Rayonlara gedən yollardakı vəziyyət

Baş Dövlət Yol Polisi İdarəsi qarlı hava şəraitilə bağlı sürücülərə xəbərdarlıq edib.

Publika.az-a açıqlama verən sözügedən idarənin ictimaiyyətlə əlaqələr şöbəsinin rəisi, polis polkovniki Kamran Əliyev sürücülərə əlverişsiz hava şəraitilə əlaqədər diqqətli olmalarını tövsiyə edib.

O, hazırda bütün respublika əhəmiyyətli yollara qar yağdığını bildirib.

Kamran Əliyevin sözlərinə görə, Muğanlı-İsmayıllı yolunda güclü qar yağsa da, yolda hərəkət var.

"Respublikanın cənub bölgəsi, xüsusən Lənkəran-Astara regionu istisna olmaqla, hər yerdə qar yağır. Qeyd edilən bölgədə isə yağış yağır. Bəzi yerlərdə yağış leysan xarakterlidir. Hələlik heç bir yolda buzlaşma qeydə alınmayıb. Amma bu o demək deyil ki, sürücülər həmin magistrallarda rahat hərəkət edə bilərlər. Yollar buz bağlaya bilər. Ona görə də sürücülər maksimum dərəcədə ehtiyatlı olmalıdırlar".

Baş Dövlət Yol Polisi İdarəsi bir daha sürücülərin nəzərinə çatdırır ki, yağmurlu hava şəraiti avtomobilin asfalt yol üzərində sürüşməsinə, əyləc basıldığı zaman istər-istəməz avtomobilin müvazinətinin itirilməsinə və əyləc məsafəsinin uzanmasına səbəb olur. Bu baxımdan sürücülər ilk növbədə tərkibində rezin məmulatının faizi yüksək olan mövsümi təkərlərdən istifadə etməlidirlər:

"Sürücülərə belə havalarda xüsusi qış təkərlərindən istifadə etməyi tövsiyə edirik Tövsiyə olunur ki, texniki vəziyyəti nasaz olan, şinləri normalara cavab verməyən avtomobillərlə yola çıxmasınlar. Minik avtomobilləri üçün şinlərin protektorlarındakı naxışların qalmış hündürlüyü 1,6 mm, yük avtomobillərində 1 mm, avtobuslarda 2 mm, motosiklet və mopedlərdə isə 0,8 mm-dən az olmamalıdır. Həmçinin eyni ox üzrə müxtəlif naxışlı şinlərdən istifadə olunmamalıdır".

Vazeh