Ümumdünya Turizm Təşkilatının 100-cü iclası keçirilir

Bu gün Xorvatiyanın Rovinj şəhərində Birləşmiş Millətlərin Ümumdünya Turizm Təşkilatının İcraiyyə Şurasının 100-cü iclası işinə başlayıb. Tədbirdə Azərbaycan Respublikasının mədəniyyət və turizm naziri Əbülfəs Qarayevin rəhbərlik etdiyi nümayəndə heyəti iştirak edir.

Nazirlikdən Publika.az-a verilən məlumata görə, açılış mərasimində iclasın sədri Yamaykanın turizm naziri, ev sahibi Xorvatiyanın turizm naziri, UNWTO-nun baş katibi Taleb Rifai, keçmiş baş katiblər, Turizm Etika Komitəsinin sədri çıxış ediblər. Açılış mərasimindən sonra tədbirin gündəliyi təsdiqlənib.

Səfər çərçivəsində mədəniyyət və turizm naziri UNWTO-nun baş katibi Taleb Rifai ilə ikitərəfli görüş keçirib və təşkilat ilə ölkəmiz arasında əməkdaşlığın vəziyyəti barədə fikir mübadiləsi aparılıb. Nazir Əbülfəs Qarayev UNWTO–nun ölkəmizdə keçirilmiş Üçüncü Ümumdünya Mədəniyyətlərarası Dialoq Forumuna yüksək tərəfdaşlığına görə baş katibə təşəkkürünü bildirib.

Məlumat üçün bildiririk ki, "Turizmdə innovasiya: mövsümiliyə üstün gəlməyin yeni yolları" mövzusunda 2 gün davam edəcək sessiya zamanı müzakirə olunacaq əsas məsələlərdən biri də 2016-2017-ci illərdə Dünya Turizm Gününün mövzuları və keçiriləcəyi yerin müəyyən olunmasıdır.

Gülnar