Yazarlar
Nifrət elədiyim üç Jülyen…
Adımız nə qədər kosmopolitə, qeyri-milliyə, nə bilim, daha nələrə çıxsa da, mətbəx məsələsində mən bir xeyli milliyəm. Bəlkə bir az da ifrat proletarlığın əlamətidir ki, insanların dükandan smetan, kəsmik, krem-şanti, sufle, marmelad və s. kimi ilkin mahiyyətindən xeyli uzaqlaşmış məmulatları almasını hələ də başa düşə bilmirəm. Mənə elə gəlir ki, insanların da burjuası-fəhləsi, sadəsi-qlamuru, ağası-nökəri olduğu kimi, mətbəxdə, kulinariyada da belə sinfi ayrı-seçkilik var. Məsələn, şor kulinariyanın ayağı patavalı kəndçisi, kəsmik isə döşüsilikonlu müğənnisidir.
Mənim qəribə, nazlı-duzlu adları olan əcnəbi yeməklərdən də
zəhləm gedir. Məncə, yeməyin adı hansısa heyvanla bilavasitə bağlı
olmalıdır. Məsələn, dana basdırması, qaban kababı, toyuq
çıcırtması, qaşqaldaq ləvəngisi və s. Ya da yeməyin mahiyyətini
qısaca izah edən bir ad olmalıdır: kələm dolması, səbziqovurma,
kartof qızartması. Belə adları eşidəndə bilirsən ki, yaxın
perspektivdə səni nə gözləyir.
Yoxsa, bəzi mədəni xalqlar öz yeməklərinə ad qondarır. Adətən, o
adların da yeməyin mahiyyətinə, tərkibinə, hazırlanma şəklinə heç
bir dəxli olmur. Məsələn, mən nə bilim ki, menyuda adı “Musamma”
kimi qeyd olunmuş yeməyin dərdi, suludu, qurudu, ət yeməyidi,
qurbağa tabakasıdı, yoxsa nə zəhrimardı?
Bunları niyə yazıram? Şəhərə gələndən bəri ən müxtəlif dostlarım
mənə “Jülyen” yeməyi təklif eləyirlər. Hətta bəziləri bu kişi adlı
yeməyi yeməyim üçün israr da eləyir. Mənimsə bununla bağlı xüsusi
dərdim var…
Jülyen adı gələndə ağlıma mütləq oğraş, pulgir, xəyanətkar, arvad
hesabına fırlanan, başqasının arvadına göz dikən, arvadının
“padruqa”sından “kəsən”, arvadını başqasına satan, murdar bir kişi
gəlir. Assosiasiya elə-belə deyil haaaa, mən gözümü açıb fransız
ədəbiyyatı oxuynadan bəri bütün romanlarda Jülyen adlı oğlanlar
adətən yuxarıda sadaladığım keyfiyyətlərə sahib olur.
Məsələn, Balzakın “Parıltılı və səfil kurtizankalar” romanında
Jülyen adlı oğlan katorqadan qaçmış qoca fırıldaqçının hesabına
avara-avara gəzir, sonra onu dəlicəsinə sevən Ester adlı qızı bir
barona satır. Axırda qız dözməyib özünü asır. Gül kimi qız dərisi
beş qəpiyə dəyməyən o gədənin güdazına gedir.
Mopassanın “Həyat” romanında Jülyen adlı şərəfsizin biri varlı
ailənin Janna adlı qızını alır və qayınata hesabına kef eləyir. Bir
müddətdən sonra məlum olur ki, oğlan təkcə arvadı ilə deyil, onun
uşaqlıq rəfiqəsi, fağır və başıaşağı qız olan qulluqçu Roza ilə də
yatır. Roza ondan hətta uşaq da doğur. Janna Jülyeni bağışlayır,
amma o əclaf bir müddətdən sonra özünə başqa bir zənən tapır və elə
o qadınla bir yerdə bədbəxt hadisənin qurbanı olur - ölüb,
cəhənnəmə vasil olur. Amma Jülyenin özündən sonra qalan oğlu da
atasından beşbetər əclaf çıxır və anasının bütün varidatını havaya
sovurur.
Stendalın “Qara və qırmızı” romanının qəhrəmanı Jülyen də
ikiüzlünün, saxtakarın, yekəxananın, şərəfsizin biri olur. Bir
ailəyə uşaqların mürəbbsi (kişi dayə) düzələn oğlan ona çörək verən
adamın arvadını yoldan çıxarır və yazıq qadına itin əzabını verir.
Özü də oğlan rahibliklə hərbçilik arasında girinc qalır ki, bunun
hansı daha çox pul və nüfuz gətirə bilər: hakimiyyət yoxsa din?
Bütün bu sadaladıqlarımdan sonra bu qərara gəldim ki, adlarından və
hazırlanmasından, tərkibindən asılı olaraq, yeməklərin də xasiyyəti
var. Məsələn, ağappaq, üstü qaralı aş yeməklərin ağayanası, dolma
yeməklərin saxtakarı (üzü bir şey, içi başqa şey olduğuna görə),
kartof soyutması yeməklərin şairi, (kasıb və hər şeyə faydalı)
salatlar isə yeməklərin boşbocazıdır.
“Jylyen”in tərkibini, hazırlanmasını hələ də bilmirəm, amma mən
qəti əminəm ki, o da yeməklərin əclafıdır…
-
Magazin121:05
O getdi, mən də daha yoxam! - Əməkdar artist səhnə ilə vidalaşdı
-
Sosial19:35
Özünü öldürən sabiq pediatrın iş yoldaşı DANIŞDI: “Ailə məsələsi deyil..."
-
ABŞ19:25
Bayden Ukraynaya hərbi yardım haqqında qanunu İMZALADI
-
Rəsmi xronika18:40
Prezidentlər mətbuata bəyanatlarla çıxış etdilər - FOTO/YENİLƏNDİ
-
Hadisə18:33
Bakı hava limanında həyəcan siqnalı: Təyyarə qəza enişi etdi - FOTO
-
Sağlamlıq17:27
Yapon alimləri xərçənglə mübarizə üçün unikal vasitə hazırladı
-
Sosial17:00
Sabiq baş pediatrın intiharı ilə bağlı cinayət işi başlandı - Yeniləndi
-
Cənubi Qafqaz16:39
Ukrayna deputatları Vardanyanı biabır etdilər - Nobel Komitəsinə müraciət