• USD 1,7339 0,00% EUR 1,8651 +1,90%
    • GBP 2,2098 +0,44% RUB 0,0271 +0,37%

Mahsun Kırmızıgül: “Baş verənlər əsl möcüzədir”

Mahsun Kırmızıgül: “Baş verənlər əsl möcüzədir”

Bu gün Türkiyənin tanınmış sənətçisi Mahsun Kırmızıgül “28 Cinema”nın çəkdiyi “Möcuzə” filminin xüsusi nümayişində iştirak edib. Nümayişdən sonra media mənsublarını başına toplayan Mahsun jurnalistlərin suallarını cavablandırıb.

Mətbuat konfransında Mahsun Kırmızıgül ilə yanaşı, aktyor Əli Sürməli də iştirak edib. Mahsun hər nə qədər də filmindən danışmağı sevməsə də, onun çəkilmə prosesinin ağır olduğunu xatırladıb: “Film, əslində, Əzizin hekayəsidir. Filmin sonunda baş verənlər əsl möcuzədir. Bu filmin mövzusu real həyatdan götürülüb.

Filmin qəhrəmanları hazırda İstanbulda yaşayır. Bütün filmlərimizdə sosial mesajlar verməyə çalışırıq. Bu mesajların nədən ibarət olduğunu filmlərə baxdığınız zaman görəcəksiniz. Əslində, çəkdiyim film haqqında danışmağı çox sevmirəm. Əsas qiyməti tamaşaçı verir”.

Onun sözlərinə görə, “Möcuzə” filmi Türkiyədə çox məşhurlaşıb: “Hətta bu filmin bütün filmlərimdən daha çox gəlir gətirib. Eşitmişəm ki, Azərbaycanda da filmə maraq çoxdur. Bir neçə il bundan öncə Bakıda belə kinoteatrlar yox idi. İndi Bakı çox gözəlləşib, üstəlik də kinoya dövlətin dəstəyi var. Arzu edirəm ki, kinoteatrların sayı artsın”.

Filmdə çəkilən aktyorların oyununu yüksək qiymətləndirən Mahsun Kırmızıgül kamera arxasında ağladığını da etiraf edib: “Aktyorların oyunlarını gördükcə kamera arxasında gözlərim yaşarır. Filmində çox peşəkar aktyorlar çəkilib. Və mən onlarla çox fəxr edirəm”.

O həmçinin Hacı Zeynalabdin Tağıyevin həyatından film çəkmək istədiyini açıqlayıb: “Onun həyat hekayəsi məni çox cəlb edir. Bu barədə film çəksəm, çox mükəmməl olmalıdır”.

Musiqi karyerasına niyə son qoyduğunu açıqlayan M.Kırmızıgül etiraf edib ki, bu qərarla çoxlarını hüsrana uğradıb: “Türkiyədə musiqiyə başlayanda ən yaxşılardan olmağa çalışdım. Səhvlərim də çox oldu. Türkiyədə olduğu kimi, Azərbaycan da məni ifaçı kimi tanımağa başladı.

Ona görə ifaçılıq barədə mən çox insanı hüsrana uğratdım. Mənim ifalarım üçün darıxanları üzdüyümün fərqindəyəm. Amma mən eyni anda bir neçə iş görə bilmirəm. Kino mənim yeni dönəmim, yeni sınağım idi. Və kino çəkmək, albom hazırlamaqdan daha asandır. Musiqi ilə bağlı bir layihəm var, amma vaxt tapıb onu gerçəkləşdirə bilmirəm”.

Mətbuat konfransından sonra “Möcüzə” filminin xüsusi nümayişində Mahsun Kırmıgül də iştirak edib.

Fotoqraf Elçin Murad

teleqraf.com

Xəbər lenti

DAHA ÇOX XƏBƏR