• USD 1,7339 0,00% EUR 1,8516 0,00%
    • GBP 2,1859 0,00% RUB 0,0272 0,00%

ADU-nun tələbələri Bakının 36 məktəbində təcrübə keçəcək

ADU-nun tələbələri Bakının 36 məktəbində təcrübə keçəcək

Bu gün Azərbaycan Dillər Universitetinin (ADU) Pedaqoji və Filologiya və Jurnalistika fakültəsinin 2013-2014-cü tədris ilində Bakalavriat ali təhsil pilləsinin əyani və qiyabi təhsil alan IV kurs tələbələrinin pedaqoji təcrübəsinə həsr olunan pedaqoji konfrans keçirilib.

Bu barədə Publika.Az-a ADU-nun mətbuat xidmətindən məlumat verilib.

Konfransı giriş sözü ilə açan universitetin Elmi işlər üzrə prorektoru, professor Dünyamin Yunusov pedaqoji təcrübənin tələbələrin müəllim kimi formalaşmasında mühüm rol oynadığını deyib. Prorektor Azərbaycan Dillər Universitetinin hər cəhətdən ən öndə gedən universitet olduğunu bildirib. O, tələbələrə hər zaman öz fəaliyyətləri ilə universitetin adına layiq olmağı və pedaqoji təcrübənin bütün imkanlarından yararlanmağı tövsiyyə edib. ADU tələbələrinin hər zaman nümunəvi olduqlarını deyən D. Yunusov pedaqoji təcrübəyə gedən tələbələrə uğurlar arzulayıb.

Pedaqogika kafedrasının müdiri, professor Nurəddin Kazımov çıxışında respublikada xarici dil müəllimlərinə hər zaman ehtiyac olduğunu bildirib. O, müəllim peşəsinə yiyələnməklə yanaşı, hər bir gəncin vətəni təmsil edən yüksək ixtisaslı Azərbaycan vətəndaşı olmaqlarını tövsiyyə edib:

“Müəllim olmaq vəzifədir, hər bir tələbə bu vəzifəylə nəyə xidmət etdiklərini yaxşı bilməlidir”-deyən professor N.Kazımov tələbələrin respublikaya xidmət edə biləcək fəal Azərbaycan vətəndaşı olmaq amalınına xidmət etməli olduqlarını bildirib.

Linqvodidaktika kafedrasının müdiri, professor Gülnar Hüseynzadə əsas məqsədin peşə keyfiyyətinə malik olan mütəxəssislər hazırlanması olduğunu bildirib. O, pedaqoji təcrübədə yaranan problemlərin həlli üçün kafedranın hər zaman tələbələrin ixtiyarında olduğunu bildirib və uğurlar arzulayıb.

Psixologiya kafedrasının müdiri, dosent Ceyhun Alıyev pedaqoji təcrübənin psixoloji tərəflərindən bəhs edib. O, universtitetin pedaqoji təcrübənin təşkilinə xüsusi önəm verdiyini bildirib. C. Alıyev vurğulayıb ki, prosesin uğurla həyata keçirilməsində hazırlıqların yüksək səviyyədə təşkili, pedaqoji təcrübədə iştirak edən şəxslərin qarşılıqlı münasibəti və tələbələrin təhkim olunduğu məktəblərin göstərdikləri münasibət əsas rol oynayır. O, bugündən etibarən tələbələrin üzərlərinə yeni müəllimlik rolunu götürdüklərini bildirib. O, “Rolu yaxşı oynamaq üçün yaxşı mənimsəmək lazımdır” sözlərini də əlavə edib.

Pedaqoji fakültənin dekanı, professor Əfqan Abdullayev tələbələrdə peşə təəssübkeşliyi olmasının önəmini bildirib. Dekan Bakı şəhər Təhsil İdarəsi ilə universitetin müqavilə bağladığını və bu müqaviləyə əsasən tələbələrin təhkim olunduqları məktəblərin artıq universitetin baza məktəbləri olduğunu söyləyib.

Universitet üzrə Pedaqoji təcrübə rəhbəri Bəxtiyar Həmzəyev isə çıxışında təcrübənin mahiyyətindən və qaydalarından danışdı. Pedaqoji təcrübə rəhbəri orta məktəblərin daxili nizam-intizam qaydalarına ciddi riayət etməyin vacibliyini vurğulayıb. Qiymətləndirmə mexanizminə də toxunan B. Həmzəyev tələbələrin vəzifələri haqqında da məlumat verib.

Qeyd edək ki, təcrübə martın 17-dən mayın 24-dək davam edəcək. Pedaqoji fakültədə əyani təahsil forması üzrə 423, qiyabi təhsil forması üzrə 63 tələbə, Filologiya və Jurnalistika fakültəsinin 143 tələbəsi Bakının 36-a yaxın orta ümumtəhsil məktəbində təcrübə keçəcək.

Xəbər lenti

DAHA ÇOX XƏBƏR