• USD 1,7430 0,00% EUR 1,8487 0,00%
    • GBP 2,1929 0,00% RUB 0,0275 0,00%

Ürəyin sağlam olması üçün 7 qızıl qayda

Ürəyin sağlam olması üçün 7 qızıl qayda

Hər il 12-18 aprel tarixlərində dünyada Ürək sağlamlığı həftəsi qeyd edilir.

Avropada 75 yaşdan öncə baş verən ölümlərin 42 faizinin ürək xəstəlikləri nəticəsində baş verdiyi məlumdur.

Publika.az erkən yaşda ölümə səbəb olan xəstəliklər arasında birinci olan iflic, infarkt kimi problemlərdən xilas olmağın yollarından yazıb.

Ürək-damar xəstəlikləri gənc, yaşlı hər kəsi təhdid edir. Ən çox rast gəlinən iflicdir. İflic beyin damarlarının daralması nəticəsində baş verir.

Türkiyənin tanınmış həkimlərindən professor Oğuz Taşdemir ürək xəstəliklərindən qorunmağın yollarından bəhs edib:

“Xəstəliyə səbəb olan faktorlar aradan qaldırılsa, ürək və damar xəstəlikləri səbəbindən ölənlərin sayında 50 faiz azalma müşahidə edilər.

Bu tip xəstəliklərdən qorunmaq üçün hələ uşaqlıq dövründən müəyyən tədbirlər almaq lazımdır”.

Doktor Oğuz Taşdemir aşağıdakı qaydalara əməl etdiyimiz təqdirdə ürək xəstəliklərindən qoruna biləcəyimizi vurğulayıb:

1.Siqaretdən uzaq durun!

Siqaret çəkməməklə iş bitmir. Siqaret içilən məkanlardan da uzaq durmaq lazımdır.

2. Pəhriz saxlayın!

Qida menyusunda meyvə və tərəvəz, həmçinin dəniz məhsulları üstünlük təşkil etməlidir.

Doymuş yağlar əvəzinə doymamış yağ turşuları ehtiva edən qidalar yeyilməlidir. Doymuş yağlardan uzaq durmaq üçün hazır qidaları menyudan çıxarmaq vacibdir.

Gündəlik duz qəbulu 5 qramı keçməməlidir.

Gündə ən az 30-45 qram lifli qida, 200 qram meyvə və tərəvəz yemək lazımdır. Qida menyusunda mümkün olduğu qədər çox çeşid olmalıdır. Hər gün eyni meyvə və tərəvəzi yemək fayda verməz.

Spirtli içkilərdən imtina edilməlidir.

3.Hərəkət edin!

Hərəkətli həyat tərzi keçirənlərdə ürək xəstəliklərinə yaxalanma riski azalır.

Sağlam insanlar həftədə ən az 5 saat (gündə 30-60 dəqiqə) idman etməlidirlər.

4.İdeal kiloda qalın!

Hər kəs öz ideal kilosunu hesablamalı və kökəlməməyə çalışmalıdır. Çünki ideal kiloda qalan insanda təzyiq aşağı olur, qandakı yağ miqdarı azalır.

Belin diametri qadınlarda 80 – 88 santimetri, kişilərdə isə 94-102 santimetri keçməməlidir. Köklük ürək xəstəliklərindən ölüm riskini artıran faktordur.

5. Təzyiqi normada saxlayın!

Qan təzyiqinizi yüksəldən davranışlardan və qidalardan uzaq durun.

6.Xolesterini nəzarətdə saxlayın!

Əgər xolesterin səviyyəniz yüksəkdirsə, həkim tövsiyəsilə özəl pəhrizə başlamalısınız.

7. Şəkər xəstəliyindən qorunun!

Şəkər xəstələrinin həm də ürək problemlərindən əziyyət çəkməsi halları son illərdə sürətlə artıb.

Şəkər xəstələrində qan şəkərinin səviyyəsi heç vaxt normal həddi keçməməlidir.

Ləman Sultan

Xəbər lenti

DAHA ÇOX XƏBƏR