Nida.az
Eldar Namazov: “Diqqəti Krımdan çəkmək üçün eyni proseslər Qarabağda başladıla bilər”
“EL” Hərəkatının Qurultaya Hazırlıq üzrə Təşkilat Komitəsinin
sədri, politoloq Eldar Namazov Publika.Az -a müsahibəsində Krımda baş verənlər
və bunun Qarabağa təsirlərini şərh edir.
“Yaxın zamanlarda bu proses bütün dünyaya, o
cümlədən, Qarabağ probleminin həllinə də mənfi təsir
göstərəcək”
- Krımda baş verənlərin, xüsusilə “Krım referendumunun”
gələcəkdə Azərbaycana qarşı, xüsusilə Dağlıq Qarabağ fonunda tətbiq
edilə biləcəyi ehtimalları var. Siz necə hesab edirsiniz, bu
mümkündürmü?
- Krımda baş verənlər bu gün bütün dünyanın diqqət mərkəzindədir.
Ona görə ki, Krım ətrafında baş verənlər beynəlxalq təhlükəsizlik
sistemlərinin, BMT və ATƏT-in təməl prinsiplərinin, ərazi
bütövlüyü, suverenlik prinsiplərinin, konfliktlərin həlli
prinsiplərinin hamısını darmadağın edən prosesdir. Burda BMT, ATƏT
nizamnamələri, ərazi bütövlüyü, suverenlik prinsipləri kənara
atılır. Burda ən təhlükəli məqamlar nədən ibarətdir: Rusiya açıq
şəkildə göstərir ki, o xalqların öz müqəddəratını təyin etmək
prinsipini ərazi bütövlüyü və suverenlikdən üstün tutur. Bu artıq
Qarabağla bağlı yaranmış duruma da təsirini göstərəcək. Çünki
Rusiya Minsk qrupunu həmsədrlərindən biridir. Ordakı referendum
məsələsi artır dünya təcrübəsində bir neçə dəfə baş verib. Adətən,
belə ərazilər özlərini müstəqil dövlət elan edirlər. Misal üçün
Abxaziya, Osetiya, Kosova kimi ərazilər. Hətta bu gün qondarma
“Dağlıq Qarabağ Respublikası” müstəqil görünməyə çalışır.
Rusiya bütün bunları da ötüb keçir. Rusiya qonşu ölkənin
ərazisini həmin ölkənin razılığı olmadan özünə birləşdirir. Ona
görə bu məsələ təkcə bizim bölgəyə, Azərbaycana deyil, ümumən
dünyaya təsir edir. Baş verənlər II Dünya müharibəsindən sonra
formalaşmış beynəlxalq təhlükəsizlik sistemini, beynəlxalq
qurumları alt-üst edir. Təbii ki, dünyanın aparıcı dövlətləri ABŞ,
Avropa İttifaqı, beynəlxalq təşkilatları olan BMT, ATƏT “Rusiya
buna görə cavab verməli olacaq” mövqeyini ortaya qoyub. Buna görə
Rusiyaya qarşı iqtisadi, siyasi sahədə ciddi sanksiyalar tətbiq
olunacaq. Rusiya rəhbərliyi isə təəssüflər olsun ki, qırmızı xətti
keçir, bütün körpüləri yandırır. Dövlət Duması, Federasiya Şurası,
elə prezidentin özü də verdikləri bəyanatları geri götürə
bilməyəcəklər. Dünyanın da bu məsələdə geri çəkilmək imkanı yoxdur.
Əgər geri çəkilsələr o zamanda gərək BMT də, ATƏT də buraxılsın,
təhlükəsizlik sistemi darmadağın olsun. Güman edirəm ki, yaxın
zamanlarda bu proses bütün dünyaya, o cümlədən, Qarabağ probleminin
həllinə də mənfi təsir göstərəcək.
“Həm Şimaldan, həm Cənubdan separatçlıq
təhlükələri bu gün də mövcuddur”
- Rusiyanın xalqların öz müqəddəratını təyin etmə
prinsipindən çıxış etməsi gələcəkdə Azərbaycana qarşı nəinki
Qarabağ, həmçinin digər məsələlərdə də hansı təhlükələri yarada
bilər?
- Bunun Azərbaycan üçün kifayət qədər ciddi təhlükələri var. Hesab edirəm ki, duruma yenidən baxmalıyıq. Bu məsələdə iqtidar-müxalifət məsələsi yoxdur. Hamımız, iqtidarlı müxalifətli bütün cəmiyyət ölkənin təhlükəsizlik və Qarabağ məsələsində eyni mövqedən çıxış edək. Bu mənada biz yaranmış duruma Krım hadisələri fonunda bir daha baxmalıyıq. Misal üçün, neçə ildir dövlət təbliğatı belə qurulub ki, Azərbaycanın maliyyə resursları daha çoxdur, ordumuz sürətlə inkişaf edir, hərbi üstünlüyümüz var və bunu daha da gücləndirəcəyik.
Buna paralel olaraq da Rusiyanın beynəlxalq hüquq normalarına,
ATƏT və BMT prinsiplərinə görə, Ermənistana hərbi dəstək verməsi
mümkün deyil. Amma Krım ətrafında gedən proseslərdən görürük ki,
Rusiyanın BMT-nin də, ATƏT-in də prinsiplərinə münasibəti necədir.
Nəzərə almalıyıq ki, Krımın Rusiya ilə heç bir hərbi müqaviləsi yox
idi, amma Ermənistanın var. Azərbaycan hətta neftdən əldə etdiyi
gəlirlərin 90 faizini də orduya yönəltsə, Rusiya pulsuz olaraq
Ermənistanı həm silahlandırmağa, həm də oradakı öz hərbi bazalarını
gücləndirməyə çalışacaq ki, regionda güc balansının Azərbaycanın
xeyrinə dəyişməyə imkan verməsin. Rusiya bunu gizlətmir. Həmçinin,
bununla bağlı əvvəldən də ciddi faktlar var idi. Bir neçə dəfə
milyardlarla dollar həcmində silahların Ermənistana ötürülməsini
ortaya çıxartmışıq, faktlarla sübut etmişdik. Ancaq Krım
hadisəsindən sonra artıq bir daha aydın olur ki, beynəlxalq hüquq
normalarına istinad o qədər də etibarlı deyil. Eyni zamanda nəzərə
almaq lazımdır ki, Azərbaycanda bir neçə dəfə separatçı hərəkatlar
yaratmağa cəhdlər olub. Düzdür, dövlət bu məsələdə müəyyən işlər
görür. Ancaq həm Şimaldan, həm Cənubdan separat təhlükələri bu gün
də mövcuddur.
“Rusiya diqqəti Krımdan yayındırmaq üçün
analoji prosesi Qarabağda başlada bilər”
Nəhayət, bir məqamı da nəzərə almaq lazımdır: Ukraynaya, Krıma görə
həm Avropa, həm ABŞ-la üz-üzə qaldığı dövrdə Rusiyanın müxtəlif
dairələri diqqəti Krımdan, Ukraynadan yayındırmaq üçün başqa bir
bölgədə analoji prosesin başlanmasında maraqlı ola bilərlər. Burda
əsas təhlükə Moldovada Dnestryanı və Qarabağa konfliktidir. Mən bu
günlərdə Rusiya kanallarının birində rusiyalı icmalçının “əgər Krım
belə həll olunursa, o zaman Qarabağ məsələsi necə həll olunmalıdır”
sualını dinlədim. Yəni bu təhlükələrin hamısını qiymətləndirmək
lazımdır. Burda Azərbaycanın ərazi bütövlüyünə, dövlətçiliyinə
açıq-aşkar ciddi təhlükələr meydana çıxıb. Bunların hamısını
obyektiv qiymətləndirməliyik. Dövlətimiz də, cəmiyyətimiz də bu
təhlükələri dəf etməyə hazır olmalıdır.
“İndidən cəmiyyətin özünü iqtidarlı
müxalifətli səfərbər etmək lazımdır”
- Hesab etmək olar ki, Krımdan diqqət yayındırmaq üçün
Rusiya Qarabağda lokal müharibə başlatsın?
- Diqqəti yayındırmaq üçün addımlar dediyim kimi Moldovada da atıla
bilər, Qarabağda da. Dövlətin təhlükəsizlik məsələsi elmi məsələ
deyil, sırf praktiki məsələdir. Əgər təhlükə heç olmasa 10
faizdirsə, bu haqda danışmaq, müzakirə etmək lazımdır. Qarşısını
necə almaq barədə düşünməliyik. Biz təhlükə 90 faizə qalxanda
danışmalı deyilik. İndidən cəmiyyətdə xof yaranmasını istəmirəm,
ancaq bu təhlükələr var və günü-gündən artır. Hesab edirəm ki,
indidən həm diplomatik, həm siyasi yolla, həm də cəmiyyətin özünü
iqtidarlı-müxalifət səfərbər etmək, ideoloji işi qurmaq
lazımdır.
Hadisələr göstərir ki, hətta 40 milyondan çox əhalisi olan,
Avropanın ən böyük dövlətlərindən biri, NATO ölkələri ilə həmsərhəd
olan Ukraynaya qarşı belə hərəkətlərə yol verilirsə, Cənubi
Qafqazda hansı hadisələr baş verə bilər?
- Bu gün Krımda həm də Qarabağın taleyinin həll
edildiyini demək olarmı?
- Qısa müddətli proqnoza uyğun deyil, uzun müddətli proqnoza uyğun
olaraq siz haqlısınız. Avropada və Amerikada siyasi dairələr,
ekspertlər açıq deyirlər ki, Krımda dünyanın təhlükəsizlik
sisteminin taleyi həll olunur. Həmçinin II Dünya müharibəsindən
sonra qurulmuş bütün beynəlxalq təhlükəsizlik sistemi, beynəlxalq
qurumlar daxil olmaqla çox şey orda var. Təbii ki, bunun içində həm
Cənubi Qafqaz, həm Qarabağ məsələsi var. Məlum deyil ki, bundan
sonra beynəlxalq hüquq normaları işləyəcək, ya yox, beynəlxalq
təhlükəsizlik uğurlu olacaq, ya yox. Bunun bizə də təsiri kifayət
qədərdir.
“Lokal hərbi-siyasi blok yaradaraq oranın
üzvü olmalıyıq”
- Rusiya Azərbaycana əsas hansı məsələlərdə təzyiq edə
bilər?
- Biz tez-tez deyirik ki, Azərbaycan müstəqil xətt yürüdür,
xaricdən heç bir təzyiq nəticə verməyəcək. Kaş ki belə olsun. Amma
ölkənin təhlükəsizlik, ərazi bütövlüyü məsələlərində kifayət qədər
ehtiyatlı olmaq lazımdır. Hansısa bir təhlükəni bir az şişirtmək
ola bilsin ki, o qədər də səhv deyil, nəinki, hansısa bir
təhlükənin ciddiliyini nəzərə almamaq. Təəssüflər olsun ki,
Azərbaycana xarici təzyiq mexanizmləri hələ də mövcuddur.
Bunu yalnız ölkənin hesabatına olan valyuta ehtiyatları ilə ölçmək
mümkün deyil. Hüsni Mübarək ABŞ-ın ən yaxın müttəfiqi idi. Amma ABŞ
onu müdafiə etmədi, heç buna görə ciddi cəhdlər də göstərmədi. Bu
mənada hesab edirəm ki, ölkənin xarici təzyiqlərdən müdafiə
olunması üçün təkcə böyük valyuta ehtiyatları yox, eyni zamanda
etibarlı beynəlxalq partnyorlar olmalıdır. Azərbaycana olan
təhlükələrin bir qismini Azərbaycan özü dəf edə bilər. Amma elə
təhlükələr var ki, bizim potensialımızdan daha böyükdür.
Hesab edirəm ki, beynəlxalq etibarlı partnyorluq əlaqələri qurub
lokal hərbi-siyasi blok yaradaraq oranın üzvü olmalıyıq. Azərbaycan
kimi ölkələr üçün bu vacibdir. Mən BMT və ATƏT-i demirəm.
“Xarici təhlükənin qarşısını öz gücümüzlə
alacağıq prinsipi burda işləmir”
Nəhayət, ən vacib məqamlardan biri ölkənin daxilində sabitliyin
qorunması, iqtidarlı-müxalifət bütün cəmiyyətin xarici təzyiqlərə
tab gətirməsi, müqavimət göstərməsi imkanlarına malik olması üçün
ciddi islahatlar aparılmalıdır. İqtidar-müxalifət münasibətləri,
mövcud sosial durum, narazılıqların olması, korrupsiyanın
mövcudluğu bizim xarici təzyiqlərə rahatlılıqla tab gətirəcəyimizə
zəmanət vermir.
Görürsünüz, insanlar meydanlara çıxıb öz hüquqlarını istəyir, sosial narazılıqlarını dilə gətirir, amma birdə görürsən ki, xarici müdaxilələr oldu və ölkə alt-üst edildi. Ona görə də xaricdən gələn təhlükələrin dəf edilməsi üçün ölkənin daxilində iş aparılmalıdır. Bütün Azərbaycan cəmiyyətinin birliyi və müqavimət potensialı güclənməlidir.
Eyni zamanda, beynəlxalq partnyorlarımızın bizə yaxın olan, siyasi, ideoloji və digər dəyərlər üzərində qurulmuş bir təhlükəsizlik sisteminə daxil olmalıyıq. Təhlükələrin bir qismi öz potensialımıza dəf edə bilmərik.
Azərbaycanın ərazi və əhalisinin, hərbi potensialını Rusiya,
İranla müqayisə edin. Açıq görəcəksiniz ki, xarici təhlükənin
qarşısını öz gücümüzlə alacağıq prinsipi burda işləmir.
Asif Nərimanlı
-
Sağlamlıq02:19
Qadınlarda sonsuzluğa və tüklənməyə səbəb olan nadir sindrom
-
Sosial01:45
Keçmiş məcburi köçkünlərin evləri satışa çıxarılır - QİYMƏTLƏR
-
Nəqliyyat01:30
Qazaxın Aşağı Əskipara kəndinə gedən yol açıldı
-
MDB01:15
Rusiya BMT TŞ-nin qətnaməsinə veto qoydu
-
MDB01:00
Şoyqu İvanovu vəzifəsindən uzaqlaşdırdı
-
Qoroskop00:27
Günün qoroskopu: Yaxın ətrafınızdakı şəxslərdən biri...
-
Ekopublika.az24 Aprel 23:57
Azərbaycanda da satılan məşhur şokolad məhsulu ətrafında QALMAQAL
-
İdman24 Aprel 22:04
"Qarabağ" finalda!