TQDK sədri AMEA prezidentini təkzib etdi

"Azərbaycan Milli Elmlər Akademiyasında (AMEA) magistr təhsili almaq istəyənlər mütləq ərizə verməli və TQDK-nın keçirdiyi imtahanda iştirak etməlidir".

Publika.az xəbər verir ki, bu barədə TQDK sədri Məleykə Abbaszadə jurnalistlərə açıqlamasında bildirib.

"Biz bu prosesə texniki ve metodiki kömək göstəririk. Lakin burada hüquqi məsələlər var. Hüquqi baxımdan "Təhsil haqqında" qanunda müəyyən dəyişikliklər olmalıdır, hüquqi-normativ baza müəyyənləşdirilməlidir. Bu, bizdən asılı olan məsələ deyil".

Təhsil qanunvericiliyinə görə, magistraturanı yalnız təhsil müəssisələrinin apara biləcəyini deyən TQDK sədri bildirib ki, elmi müəssisələrin magistraturası ilə bağlı qanunda heç bir maddə yoxdur. Bu dəyişikliklər baş tutandan sonra, təbii ki, qəbul da aparılacaq.

M.Abbaszadə qeyd edib ki, AMEA müəssisələrinə magistratura səviyyəsi üzrə qəbulun aparılması tarixi onlardan asılı deyil: "Magistraturaya qəbul imtahanının I mərhələsində iştirak edən şəxs üçün fərqi yoxdur ki, plan yerləri verilib, ya yox. Ancaq kimsə akademiyada magistratura oxumaq istəyirsə, onlara məsləhət görərdim ki, mütləq ərizə versinlər və onlar I mərhələdə iştirak etməlidirlər".

Qeyd edək ki, AMEA prezidenti Akif Əlizadə bu ilin fevralında Akademiyanın magistratura pilləsinə 7 ixtisas üzrə qəbul aparılacağını bildirmişdi.