Su orucu nədir, faydaları və zərərləri nədən ibarətdir?
Bizi izləyin

Sağlamlıq

Su orucu nədir, faydaları və zərərləri nədən ibarətdir?

Su orucu son illərin ən populyar pəhrizidir. Su orucu ilə bağlı aparılan son araşdırmalar onun sağlamlıq üçün faydalı olduğunu göstərsə də, bu barədə elmi işlər yetərli səviyyədə deyil.

Publika.az bu yazıda oxucuları su orucunun faydalı və zərərli tərəfləri ilə tanış edib.

Bir qrup alimlər hesab edir ki, su orucu daxili orqanların, dərinin təmizlənməsinə və yağların yandırılmasına təsir edir. Digər qrup isə orqanizmə ciddi zərər verdiyi qənaətindədir.

Su orucu necə tətbiq edilir?

Gün ərzində sudan başqa heç nə yemək və içmək olmaz. Oruc 24 saat ilə 72 saat davam edə bilər. Orucu 3 gündən artıq tutmaq istəyirsinizsə, bu, mütləq həkim nəzarətində aparılmalıdır. Su orucu hər kəsin orqanizmi üçün əlverişli olmaya bilər.

Su orucunun faydaları nələrdir?

Bədən ac qalanda enerji mənbəyi kimi yağlardan istifadə edir. Bu səbəbdən orqanizmdə toplanan yağlar yandırılmağa başlanır və artıq çəki sürətlə azalmağa doğru gedir.

Bununla belə pəhriz mütəxəssisləri su orucu ilə sürətlə arıqlamaq əvəzinə sağlam qidalanmaqla, düzgün yollarla tədricən və daimi məşqlər sayəsində arıqlamağı məsləhət görür.

Digər araşdırmalarda suyun bir çox xroniki xəstəlik riskini azaltdığı iddia edilir. Orta əsrlər dövrünün ən böyük təbiblərindən olan İbn Sinanın da xəstələrinə 3 günlük şəfa orucunu tövsiyə etdiyi barədə fikirlər mövcuddur. Bundan başqa, bəzi cəmiyyətlərdə su orucunun nəinki fizioloji təmizlənmə, psixoloji təmizlənmə funksiyasını yerinə yetirdiyinə dair inanclar var.

Kanserogen maddələr və s. qeyri-sağlam qidalar sayəsində orqanizmə daxil olan toksik maddələrin su orucu vasitəsiylə təmizləndiyi qulağa xoş gəlsə də, bu məsələlərdə kifayət qədər elmi işlər yoxdur. Odur ki, dəqiq nəticələrə gəlmək üçün elmi araşdırmalar hələ davam etdirilməlidir.

Kimlər su orucu tutmalı deyil?

Su orucu hər kəs üçün deyil. Xüsusilə yaşlılar və 18 yaşından aşağı yaş kateqoriyasına aid olan insanlar su orucu tutmamalıdır. Həmçinin hamilə və ya uşağa süd verən qadınlara, ürək xəstəlikləri olanlara, 1-ci tip diabet və miqreni xəstələrinə tövsiyə edilmir. Müntəzəm olaraq dərman istifadə edənlər mütləq həkimə məsləhətləşməlidir.

Su orucunun mümkün zərərləri:

Tədqiqatlar göstərib ki, su orucu həddən artıq arıqlamağa gətirib çıxara bilər. Lakin itirilən çəkinin çoxunu su, karbohidrat və əzələlər təşkil edir. Bu səbəbdən su orucu bitdikdən sonra əzələ kütləsində xeyli azalma yarana bilər. Digər zərərləri aşağıdakılardır:

İnsulin müqaviməti və diabet riskini artır.

Mineral və vitamin çatışmazlığına səbəb olur.

Halsızlıq, yorğunluq və əsəbilik yaradır.

Su orucu qısa müddətli tutulmasına baxmayaraq, bəzi xəstəliklərə pis təsir edə bilər.

Podaqra xəstəliyi: Su orucu podaqra hücumları üçün risk faktoru olan ürik turşu istehsalını artıra bilər.

Diabet: Uzun müddətli aclıq tip 1 və tip 2-ci diabetdə mənfi fəsadlara səbəb olur.

Xroniki böyrək xəstəliyi: Su orucu xroniki böyrək çatışmazlığı olan xəstələrə daha çox zərər verə bilər.

Mədə qıcqırması: Gün ərzində heç nə yemədikdə mədə turşu ifraz etməyə başlayır və bu halda mədə qıcqırması baş verir.

Aytən

Oxumağa davam et
Reklam
Reklam

Gündəm