• USD 1,7339 0,00% EUR 1,8651 +1,90%
    • GBP 2,2098 +0,44% RUB 0,0271 +0,37%

Rixard Vaqnerin "Mənim həyatım" kitabının təqdimatı olub

Rixard Vaqnerin "Mənim həyatım" kitabının təqdimatı olub

Heydər Əliyev Fondu və Heydər Əliyev Mərkəzinin birgə layihəsi çərçivəsində dahi alman bəstəkarı Rixard Vaqnerin (1813-1883) "Mənim həyatım" kitabı Azərbaycan dilində nəşr olunub.

Trend-in məlumatına görə, bu gün Heydər Əliyev Mərkəzində kitabın təqdimat mərasimi keçirilib.

Mərasimdə nümayiş olunmuş videotəqdimatda Heydər Əliyev Fondunun Azərbaycan mədəniyyətinin inkişafı və dünyada tanıdılması, eyni zamanda, dünya mədəniyyətinin Azərbaycanda təbliği istiqamətində fəaliyyətinə qısa nəzər salınıb, R.Vaqnerin "Mənim həyatım" kitabının Azərbaycan dilində nəşr olunması layihəsi barədə məlumat verilib.

Almaniyanın Azərbaycandakı səfiri Haydrun Tempel tədbirdə çıxışı zamanı Heydər Əliyev Fonduna və Heydər Əliyev Mərkəzinə bu tədbirin təşkilinə görə təşəkkürünü bildirib: "Rixard Vaqnerin gözəl və mürəkkəb əsərinin Azərbaycan dilinə tərcümə olunması əla ideyadır. Rixard Vaqnerin sağlığında bu əsərin cəmi 25 nüsxəsi mövcud idi. Ondan bizə çox gözəl miras - musiqiləri, yaradıcılığı, gözəl əsərləri qalıb".

O, qeyd edib ki, R.Vaqnerin Azərbaycan dilinə tərcümə olunan "Mənim həyatım" kitabı yalnız avtobioqrafik deyil, həmçinin XIX əsrin kaleydoskopudur: "XX əsrin əvvəllərində Vaqnerə məhəbbət çox böyük idi. Bilirəm ki, o dövrdə Azərbaycanda da ona məhəbbət çox yüksək idi. 1920-ci ildə Bakıda onun operaları təqdim olunmuşdu. Vaqner alman idi, ancaq o, dünya mədəniyyətinin dahisidir. Çox şadam ki, bu kitabla bir çox azərbaycanlı tanış olacaq".

Azərbaycan Respublikasının Xalq Artisti, Əməkdar İncəsənət Xadimi, bəstəkar Musa Mirzəyev bildirib ki, R.Vaqner öz sözünü demiş sənətkarlardandır: "Azərbaycanda Vaqner musiqisinə həmişə böyük diqqət olub, əsərləri geniş ifa olunub. Hələ İkinci Dünya müharibəsi başlamamışdan əvvəl Azərbaycan Dövlət Akademik Opera və Balet Teatrının səhnəsində Vaqnerin "Loenqrin" operası qoyulmuşdu. Rixard Vaqnerin "Mənim həyatım" əsərinin Azərbaycan dilində çap olunması böyük hadisədir. Bu layihənin həyata keçirilməsinə görə Heydər Əliyev Fonduna, Fondun prezidenti Mehriban xanım Əliyevaya minnətdarlığımı bildirirəm".

R.Vaqnerin Azərbaycan dilində "Mənim həyatım" kitabının redaktoru, Azad Azərbaycan Teleradio Kompaniyasının prezidenti Vüqar Qaradağlı təkcə dahi alman bəstəkarı və mütəfəkkiri R.Vaqnerin "Mənim həyatım" kitabımın nəşrinə görə deyil, həm də bütövlükdə gördüyü irimiqyaslı layihələrə, həyata vəsiqə verdiyinə görə Heydər Əliyev Fonduna, Fondun prezidenti Mehriban xanım Əliyevaya dərin təşəkkürünü bildirib: "Bildiyiniz kimi, ötən il YUNESKO tərəfindən "Vaqner ili" elan olunmuşdu. Hər zaman dünya mədəni irsinə hörmət və qayğı ilə yanaşan Heydər Əliyev Fondu da bu mədəniyyət hadisəsinə münasibət bildirərək böyük alman bəstəkarı Rixard Vaqnerin xatirələrini Azərbaycan dilinə tərcümə edib onu nəfis şəkildə nəşr etdirməklə öz töhfəsini verdi. Rixard Vaqnerin "Mənim həyatım" kitabı yalnız bir dühanın ömür kitabını və yaradıcılq fəaliyyətini nəql edən memuar deyil, həm də öz dövrünün bədii, eyni zamanda sənədli təsviridir. Bu əsərin özəlliklərindən biri də odur ki, dahi Rixard Vaqner ömrünün bütün mərhələlərinin ən yaddaqalan məqamlarını özündə cəmləyə bilmişdir. İnanırıq ki, bu kitab Azərbaycan dilində ilk müfəssəl mənbə kimi Vaqner musiqi xəzinəsindən bəhrələnmək üçün geniş imkanlar yaradacaq, müasir musiqi və bütövlükdə sənət həyatımızın dəyərli hadisəsi kimi də yadda qalacaqdır".

Təqdimat mərasimində Əməkdar İncəsənət Xadimi Fəxrəddin Kərimovun dirijorluğu ilə Üzeyir Hacıbəyli adına Azərbaycan Dövlət Simfonik Orkestri R.Vaqnerin əsərlərindən parçalar da ifa edib.

"Mənim həyatım" kitabı R.Vaqnerin 200 illiyi münasibətilə çap olunub. Nəfis nəşr müəllifin üç hissədən ibarət memuarlarını əhatə edir. Oxucular kitabda böyük bəstəkar, opera sənəti islahatçısı, yazıçı və mütəfəkkir R.Vaqnerin keşməkeşli ömür yolu ilə tanış ola biləcəklər. "Mənim həyatım"da müəllifin uşaqlığı, sənətə, musiqiyə olan sevgisinin formalaşması prosesi, gənclik macəraları, List, Berlioz, Mendelson, Spontini kimi bir çox böyük bəstəkar və musiqiçilərlə dostluğu, münasibətləri, sonradan ona ölməzlik qazandıran yaradıcı, bəzən ziddiyyətli fikirləri, "Loenqrin", "Uçan hollandiyalı" kimi klassik musiqi şedevrlərinin tarixçələri əksini tapıb.

Kitab R.Vaqnerin Azərbaycan dilində nəşr olunmuş ilk əsəri kimi də qiymətlidir. Vaqner yaradıcılığının pərəstişkarları və bütövlükdə ciddi musiqi ilə məşğul olan peşəkarlar üçün dəyərli mənbə olan bu nəşr, eyni zamanda, rəvan dili və təhkiyəsi ilə bütün oxucular üçün maraqlıdır.

Kitab Azərbaycan-Avropa, Azərbaycan-Almaniya mədəni əlaqələrinin inkişafına qivmətli töhfə kimi dəyərləndirilə bilər.

R.Vaqnerin nəvəsi Eva Vaqner bu layihənin reallaşdırılmasına görə Heydər Əliyev Fondunun prezidenti Mehriban Əliyevaya təşəkkürünü bildirib. R.Vaqner haqqında iki kitabın müəllifi, yazıçı Ursula Oehme, Rixard Vaqner Muzeyinin direktoru Mariya Berq, Beynəlxalq Rixard Vaqner Fondunun vitse-prezidenti Tomas Krakov dahi bəstəkarın memuarlarının Azərbaycan dilində nəşrini önəmli hadisə, R.Vaqnerin 200 illiyinə dəyərli hədiyyə kimi qiymətləndiriblər.

Qeyd edək ki, YUNESKO tərəfındən 2013-cü il "Rixard Vaqner ili" elan olunmuşdu.

Xəbər lenti

DAHA ÇOX XƏBƏR