Tanınmış jurnalist vəfat etdi
Bizi izləyin

Qırmızı.az

Tanınmış jurnalist vəfat etdi

Tanınmış jurnalist Araz Zeynalovun anası Məryəm Həsənzadə 83 yaşında dünyasını dəyişib.

Publika.az xəbər verir ki, Mətbuat Şurası M.Həsənzadənin vəfatı ilə bağlı nekroloq yayıb. Nekroloqda deyilir:

“Məryəm Həsənzadə 1932-ci ildə Bakıda dünyaya göz açıb. Orta təhsilini paytaxtın 132 saylı məktəbində alıb. Azərbaycan tarixində xeyriyyəçiliyi ilə tanınan Hacı Zeynalabdin Tağıyev nəslinə mənsubluğu Məryəm xanımın xarakterinə xas nəciblik xüsusiyyətlərini şərtləndirib. Xüsusilə qadın həmkarları onun mənəvi keyfiyyətlərini özlərinə nümunə götürüb, yaradıcılıqlarına örnək sayıblar. Bu örnəyi zəngin həyat yoluna çevirən yaşantılar kifayət qədərdir.


M.Həsənzadə Bakı Dövlət Universitetinin jurnalistika fakültəsinin ilk qadın məzunlarından olub. Hələ tələbəlik illərində müxtəlif janrlarda qələmə aldığı yazılar respublika mətbuatında müntəzəm yer alıb.


Gənc jurnalistin milli mətbuatımızın aparıcı nümunələrindən olan “Xalq qəzeti”nə (keçmiş “Kommunist”) ədəbi işçi kimi qəbul olunması böyük etimad sayıla bilərdi. Məryəm xanım nəinki bu etimadı doğrultdu, eyni zamanda neçə-neçə jurnalist kadrların püxtələşmələrində məktəb rolunu oynadı. Nəşrdə 40 ilə yaxın müddətdə müxbir, mədəniyyət yazarı kimi fəaliyyət göstərdi.


M.Həsənzadənin yaradıcılıq dünyasında publisistik düşüncələr aparıcı xətti təşkil edib. Rəssam məharətilə cızdığı portretlərin görünməyən tərəflərinin təqdimatında duyulan sözün qüdrəti olub. Yorulmaq bilməyən səmərəli fəaliyyəti jurnalistə geniş oxucu auditoriyası qazandırıb. Müəllifin bir sıra qələm nümunələri “Ürəyəm, arzum sənsən” adlı oçerklər kitabında toplanıb. Azərbaycan Respublikası Ali Sovetinin Fəxri Fərmanı, dövrün sayılıb-seçilən mükafatlarından “Qızıl qələm”lə təltif olunan Məryəm xanım öz peşəsini övladlarına da sevdirib.


Azərbaycan Mətbuat Şurası Məryəm Həsənzadənin dünyasını dəyişməsini onun ailəsi ilə yanaşı, bütövlükdə milli mətbuatımız üçün böyük itki sayır. Mərhumun doğmalarına və əzizlərinə dərin hüznlə başsağlığı verir.


Allah rəhmət eləsin!

Oxumağa davam et
Reklam
Reklam

Gündəm