniz və okeanlarda da
quraşdırılaraq istismar olunur.
Təcrübə göstərir ki, Azərbaycanın bir çox rayonlarında külək
enerjisi qurğularının tətbiqinin böyük perspektivi var.
Hesablamalara görə, Azərbaycan 800 MVt-a yaxın illik külək enerjisi
ehtiyatına malikdir. Bu ehtiyat ildə təxminən 2,5 milyard kVt/saat
elektrik enerjisi deməkdir.
Bu isə öz növbəsində ildə 1 milyon tona yaxın şərti yanacağa
qənaət, ən əsası isə külli miqdarda tullantıların, o cümlədən
ozondağıdıcı olan karbon dioksidin atmosferə atılmasının qarşısının
alınması deməkdir. Üstəlik, öz maya dəyərinə görə külək enerjisi
digər alternativ enerji mənbələri ilə müqayisədə daha ucuz başa
gəlir.
Günəşli respublikanın Günəş enerjisi potensialı
Hələ 1600-cı ildə Fransada suyun ötürülməsi üçün istifadə
edilən və qızdırılmış hava ilə işləyən ilk Günəş mühərriki
yaradılmışdı. XVII əsrin axırında görkəmli fransız kimyagəri
A.Lavuazye ilk Günəş sobasını yaratdı.
Sonrakı dövrlərdə bu sahədə zəif də olsa, irəliləyiş baş verdi və
indi dünyada nəhəng həcmli Günəş batareyalarının qurulduğu
stansiyalar var. Artıq bir çox ölkələrdə Günəş enerjisi ilə işləyən
təyyarələr, gəmilər, avtomobillər, ev əşyaları var, hətta müxtəlif
qurğular və binalar da bu enerji ilə təmin olunur.
Azərbaycanda günəşli saatların miqdarı il ərzində 2400-3200
saatdır. İl ərzində 1 m2 Yer səthinə düşən Günəş enerjisinin
miqdarına görə Azərbaycan (1500-2000 kVt/saat) ABŞ, Rusiya, Fransa,
Çin kimi ölkələrdən öndədir ki, bu da Günəş enerjisindən
istifadənin tətbiqinə sərmayələrin cəlb edilməsinin səmərəlilik
meyarlarından biri kimi qiymətləndirilə bilər.
Ölkəmizdə günəşli günlərin sayı 300-dən çoxdur. Günəş enerjisindən
istifadənin inkişafı Azərbaycanın bir çox rayonlarında enerji
problemini qismən həll edə bilər. Artıq ölkəmizdə bununla bağlı
müəyyən pilot layihələr həyata keçirilir. Bəzi binaların damında
Günəş batareyaları qurulub və enerji təminatı tamamilə bundan
alınır.
Su elektrik stansiyaları ekoloji təmiz texnologiyadır
Azərbaycanın ümumi enerji sistemində su elektrik
stansiyalarının istehsal gücünün xüsusi çəkisi hazırda 18 faiz
təşkil edir. Ölkədə indiyə qədər istifadə edilməmiş hidroenergetika
ehtiyatlarının mənimsənilməsi üçün geniş imkanlar var.
Bu istiqamətdə aparılmış tədqiqat işləri nəticəsində Azərbaycandakı
çayların tam hidroenerji potensialının 40 mlrd. kVt/saat, texniki
cəhətdən əlverişli potensialının isə 16 mlrd. kVt/saat olduğu
müəyyən edilib ki, bunun da 5 mlrd kVt/saatı kiçik SES-lərin payına
düşür.
SES-lərin tikintisi sel sularının tənzimlənməsi, ekoloji cəhətdən
təmiz elektrik enerjisi istehsalı və yeni suvarma sistemlərinin
yaradılması kimi önəmli məsələlərin həllində də mühüm rol
oynayır.
Azərbaycanda çaylar üzərində və su təsərrüfatı obyektlərində
onlarla kiçik SES yerləşdirmək olar ki, onların da istehsal etdiyi
elektrik enerjisi ildə azı 3 mlrd kVt/saat təşkil edə bilər.
Qeyd edək ki, hökumət yaxın perspektivdə 60-dan artıq kiçik SES-in
tikintisini məqsədəuyğun hesab edir.
Geotermal və biokütlə enerjisi potensialı
Yer təkinin istiliyi bir çox ölkələrdə sənaye, kənd
təsərrüfatı, məişət və kommunal sahələrdə və təbabətdə geniş
istifadə olunur. Enerji istehsalında və istehlakında geotermal
enerji mənbələrindən istifadənin üstünlüyü ondan ibarətdir ki,
onların tətbiqi iri həcmli maliyyə vəsaiti tələb etmir.
Ekoloq Cəmşid Quliyevin sözlərinə görə, Azərbaycanda sənaye, kənd
təsərrüfatı və sosial xidmət sahələrinin sürətli inkişafı
biokütlədən istifadə etməklə enerji istehsalı üçün yeni imkanlar
açır. Ölkədə biomaddələrin böyük mənbələri mövcuddur.
“Hər il tullantıların zərərsizləşdirilməsi poliqonlarına 2 milyon
tondan çox bərk məişət və istehsalat tullantıları atılır. Bakı və
ölkənin iri sənaye şəhərlərində bərk məişət və istehsalat
tullantılarının utilizasiya olunması ictimai binaların
qızdırılmasındakı çətinliklərin qismən aradan qaldırılmasını təmin
etmiş olardı", - deyə ekoloq"Gündəlik Teleqraf"a bidirib.
Ekspert deyir ki, bioqaz qurğularından kənd təsərrüfatında və ya
böyük heyvandarlıq fermalarında istifadə səmərəlidir:"Artıq bəzi
vətəndaşlarımız peyindən istifadə edərək bu qurğularda qaz və gübrə
istehsal edir. Bu tamamilə zərərsiz, faydalı bir
texnologiyadır".
Azərbaycan post-petrol erasına indidən hazırlaşmalıdır
Beynəlxalq Ekoenergetika Akademiyasının (BEA) prezidenti
Fəqan Əliyev deyir ki, Azərbaycan təbii ehtiyatlarına
arxayınlaşmayıb alternativ enerji ilə bağlı iri layihələr həyata
keçirməlidir.
Ekspertin fikrincə, özəl sektorun bu sahəyə stimullaşdırılması
lazımdır:"Belə stimullaşdırıcı tədbirlərdən biri də sahə ilə bağlı
ölkəyə gətirilən avadanlıqların rüsumdan azad olunması ola bilər.
Həmçinin, bu sahədə çalışan şirkətlərin sırf sahə ilə bağlı
fəaliyyətinə vergi güzəştləri tətbiq edilməlidir".
BEA prezidentinin"Gündəlik Teleqraf"a bildirdiyinə görə,
Azərbaycanda bu sahədə ciddi kadr problemi var və onun ən qısa
müddətdə aradan qaldırılması üçün hökumət səviyyəsində tədbirlərin
görülməsi zəruridir. Bu sahədə kadrlar yetişdirməli və elmi
araşdırmaları dəstəkləməliyik.
Xatırladaq ki, 2010-cu il iyulun 16-da ölkə Prezidenti Sənaye və
Energetika Nazirliyinin yanında Alternativ və Bərpa Olunan Enerji
Mənbələri üzrə Dövlət Agentliyinin yaradılması haqda fərman
imzalayıb.
Agentliyin yaradılmasında məqsəd Azərbaycanda alternativ və bərpa
olunan enerji mənbələrini istismara cəlb etməklə ölkənin enerji
resurslarından istifadənin səmərəliliyini yüksəltməkdir.
Azərbaycan enerji ölkəsidir, bu torpağın altı da, üstü də enerji
mənbəyidir. Hər halda, tükənən yeraltı enerjilərimizin əvəzinə
tükənməz yerüstü enerji ehtiyatlarımızdan yararlansaq daha doğru
olar. Çünki bu, daha təhlükəsiz, daha sağlam və ən əsası tükənməz
enerjidir...
Elçin Bayramlı
Publika.Az
-
Magazin112:22
Məleykə Əsədovanın görün neçə yaşı oldu
-
Region11:42
Nikolyanı Ermənistana buraxmadılar: Qarabağda yaralanmışdı, Qazaxla sərhəddə...
-
Nida Xəbər 11:32
Ermənistan polisi Bağanis-Voskepar yolunu bağladı
-
Sosial11:13
Bütün sosial ödənişlər bu tarixdə veriləcək
-
Magazin111:07
Görün Brilliant Dadaşova oğluna nə dedi: Yalvarmaqdan... - FOTO/VİDEO
-
Dünya10:56
Almaniya prezidenti İstanbulda hər kəsi təəccübləndirdi: Dönər kabab...
-
Nida Xəbər 10:16
General Mirzəyev və 40 məmura sanksiya təklif edilir - SİYAHI
-
Qarabağ 10:06
Araikin efirə getməyən müsahibəsi haqda sensasiyalı iddia: Nikol dərhal nə edib? - VİDEO