Tabloid.az
“Özünə hörmət edən oğlan erotik film çəkməz” məsələsi rejissorları üz-üzə qoydu
Həmkarları rejissor Samir Qulamovun
Publika.az-a müsahibəsində səsləndirdiyi fikirlərə
münasibət bildiriblər. Qeyd edək ki, Qulamov müsahibəsində
açıq-saçıq səhnələrin əleyhinə olduğunu bildirmişdi:
“Özünə hörmət edən oğlan erotik film çəkməz. Həyatımızda olan bütün
təbii ehtiyacları filmə gətirsək, onda gərək ayaqyoluna olan
ehtiyacı da utanmadan lentə alaq. Axı o da təbii ehtiyacdır”.
Tanınmış aktyor və rejissor Qurban Məsimov bildirib ki, erotik
film çəkmək, kadrda yarıçılpaq qadın və ya kişi göstərmək deyil.
Məsimov hesab edir ki, təsvir yüksək estetika və bədiilik təcəssümü
olmalıdır. Həmçinin bunu oynamağı bacaran artist və çəkməyi bacaran
operator, işıq mühəndisi, rejissor yüksək estetik zövqə malik
olmalıdır:
“Filmdə və ya tamaşada erotik səhnələrin çəkilməsini özünə
hörmətsizlik kimi qəbul edən yaradıcı insanlar daha çox mental
düşüncəyə sığınır. Bunu da qəbul etmək olar. Hər bir yaradıcı
şəxsin erotikaya və ya erotikliyə öz münasibəti ola bilər. İran
kinosunda belə səhnələr yoxdur. Amma rejissorlar bunu digər
rəmzlərlə uğurla əvəz edirlər. Digər ölkələrdə isə ehtiyac olduqda,
buna əl atırlar”.
Aktyor-rejissorun qənaətinə görə, filmlərdə, tamaşalarda erotik
səhnələrin verilməyi kommersiya faktoru ilə də bağlıdır:
“Bir aktyor və ya aktrisanın gözəl bədəni varsa, prodüserlər bazar
üçün onun filmdə soyunmağını, öpüşməyini istəyirlər. Bu,
tamaşaçının təxəyyülünə yönələn psixoloji aktdır. Mən dünyəviliyi
qəbul etdiyim kimi, mentalitetin də tərəfindəyəm. Hər halda,
yaradıcı şəxs istədiyini və asılı olduqlarının tələbini yerinə
yetirmək kimi qızıl orta xətdə fəaliyyət göstərir. Rejissorun
rəssam duyğusu yoxdursa, çəkdiyi erotika porno olacaq”.
Əməkdar incəsənət xadimi, Gənc Tamaşaçılar Teatrının baş
rejissoru Bəhram Osmanov isə hesab edir ki, erotika 30 il əvvəl
daha geniş yayılıb və bir çox azərbaycanlı rejissorlar da bu
variantı sınaqdan keçiriblər:
“Mən onun tərəfindəyəm ki, şəhvət teatrda və ekranda başqa cür
göstərilsin. İstər tamaşada, istər filmdə elə etmək lazımdır ki, bu
başa düşülsün, amma çılpaqlıq olmasın.Tamaşaçıya göstərmək yox,
başa salmaq lazımdır”.
B.Osmanov son vaxtların ən çox müzakirə olunan tamaşalarından
hesab edilən”Qatil” barədə də fikrini bildirib:
”Qatil”in ilk quruluşu daha çox xoşuma gəlmişdi. İndiki
variantından xəbərsizəm. Hər kəsin həyatı anlamaq bacarığı var. Hər
kəs də öz aləmində haqlıdır. Əsas obyekti göstərməkdir, özünü
yox”.
B.Osmanovun sözlərinə görə, onun quruluş verdiyi “Müharibə”
tamaşası bu baxımdan daha uğurludur:
“Hər bir şeyin ekvivalentini tapmaq lazımdır. “Müharibə”dən qəddar
və əxlaqsız tamaşa yoxdur. Amma o tamaşaya baxan bir adam da narazı
getmir. Çünki burda hər şeyin estetik ekvivalenti tapılıb. Ona görə
də əvvəlcə tamaşaçının qəlbinə, sonra beyninə təsir edir və
göstərilir ki, belə yaşamaq olmaz”.
Əməkdar artist, aktyor-rejissor Nicat Kazımov isə bildirib ki,
onun heç vaxt erotik film çəkmək fikri olmayıb. Amma əməkdar artist
bu qənaətdədir ki, tamaşanın içində lazım olan yerdə etik normaları
gözləmək şərtilə buna yol vermək mümkündür:
”Pəri Cadu”, “Kabuslar”, “Kölgə” tamaşalarında belə nüanslar var.
Lakin hər tamaşada bir forma verməyə çalışmışam erotikliyə.
Məsələn, birində rəqslə, digərində ayrı cür nələrsə etmişəm ki,
zövq oxşasın. Lazımlı və yerində olan hər şey maraqlıdır. Lazım
deyilsə, “belə bir səhnə olmalıdır” deyib erotikaya yol vermək
olmaz. Bəlkə, kimsə piar üçün lazım oldu-olmadı belə səhnələrə yol
verir. Şəxsən mən tərəfdarı deyiləm. Səhnə səhnədir, real həyat
deyil. Səhnədəki istənilən epizodda bədiilik olanda gözəldir,
olmayanda iyrəncdir”.
İntiqam Valehoğlu
-
Region09:20
Tavuşda etiraz başladı: Ermənilər İrəvan-Tbilisi yolunu bağladılar
-
Ekopublika.az08:35
Azərbaycanda yumurta kəskin ucuzlaşdı - SƏBƏB
-
Nida Xəbər 07:50
Blinken Azərbaycanın kəndlərinin qaytarılması ilə bağlı razılaşmanı alqışladı
-
Magazin107:25
Azərbaycanlı aktrisa əzələlərini nümayiş etdirdi - FOTOLAR
-
İdman03:18
“Mançester Yunayted”in ən seksual azarkeşi - FOTOLAR
-
İdman01:45
Məşhur kluba ağır cəza - 18 xalı silindi
-
Sosial01:01
Azərbaycana qaytarılan dörd kəndin sakinləri DANIŞDILAR - VİDEO
-
Qoroskop00:31
Günün qoroskopu: köklü yeniliklər başlanır