Nida.az
Lavrovun çantasındakı üç məsələ: Qarabağın taleyi necə olacaq? – TƏHLİL
Rusiya xarici işlər naziri Sergey Lavrov bir gün sonra –
sentyabr ayının ilk günündə Bakıya gələcək. Rəsmi məlumatlara görə,
Rusiyanın baş diplomatı Bakıda Azərbaycan və Rusiya arasında
münasibətlərin ikitərəfli və çoxtərəfli formatının müxtəlif
aspektləri, Ermənistan-Azərbaycan, Dağlıq Qarabağ münaqişəsinin
həlli, ATƏT-in Minsk Qrupunun həmsədri kimi Rusiyanın danışıqlar
prosesində rolu barədə müzakirələr aparacaq.
Rusiya XİN rəhbərinin Bakı səfəri dedikdə, Dağlıq Qarabağ
məsələsinin müzakirəsi ilk məsələ olaraq ön plana keçir. Bu
təəccüblü deyil, xüsusilə, sentyabrda Nyu-Yorkda keçiriləcək BMT
Baş Assambleyasının iclasında bu münaqişənin gündəmə gətiriləcəyi
ehtimallarının olduğu bir vaxtda. Lakin rəsmi məlumatlarda keçən
“ikitərəfli və çoxtərəfli formatın müxtəlif aspektləri” ifadəsi
Rusiyanın baş diplomatının səfər çantasında hansı məsələlərin
olmasına dair suallar yaradır.
Son siyasi proseslər fonunda Lavrovun özü ilə Bakıya gətirəcəyi
məsələləri üç istiqamətdə dəyərləndirmək mümkündür.
1. Qarabağ
2. Enerji
3. Qafqaz uğrunda döyüş
Qarabağ: “Rusiya münaqişənin həllinin
intensivləşdirilməsini istəyir”. Lavrovun Moskvada dilə gətirdiyi
bu ifadələrdən cəmi bir neçə ay keçir. Xarici işlər naziri Elmar
Məmmədyarovun Moskva səfərində gündəmə damğa vuran bu açıqlamadan
dərhal sonra amerikalı həmsədr Ceyms Uorlik “İşğal olunmuş
ərazilər Azərbaycana qaytarılmalıdır” deyə konkret mövqe
nümayiş etdirməsi də diqqətlərdən yayınmadı. Bu, Vaşinqton və
Moskvanın münaqişə ətrafında, daha dəqiq anlamda, Azərbaycan
uğrunda marafon yürüşünə çıxması demək idi. Ukraynadan sonra
burun-buruna gözüaçıq yatan canavarları xatırladan Rusiya və ABŞ-ın
hər hansı münaqişənin həllində, elə Qarabağa görə ortaq məxrəcə
gəldiyini demək çətindir. Lakin hər zaman olduğu kimi diplomatiya
aldadıcı rolu üzərinə götürür. Moskva və Vaşinqtondakı diplomatik
ritorika da buna xidmət edirdi. Bu ümidverici açıqlamaların
ardından sentyabrın sonlarına planlaşdırılan BMT Baş
Assambleyasının iclasında prezidentlərin görüşünün gündəmə gəlməsi
də hansısa yeni prosesin başlanğıcından xəbər verirdi. Xüsusilə,
Vladimir Putinin qatılacağı iclasda Barak Obama və prezidentlərin
iştirakı ilə dördtərəfli müzakirə münaqişə tarixində ilk ola
bilərdi və güman ki, Nyu-York şəhəri Qarabağın taleyində həlledici
ada sahib olacaqdı. Lakin Lavrovun səfəri ərəfəsində Nyu-Yorkda
prezidentlərin görüşünü təşkil etməyin mümkün olmadığı haqda
xəbərlər ortaya çıxdı. Bu nə qədər qeyri-rəsmi olsa da, səfər
öncəsi diqqət çəkir. Yayılan xəbərlərə görə, prezidentlərin
əvəzində xarici işlər nazirlərinin görüşü keçiriləcək.
Prezidentlərin görüşünün təşkil olunmaması təsdiqlənməmiş
məsələdir. Amma əgər bu doğrudursa, o zaman baş tutmamasının bir
səbəbi ola bilər. Belə ki, avqustun əvvəlində Ermənistan müdafiə
nazirinin birinci müavini David Tonoyanın ABŞ-a səfərinin kökündə
Vaşinqtonun Dağlıq Qarabağ üzrə beynəlxalq sülhməramlı qüvvələrin
yaradılması haqda BMT-nin yeni qətnaməsinin qəbulunda maraqlı
olması ilə bağlı iddia dururu. Tonoyanın Nyu-Yorkda BMT-nin
sülhməramlılar üzrə xüsusi nümayəndəsi ilə görüşməsi də ehtimalları
artırırdı. Həmin ərəfədə Azərbaycan müdafiə naziri Zakir Həsənovun
Moskvaya səfəri də diqqətlərdən yayınmadı. Görünür,
sülhməramlıların yerləşdirilməsi məsələsi həqiqət olub və
Nyu-Yorkda prezidentlərin görüşündə bu məsələ qətiləşəcəkmiş, məhz
buna görə də rəsmi Bakı haqlı olaraq bundan imtina edib. Təbii ki,
bu, baş verənlər haqda versiyalardır. Amma proseslər olduqca
qarışıq görünür və belə bir vaxtda Lavrovun Bakı səfərində Qarabağ
üzrə danışıqların hansı istiqamət üzrə davam edəcəyi maraqlıdır.
Hesab etmək olar ki, Rusiyanın Azərbaycanın qəbul etmək istəmədiyi
hansısa təklifi var və Lavrov məhz bu təklifi yenidən masaya
yatırmaq üçün gəlir. Qarabağ münaqişəsinin həllində hansı
yeniliklərin olacağının, yaxud olmayacağının yaxın müddətdə şahidi
olacağıq.
Enerji: Lavrovun çantasındakı ən mühüm məsələlərdən biri bu ola bilər. Ötən həftə Elmar Məmmədyarovun Ankarada türkiyəli və türkmənistanlı həmkarları ilə enerji məsələsini müzakirə etməsinin ardından dərhal sonra rusiyalı baş diplomatın Azərbaycana gəlməsi bu ehtimalı gücləndirir. Çünki Avropa bazarı uğrunda gedən “qaz müharibələrində” Moskva hazırda uduzan tərəfdir. “Cənub axını”ndan sonra “Türk axını” layihəsini gündəmə gətirən Kreml bu məsələdə Ankara ilə razılığa gələ bilməyib. Həmçinin, “Türk axını” marşrutundakı ölkələrin domino daşı kimi bir-bir “yıxılması” da Kremli çətin vəziyyətə salıb. Rusların illər sonra Şimal axınını gündəmə gətirməsi də bu layihədəki çətinliklərindən xəbər verir.
Vaşinqton əsas alternativ olaraq müdafiə etdiyi Azərbaycan qazını Avropa bazarına çıxarmaqda israrlıdır. Bu istiqamətdə Yunanıstan maneəsinin aradan qaldırılmasında ABŞ-ın oynadığı rol da bunu deməyə əsas verir. Bu layihənin davamı olaraq Türkmənistan qazının da Bakı marşrutu ilə çıxışı təmin olunmalıdır. Söhbət Rusiyanın kabusuna çevrilən Transxəzər layihəsindən gedir. Ekspertlərə görə, bu layihə Xəzərdə müharibəyə səbəb ola bilər. Lakin Vaşinqton bütün vasitələrlə türkmən qazının yolunu açmaq istəyindən əl çəkmir. Bu, həm də Xəzərdə onun hegemonluğunu təmin edə bilər.
Transxəzər layihəsinin reallaşması Bakı üçün də sərfəlidir. Bununla Azərbaycanın müəllifi olan Cənub Qaz Dəhlizi layihəsinin uzunömürlülüyü təmin olunacaq. Ankarada xarici işlər nazirləri səviyyəsindəki üçtərəfli görüş də məhz bu planların reallaşmasına hesablanıb. Görünür, Rusiya bu görüşdən narahatdır və Lavrov vasitəsilə Bakıya “mürəkkəb proseslərə start verəcək addımlara qarışmamaq mesajını” göndərir.
Və nəhayət, Qafqaz uğrunda döyüş: Ötən həftə NATO baş katibi Yens Stoltenberq Gürcüstana səfər etdi və Şimal Alyansının bu ölkədəki təlim mərkəzini açdı. “NATO Qafqaza girdi” - təsadüfi deyil ki, bir çox ekspertlər bunu məhz belə qiymətləndirdilər və ümumi mənada haqsız da deyillər. Çünki bu, SSRİ-nin dağılmasından sonra Şimal Alyansının bölgədə ilk əyani addımı idi. Kreml də bunu özü üçün təhlükə olduğunu bəyan etdi.
Şimal Alyansının Qafqaza girişi regionda güc balansının
dəyişməsi ilə nəticələnəcək hadisə ola bilər. Hazırda Qafqazda daha
güclü olan Rusiya üçün bu, qorxulu gələcək vəd edir. Məhz buna görə
Lavrov regionun əsas gücü hesab olunan Azərbaycanla münasibətlərin
çoxtərəfli aspektlərini müzakirə etmək üçün gəlir. Görünür,
Qafqazın əldən çıxması təhlükəsini hiss edən Moskva vaxt itirmək
istəmir. Bu, rəsmi Bakıya Moskva qarşısında öz tələblərini irəli
sürməsi üçün əlavə şanslar yaradacaq.
Asif Nərimanlı
-
İdman01:45
Məşhur kluba ağır cəza - 18 xalı silindi
-
Sosial01:01
Azərbaycana qaytarılan dörd kəndin sakinləri DANIŞDILAR - VİDEO
-
Qoroskop00:31
Günün qoroskopu: köklü yeniliklər başlanır
-
Magazin119 Aprel 23:15
Nazpəri illər sonra İlhamə Quliyeva ilə küsülü olmasının səbəbini açıqladı - VİDEO
-
Hadisə19 Aprel 22:48
Bakı metrosunda OLAY
-
Nida Xəbər 19 Aprel 22:24
4 kənd qayıtdı - Növbəti mərhələdə nə var?
-
Dünya19 Aprel 22:12
Ukrayna Rusiyanın hərbi obyektlərini vura bilər - NATO-dan TAM DƏSTƏK
-
MDB19 Aprel 21:50
95 yaşlı diplomat öldü