Qırmızı.az
Kinostudiyanın direktoru: "Əvvəl iş qoyun ortaya, sonra pul istəyin" – MÜSAHİBƏ
Müsahibimiz Müşfiq Hətəmovdu - Cəfər Cabbarlı adına “Azərbaycanfilm” kinostudiyasının yeni təyin olunmuş gənc direktoru.. Təyinat əmri üç gün əvvəl verilsə də, əslində iki aydi ki, bu vəzifəni icra eləyir. Artıq bəzi vacib işlər görməyə də macal tapıb. Məsələn, “Azərbaycanfilm” kinostudiyasının saytı hazırlanıb və istifadəyə verilib. Müsahibə zamanı da bir gözü saatda, bir qulağı telefonda idi. Amma suallarımıza mümkün qədər ətraflı cavab verdi, kinostudiya ilə bağlı növbəti planlarından danışdı.
- Müşfiq bəy, birinci sizi yeni vəzifəniz münasibətilə
təbrik eləyirəm.
- Təşəkkürlər.
- İkinci, kinostudiyanı hansı vəziyyətdə təhvil
aldınız?
- Gəlin, söhbətə belə başlamayaq. Niyə həmişə birinci nöqsanlarla
maraqlanırsınız?
- Mən sadəcə sual verdim. Nöqsanları siz yada
saldınız.
- Kinostudiyada artıq bir neçə film istehsalat prosesindədi. Bəzi
problemlər vardı. Onlar da həll olunub. Tezliklə yeni filmlər də
istehsalata buraxılacaq.
- Hansı filmlər tamamlanmaq üzrədi?
- Elxan Cəfərovun “Dolu” filmi montajdadı. Şamil Əliyevin “Çölçü”,
Ayaz Salayevin “Ehram TV” filmi tamamlanmaq üzrədi. Sonuncunun adı,
yəqin ki, dəyişəcək, “Ehram TV” olmayacaq. Mirzə Fətəli Axundov
haqqında filmin çəkilişləri başlayıb. Bir şeyi də qeyd eləyim.
Bundan sonra paralel olaraq həm də çəkiliş prosesi haqqında qısa
film çəkiləcək- yəni film haqqında film - və kinostudiyanın saytına
yerləşdiriləcək.
- Sayt gündəlik yenilənəcək, yoxsa statik
olacaq?
- Bəzi xırda-para işlər qalıb. İnşallah, onları da həll eləyəndən
sonra gündəlik yenilənən sayt olacaq. Kinostudiya ilə bağlı bütün
xəbərlər ən birinci orda çıxacaq.
- Kinostudiya direktoru kimi verdiyiniz ilk qərar nə oldu?
Yoxsa hələ vəziyyətlə tanış olursunuz?
- Yox, ilk verdiyim qərar köhnəni dağıtmadan müasir dövrün
tələblərinə uyğun istehsalat sistemi qurmaqdı. Bütün film
direktorları ilə görüşdüm, gələcəkdə filmlərin hansı sistemlə
istehsal olunacağını, layihələrin hansı formada qəbul ediləcəyini
müəyyənləşdirdik. Bundan sonra layihələr ssenari yox, sinopsis
şəklində qəbul olunacaq. Biz adətən, filmi çəkib qurtarandan sonra
başlayırıq fikirləşməyə ki, harda göstərək, necə yayaq, kimlər
baxacaq, kimlər baxmayacaq... Halbuki filmin gələcəyi, 30- 40%
ideyanın təsdiqi mərhələsində həll olunur - dünyada yayımı, hansı
prodüser mərkəzləri bizimlə əməkdaşlıq eləmək istəyər ə sair.. Siz
kinostudiyanin görünüşünə fikir verməyin. Burda çox yaxşı
mütəxəssislər var. Ancaq onlardan istifadə eləmək lazımdı. Mən bura
təyin olunandan iki sonra özüm üçün 70 sual hazırlayıb masamın
üstünə qoymuşam. Məsələn, suallardan biri belədi: “Azərbaycanda
istehsalat mexanizmini düzgün qurmaq üçün neynəmək lazımdı?”
Istedadlıları, ən yaxşıları seçmək... və keyfiyyət! Əgər o yetmiş
sualın hamısının cavabı tapılsa, düzgün iş mexanizmi qura
biləcəyik.
- Bu vaxta qədər ssenarilər Mədəniyyət Nazirliyinin
müsabiqəsində iştirak edirdi, istehsalata buraxılacaq layihələr
orda seçilirdi. Artıq bu iş kinostudiyada həyata
keçiriləcək?
- Yox, yox. Əvvəllər kinostudiya, bir qayda olaraq, nazirliyin
təklif elədiyi layihələri reallaşdırırdı. Ancaq indi bir istehsalat
müəssisəsi kimi çalışacağıq ki, Mədəniyyət Nazirliyinə həm də öz
layihələrimizi təklif eləyək. Düzdü, mən özüm nazirlikdən gəldiyimə
görə bəzən yoldaşlar gülürlər. Deyirlər, bunu niyə eləyirsən? Cavab
verirəm ki, bu bizə lazımdı.
- 90- cı illərin sonlarında milli kinematoqrafiya
pulsuzluqdan əziyyət çəkəndə Ayaz müəllim: “bu o qədər də pis
deyil. Kinoda ələnmə baş verəcək, təsadüfi insanlar gedəcəklər”
demişdi. Amma indi deyir ki, heç bir ələnmə olmadı, çünki kino
dövlətin büdcəsində qaldı.
- Ayaz müəllimin fikri ilə o qədər də razı deyiləm. Azərbaycanda
çoxlu özəl prodakşnlar yaranıb.
- Amma onlar da maliyyəni dövlətdən
istəyirlər.
- Çünki bizdə professional prodüserlər yox dərəcəsindədi. Bunun da
səbəbi prokatın yoxluğudu. Əgər prokat olsaydı, Ayaz müəllimin
dediyi təbii seçmə baş verəcəkdi. Əfsus ki, bizim o vaxtkı nəsil
kommersiya filmləri çəkmək istəmədi, müəllif filmlərinin istehsalı
davam elədi. Amma onları nə xaricdə alan oldu, nə də daxili
bazarda. Çünki bütün Sovet İttifaqında olduğu kimi bizdə də prokat
yox idi. İnanın ki, dövlət, son iyirmi ildə kinoya yardım
eləməsəydi, bəlkə Azərbaycanda bir nəfər də kino işçisi qalmazdı.
Doğrudu, bundan sui-istifadə eləyənlər də oldu. Amma əsas odur ki,
yeni nəsil gəlir. Mədəniyyət Nazirliyinin “Bu meydan, bu ekran”
layihəsi sayəsində nə qədər gənc üzə çıxdı... Sizin dostunuz Fehruz
Şamıyev də onlardan biridi.
- Bəli, Fehruzun “Yol” filmi keçən il “Bu meydan, bu ekran”
çərçivəsində çəkilən filmlərin arasında ən yaxşısı
idi.
- Yox, yox, tərifləməyin.
- Tərifləmirəm, bu həqiqətdi.
- Fehruz mənim dostumdu, amma.. Bunu belə də verin getsin.
- Baş üstə.
- Zarafat eləyirəm... Bəzən mənə deyirlər ki, pul azdı, çatmır. Mən
bu fikrin əleyhinəyəm. Əvvəlcə standartlara cavab verən yaxşı bir
iş qoyun ortaya. Sonra sizə nə qədər istəsəniz, pul verəcəklər.
- Yəni rəqabət yaratmaq lazımdı.
- Bəli, ortaya diqqətəlayiq heç bir iş qoymadan “pul ver” deyirik.
Bəs indiyə qədər verilənlərdən düzgün istifadə edə bilirikmi?!
Hollivud səviyyəsində texnika istəyirik. Bizim əksər
rejiossorlarımız həmin texnikadan düzgün istifadə eləməyi
bacarırmı? Ən böyük problemlərdən biri də budu. Biz milli kadrların
xarici həmkarları ilə birgə işləməsinə şərait yaratmalıyıq,
müştərək filmlər çəkməliyik. Hazırda bir neçə şirkətlə danışıq
aparırıq. Onlara Bakıda nümayəndəlik açmağı və və texnikalarını
bizə icarəyə verməyi təklif eləmişik. Yeri gəlmişkən, bu
təşəbbüsdən sonra kinostudiyanı texnika ilə təmin eləyən şirkətlər
40- 60% endirim eləyiblər.
- Nümayəndəlik necə fəaliyyət göstərəcək?
- Böyük bir şirkətin nümayəndəsi bütün texnikası ilə Bakıya
gələcək. Biz də onun avadanlığını icarəyə götürəcəyik.
- Bəs o texnikadan istifadə eləyən kadrlar?
- Onların bəziləri var. Olmayanları da hazırlayacağıq. Kinostudiya
təmirə çıxana qədər bizə hansı avadanlıqların lazım olduğunu
biləcəyik. Onlara uyğun kadrlar da hazırlanacaq. Kinostudiya işə
düşəndə həmin avadanlıqları öz kadrlarımız işlədəcək. Üstəlik bu
yaxınlarda filmlərin dünyaya yayılması ilə məşğul olan beynəlxalq
şöbəmiz də açılacaq.
- Yerli filmlərimizi dünyaya çıxartmaqdan danışdınız. Bunun
üçün birinci nə lazımdı?
- Birinci təşəbbüs.. Sonra beynəlxalq standartlara cavab
vermək.
- Yəqin ki, həmin standartlara filmin məzmunu da
daxildi?
- Məzmunu o qədər də deməzdim.
- Kiril Razaloqov Kinematoqrafçılar İttifaqındakı
mühazirəsində demişdi ki, Azərbaycan kimi balaca ölkələrin lokal
mövzularla, tarixi filmlərlə dünyaya çıxmaq şansı yoxdu. Bunun üçün
daha orijinal mövzular tapmalıdılar.
- Yox, tarixi filmlərlə də dünyaya çıxmaq mümkündü. Amma bunun elə
bir həllini tapmalıyıq ki, həm istənilən tamaşaçıya maraqlı olsun,
baxıb istirahət eləsin, həm də biz öz sözümüzü deyə bilək. Bizim
filmlərimizin ən böyük qüsurları nədi? Pafos. Ritm pozğunluğu.
Personajların danışıq tərzi. Bir dəqiqəlik hadisəni iyirmi dəqiqəyə
danışmaq. Halbuki dünyada hər şeyi sürət həll eləyir, hər şeyi...
Insanlar artıq informasiyanı o qədər sürətlə gözəl ötürür,
hadisənin elə gözəl bədii həllini tapırlar ki, film baxılir. Bizdə
ssenaridə hər şey yazılır. Bəzi rejissorlar da ssenaridə nə
yazılıbsa, onu da çəkir, əhvalata öz yozumunu vermir.
- Yeri gəlmişkən, bu yaxınlarda Atom Eqoyanın “Ararat”
filminə baxdım. Siz dediyiniz həmin bədii həll məsələsi orda da
var. Rejissor 15- ci il hadisələrini öz variantlarında təsvir edir.
Amma hadisələrin arasına, dialoqlara “ola bilsin, həqiqəti təhrif
eləyirəm. Ola bilsin, yalan danışıram, ancaq mən buna inanıram və
sona qədər inanacağam. Sizin isə öz işinizdi: istər inanın, istər
yox.” deyən eyhamlar atıb. Və bu fikri o qədər sadə tərzdə göstərir
ki, adam gözünü ekrandan ayıra bilmir.
- Əlbəttə. Hər şey rejissorun yozumundan asılıdı. Qarabağla bağlı
bizim də bəzi ideyalarımız var. Birini deyim. Qarabağda alban
kilsəsi var. Divarında daşdan yonulmuş alban xaçı, başında dəmir
qriqorian xaçı. Alban xaçının qriqorian xaçına necə keçdiyi barədə
bir film çəkmək olar. Əgər həmin dövr haqqında film çəksək,
mövzunun bədii həllini tapsaq, görün, dünyaya hansı prosesləri
açmış olarıq.
- Yəni heç kimi təhqir eləmədən...
- Bəli. Təhqir etmədən. Bizə “Qarabağ bizimdi” deyə qışqırmaq lazım
deyil. Onsuz da bunu hamı bilir. Sadəcə biz elə faktlara diqqət
çəkməliyik ki, ermənilər onlara etiraz eləyə bilməsinlər. Biz
“erməni günahkardı, cinayətkardı” deməyəcəyik, sadəcə tarixin bir
dönəmi haqqında danışacağıq.
- Yəni artıq saqqallı, vəhşi erməni obrazından uzaqlaşmaq
lazımdı.
- Onların bizim əleyhimizə danışmasına imkan verməməliyik. Bu
yaxınlarda mən Moskvada böyük bir tədbirdə iştirak edirdim. Gördüm
ki, afişada “Yallı” erməni rəqsi, Rəşid Behbudov da erməni
estradasının nümayəndəsi kimi yazılıb. Orda oturan erməni xanımdan
sual verdim ki, niyə bizim musiqiləri öz adınıza keçirirsiniz?
Xanım cavab verdi ki, bu mübahisəli məsələdi, bir fakt deyin. Elə
bildi ki, mən “yallı”dan, “tərəkəmə”dən danışacam. Amma mən
soruşdum ki, Rəşid Behbudov nə vaxtdan erməni olub? Qadın çaşdı və
anlaşılmazlıq olduğunu deyib aradan çıxdı. Müasir erməni gəncliyi
bu uydurma “böyük Ermənistan” ideyasının necə, hardan yarandığını
bilmir, fikirləri qarışıqdı. Biz bundan istifadə eləməyə
çalışmalıyıq. Ümumiyyətlə, artiq hər şeyə yüksək estetik münasibət
olmalıdı. Baxışlarımızı dəyişməliyik. Hər şeyə qarşı. Bizdə belə
potensial var. Məsələn, “Əli və Nino” layihəsi. Əgər orda
Azərbaycan mədəniyyətini önə çəkməyi bacarsaq, bu çox nailiyyət
olardı. Cünki “Əli və Nino” böyük layihədi və Azərbaycan üçün ciddi
təbliğat vasitəsinə bilər.
- Kinostudiya bu layihədə necə iştirak eləyəcək,
ümumiyyətlə, iştirak edəcəkmi?
- Bu məsələ hələ dəqiqləşdirilməyib. Odur ki, konkret bir söz deyə
bilmərəm. Amma onların nümayəndələri burda oldu. Bizim
mütəxəssislər onlara geyimlərlə, ornamentlərlə bağlı məsləhətlər
verdilər. Elə şeylər var ki, yalnız biz bacarırıq, elə şeylər də
var ki, yalnız onlar eləyə bilirlər. Ola bilsin, bizim dekorasiya,
geyim üzrə rəssamlarımız, bəlkə hətta musiqiçilərimiz də “Əli və
Nino” layihəsində iştirak elədi. Dediyim kimi, hələ layihə üzərində
iş getdiyinə görə belə detallar dəqiqləşdirilməyib.
Söhbətləşdi: Aygün Aslanlı
Publika.Az
-
Sosial19:35
Özünü öldürən sabiq pediatrın iş yoldaşı DANIŞDI: “Ailə məsələsi deyil..."
-
ABŞ19:25
Bayden Ukraynaya hərbi yardım haqqında qanunu İMZALADI
-
Rəsmi xronika18:40
Prezidentlər mətbuata bəyanatlarla çıxış etdilər - FOTO/YENİLƏNDİ
-
Hadisə18:33
Bakı hava limanında həyəcan siqnalı: Təyyarə qəza enişi etdi - FOTO
-
Sağlamlıq17:27
Yapon alimləri xərçənglə mübarizə üçün unikal vasitə hazırladı
-
Sosial17:00
Sabiq baş pediatrın intiharı ilə bağlı cinayət işi başlandı - Yeniləndi
-
Cənubi Qafqaz16:39
Ukrayna deputatları Vardanyanı biabır etdilər - Nobel Komitəsinə müraciət
-
MDB15:56
Həbs olunan generalla bağlı şok iddia: Boşanması uydurma olub