Katarakta riskini azaldan vitamin

E vitamininin katarakta riskini azaltdığı məlum olub. Çinin Çinqdao Universitenin elm adamları 250 min insanın iştirakı ilə həyata keçirilən araşdırma sayəsində E vitaminin bir çox göz xəstəliyinin, əsasən də kataraktanın çarəsi ola biləcəyini müəyyənləşdiriblər.

Düzdür, bu vitamin artıq yaranmış kataraktaya elə də güclü təsir edə bilmir. Ancaq insan E vitamini ilə zəngin qidalar yeyərək kataraktaya yaxalanma riskinizi 27 faiz azalda bilər.

Alimlər vurğulayırlar ki, bunun üçün gündəlik E vitamini ehtiyacını qarşılamaq kifayət deyil. Katarakta riski orqanizmə gündəlik normadan 7 miliqramdan daha çox E vitamini daxil olduqda azala bilər.

Soya lobyası, quru lobya, göyərtilər, əsasən də ispanaq, çərəzlər, avokado, günəbaxan və qarğıdalı yağı bol miqdarda E vitamini ehtiva edir.

Qeyd edək ki, katarakta yaşla bağlı olaraq ortaya çıxan göz xəstəliklərindən biridir. El arasında buna mirvari suyu deyilir. Xəstəliyin korluğa səbəb olma ehtimalı yüksəkdir.

Ləman Sultan