• USD 1,7339 0,00% EUR 1,8651 +1,90%
    • GBP 2,2098 +0,44% RUB 0,0271 +0,37%

Vüsal Murtuzəliyev: “Rejissor tamaşaya, filmə quruluş verdiyi kimi, insan da öz həyatına quruluş verməlidir“ - FOTOLAR

Vüsal Murtuzəliyev: “Rejissor tamaşaya, filmə quruluş verdiyi kimi, insan da öz həyatına quruluş verməlidir“ - FOTOLAR

- Bugünlərdə Moldovodan səfərdən qayıtmısınız. Səfər nə ilə bağlı idi?


- Səfərimiz “Teatr. Çexov. Yalta” IV Beynəlxalq Teatr Festivalı ilə bağlıdır. Festivalda MDB dövlətləri iştirak edirdi. Keçən il Moskvadan komissiya gəlmişdi. Onlar Azərbaycan Dövlət Akademik Milli Dram Teatrının səhnəsində Uilyam Şekspirin “On ikinci gecə, yaxud hər nə istəsəniz” adlı komediyası əsasında hazırlanmış tamaşaya baxdılar və müsbət rəylərini bildirdilər. Daha sonra teatrının kollektivi ilə Moldovanın paytaxtı Kişenyov şəhərinə getdik.

Bu ayın 6-dan 13-dək Kişenyovda Gənclərin Teatr Forumu keçirildi. MDB ölkələrinin beynəlxalq humanitar əməkdaşlıq fondunun, Moldova Respublikasının Mədəniyyət Nazirliyinin, Beynəlxalq Teatr Xadimləri Konfederasiyasının, A.P.Çexov adına Beynəlxalq Teatr Festivalının, Kişenyov meriyasının və Moldova Teatr Xadimləri İttifaqının birgə təşkil etdikləri forumda Gürcüstan, Rusiya, Özbəkistan, Latviya, Ukrayna, Litva, Belarusiya, Moldova, Qazaxıstan, Qırğızıstan teatrları ilə yanaşı Azərbaycan teatrı da iştirak edirdi.

Forumda Azərbaycanı Mədəniyyət və Turizm Nairliyinin, Akademik Milli Dram Teatrının və Teatr Xadimləri İttifaqının birgə layihəsi olan “On ikinci gecə və ya hər nə istəsəniz” tamaşası təmsil edirdi. U.Şekspirin eyniadlı komediyası əsasında hazırlanan tamaşanın bədii rəhbəri Azərbaycan Respublikasının xalq artisti Azər Paşa Nemət, quruluşçu rejissorları Vüqar Əhmədov və Fərid Əhmədovdur.

Tamaşada əməkdar artistlər Elşən Rüstəmov, Məsmə Aslanqızı, Ayşad Məmmədov, aktyorlar Anar Heybətov, Elnur Məmmədov, Vüsal Murtuzəliyev, Aslan Şirinov, Vüsal Mustafayev, Rəşad Bəxtiyarov, Ellada Əhmədova, Nigar Güləhmədova və Fəridə Əliyeva çıxış edidirlər. Tamaşa iyunun 10-da M.Eminesku adına Milli Teatrın səhnəsində nümayiş olundu. Forumda Azərbaycandan rejissor Vüqar Əhmədov, rəssam Fərid Əhmədov, teatşünaslar Elçin Cəfərov və Aygün Süleymanova, dramaturqlar İsmayıl İmanov və Şəbnəm Xeyrulla iştirak edirdilər.

Satirik üslubda olan və tam müasir formada qurulan tamaşanın əsas mövzusu sevgidir. Tamaşada mənim əsas canlandırdığım “Ser Edru Equçik” obrazı idi. Həmin obrazın qəhrəmanı varlı-dövlətli zadəgandır. Amma buna baxmayaraq o, qorxaqdır, axmaqdır. İnsanlar həmişə ona ciddi yanaşmırlar, onu gülüş vəziyyətinə salırlar.

- Hazırda yaradıcılıq fəaliyyətiniz nə ilə bağlıdır?

- Azərbaycan Mədəniyyət və İncəsənət Universitetinin aktyorluq fakültəsini bitirmişəm. Amma aktyorluq fəaliyyətimi davam etdirməmişəm. Akademik Milli Dram Teatrına isə həmin tamaşa üçün dəvət aldım. Aktyorluq fəaliyyətimin ilk teatr tamaşası məhz U.Şekspirin “On ikinci gecə, yaxud hər nə istəsəniz” adlı komediyası oldu. Hazırda televiziyada dublaj sahəsində çalışıram və seriallara çəkilmək üçün dəvət alıram.

Hazırda ATV telekanlında yayımlanan “Sirr” serialına dəvət almışam. Artıq 7-ci seriyadan sonra serialda görünməyə başlayacağam. Tamaşaçılar serialda məni ilk olaraq adı kompüter ustası kimi görəcəklər. Daha sonra yeni obrazı canlandıracağam. Həmin obrazın adı Mehdidir. Mehdi maraqlı bir obrazdır və prosesə təsir edən şəxsdir. Bir neçə seriyadan sonra Mehdinin baş qəhrəmanlarla nə kimi əlaqələri olduğu məlum olacaq.

- Maraqlıdır, niyə aktyorluq fəaliyyətinizi davam etdirməyə çalışmırsınız?

- Bunun bir çox səbəbləri var. Açıq deyim ki, məvacib ilə bağlıdır. Teatrın verdiyi məvacib məni qane etmir. Ona görə də məcburam ki, televiziya və kino sahəsində çalışım. Bu o demək deyil ki, heç vaxt teatrda çalışmayacağam. Teatrda tamaşalarda ancaq müqavilə şərti ilə işləmək istəyərdim. İl ərzində bir-iki tamaşalarda... davamlı teatrda çalışmaq fikrim yoxdur. Akademik Milli Dram Teatrının direktoru İsrafil İsrafilov bir neçə dəfə təklif edib. İnşallah, təklifləri dəyərləndirəcəyəm.

- Aktyorluq fəaliyyətinizi davam etdirməməyinizə səbəb yalnız maaşın az olmasıdır?

- Tamamilə maaşın az olmasını ilə bağlamazdım. Amma əsas səbəb kimi maaşla deyərdim. Çünki müasir dövrdür, 21-ci əsrdir. Müəyyən fikirlər, sovet dövrünün ideologiyası keçmişdə qaldı. Açıq etiraf edirəm ki, 200-250 manata ailə saxlamaq, dolanmaq olmur. Bu o demək deyil ki, teatrda işləməklə bütün günü orada asılı qalırsan. Aktyorlar var ki, teatrda da, dublaj sahəsində də çalışır. Qismət elə gətirdi ki, universiteti bitirən kimi birbaşa televiziyaya getdim və orada da çalışmağa başladım.

Teatr böyük sənətdir. Aktyor teatrda formalaşır. Əsl sənət teatrda səhnədədir. Fikrim var ki, davamlı olaraq teatrda fəaliyyətə başlayım.

- İnsan öz həyatının aktyorudur, yoxsa rejissoru?

- Deməzdim ki, insan öz həyatının aktyorudur. İnsan öz həyatının rejissorudur. Çünki rejissor tamaşaya, filmə quruluş verdiyi kimi, insan da öz həyatına quruluş verməlidir. İxtisasından, yaşından, başından asılı olmayaraq, insan öz həyatının qurucusu olmalıdır. Daha dəqiq, quruluşçu rejissoru olmalıdır. Necə ki, rejissor tamaşaya nizam verdiyi kimi, insan da öz həyatına nizam verməlidir. Məqsədin nədirsə, həmin məqsədə nail olmaq istəyirsənsə müəyyən etapları keçməlisən. Bir sözlə, həyatının rejissoru olmalısan. Aktyor sadəcə peşədir.

- Məşq zamanı rejissor ilə aktyor arasında yaranan mübahisə tamaşaya təsir edə bilər?

- Rejissorla aktyor arasında yalnız yaradıcı məsələlərlə bağlı mübahisə olmalıdır. Şəxsi mübahisələri bura qatmaq olmaz. Çünki həmin mübahisələr istər-istəməz tamaşanın gedişatına təsir edəcək. Dahi şəxsiyyətlər şəxsi işini, problemini kənara qoyur və iş zamanı üzərinə düşəni edir. Amma elə aktyor, aktrisalar var ki, tamaşa zamanı mübahisəni simasında, əməlində büruzə verir. Hər halda, hər iki tərəf bir-birilərinin fikirlərinə hörmət etməlidirlər.

- Neçə ildir ki, dublaj sahəsində fəaliyyət göstərirsiniz?

- 2004-cü ildən müxtəlif televiziyalarda çalışmışam. İlk çalışdığım televiziya Azərbaycan Televiziyası olub. Ora mənim üçün məktəbdir. Hazırda ATV-də və “Region” televiziyasında çalışıram.

- Azərbaycanda filmlərin səsləndirilməsi səviyyəsi sizi qane edirmi?

- Çatışmazlıqlar var. Açıq danışacağam. Hazırda problem tərcümə sahəsindədir. Tərcüməçilər dili yaxşı bilmirlər, redaktə səhvləri edirlər və başqa bu kimi problemlər var. Aktyorların isə bu barədə problemləri yoxdur. Onlar ancaq filmi səslədirməklə məşğul olurlar. Hər hansı bir filmin dublyajına yetərincə pul ayrılsa, təmiz, düzgün dublaj da olar. Bu sahədə Rusiyanı nümunə göstərə bilərəm. Bir filmdə neçə aktyor varsa, dublaja da bir o qədər də aktyorlar cəlb olunur. Bu da səsləndirməyə müsbət təsir edir.

Fuad Mədətov
Publika.Az

Xəbər lenti

DAHA ÇOX XƏBƏR