Dünya
Ankara üçün son şans: “Bordo bereli”lər türkmanları qoruya bilməsə...
Suriyada Bəşər Əsəd ordusunun Rusiyanın dəstəyi ilə
türkmanların yaşadığı Bayırbucaq bölgəsinə qarşı hücumları davam
edir.
Publika.az türkman mənbələrinə istinadən xəbər verir ki, əsas hədəf nöqtələri türkmanların kompakt yaşadığı Derhanne, Qızıldağ və Fırınlık kəndləridir. Əsəd ordusunun və Rusiya döyüş təyyarələrinin havadan və qurudan sivil vətəndaşlara da hücum etdiyi deyilir. Son 3 gün ərzində hücumlar daha da şiddətlənib. Yerli mənbələr dünəndən bu günə qədər Qızıldağ kəndində silahlı qarşıdurmanın gücləndiyini bildirirlər. Son məlumatlara görə, Gimam, 45 Təpəsi, Zuveyk kəndi, Acısu Kavşağı və Qızıldağın bir hissəsi Əsəd ordusunun əlinə keçib.
Əsəd ordusu hansı bölgələri işğal etmək
istəyir?
Türkiyə sərhədindən 5 kilometr məsafədə yerləşən Qızıldağ
Bayırbucaq bölgəsində ən yüksək mövqe olduğu üçün strateji
əhəmiyyətə malikdir. Əsəd ordusunun bu mövqeyi ələ keçirəcəyi
təqdirdə bölgədəki 10 türkman kəndini top atəşi ilə vura bilər.
Əsəd ordusunun hədəfindəki digər nöqtə isə Acısu bölgəsidir. Bura
türkman silahlı birliklərinin qərb qismi ilə şimal xəttindəki son
nöqtəsidir. Qızıldağ və cənubdakı 45 Təpəsi ilə birlikdə üçbucaq
formada olan bölgə Əsəd ordusu üçün strateji və həyati əhəmiyyət
kəsb edir. Türkman Dağının cənub xəttindəki Gımamla yanaşı, digər
önəmli nöqtə Zuveyk kəndidir. Yerli mənbələr bu kəndin artıq Əsəd
ordusu tərəfindən ələ keçirildiyini deyir. Əsəd ordusu Zuveyk
kəndindən şimalda yerləşən Burc Keseb nöqtəsinə doğru irəliləyərək,
Türkman Dağı ilə Cebel Ekrad arasındakı bağlantını kəsə və Türkman
Dağını işğal edə bilər.
Türkman Dağı işğal olunmayıb
Dünən yayılan məlumatlara görə, Türkman Dağı artıq işğal olunub. Lakin bu məlumat sonradan təsdiq olunmadı.
Suriya Türkman Məclisinin rəhbəri Abdurrahman Muastafa da
Publika.az-a açıqlamasında məlumatın yalan
olduğunu bildirib. Qeyd edib ki, türkman birlikləri hazırda Türkman
Dağında Əsəd ordusuna qarşı qəhrəmancasına döyüşürlər.
Sivil türkmanlar evlərini tərk edir
A. Mustafa Qızıldağın bir hissəsinin işğal edilməsi ilə bağlı
yayılan informasiyaların da doğru olmadığını diqqətə çatdırıb: “Hər
şey türkman birliklərinin nəzarəti altındadır. Sadəcə olaraq, sivil
vətəndaşlar bölgədən köçürlər. Bunu normal qarşılayırıq. Dünəndən
başlayaraq 200 türkman ailəsi daha təhlükəsiz olan Yayladağına
keçiblər. Məclisimizin bir sıra üzvləri də türkman ailələrinin köç
etdiyi bölgəyə yardım üçün gediblər”.
Onun sözlərinə görə, hazırda Əsəd ordusunun əsas hədəfi
Qızıldağı ələ keçirməkdir: “Çünki bu bölgəni işğal etsələr, bütün
türkman kəndləri ovuclarının içində olacaq. Amma təslim
olmayacağıq. Türkman birlikləri öz ata-baba torpaqlarını sona qədər
müdafiə edəcəklər”.
Yayılan son məlumatlara görə, türkman birlikləri iki kəndi İŞİD-dən təmizləyib. Əməliyyata havadan Türkiyəyə aid 6 F-16 və ABŞ-ın 4 F-15 təyyarələri, həmçinin AC-130 və 3 pilotsuz təyyarə dəstək verib.
Əsəd nə üçün türkmanları məhv etmək
istəyir?
A. Mustafanın sözlərinə görə, Əsəd rejimi türkmanların varlığını
qoruyacaq təhlükəsiz bölgənin yaradılmasını istəmir: “Təhlükəsiz
bölgə yaradılmasa, türkmanlar məhv olar. Bu, bizim üçün həyati
əhəmiyyət daşıyır. Əgər Bayırbucaq bölgəsini xilas edə bilsək,
Hələbin şimalında təhlükəsiz bölgə yaradılması qaçılmaz addım
olacaq”.
O, türkmanların Əsəd və İŞİD başda olmaqla bir neçə cəbhədə eyni anda döyüşdüyünü qeyd edib. Əlavə edib ki, türkmanların məğlub olması haqda informasiyalar doğru deyil: “Türkman birlikləri sona qədər döyüşəcək və minillik torpaqlarını heç kimə verməyəcək. Hər kəs bunu bilməlidir”.
Haşiyə: Suriya qüvvələrinin Türkiyə ilə sərhəd
əraziləri nəzarətə götürməsi Ankaranın Suriya müxalifəti və
türkmanlarla əlaqəsini təmin edən yeganə dəhlizin də itirilməsi
anlamına gəlir. Bununla da Türkiyənin Suriyadakı proseslərə
müdaxilə etməsi heçə enir.
Bayırbucak türkmanları kimdir?
Suriyada yaşayan türk azlığıdır. Onlar Səlcuq sultanı
Alparslanın Malazqirt döyüşündən öncə Rakka və Hələb bölgəsinə
köçüblər. Daha sonra bu bölgədə geniş şəkildə yayılıblar.
Bayırbucak türkmanları İraq türkmanları ilə eyni soydandır və türk
xalqları arasında daha çox Azərbaycan türkləri ilə yaxındır.
Türkmanların dili də Azərbaycan dili ilə eynilik təşkil edir.
Ümid türk dövlətləridir
Kərkük türkmanı, jurnalist-araşdırmaçı Özdəmid Hürmüzlü Publika.az-a açıqlamasında bildirib ki, Türkiyə Suriya türkmanlarına dəstəyini genişləndirməlidir: “Yeganə ümid yeri türk dövlətləridir. Hansısa formada dəstək verilməsə, bu coğrafiyada türkmanlar minillik torpaqlarını itirə bilərlər. Bu gün Suriya türkmanlarının başına gələnləri İraq türkmanları da yaşayırlar. Türkiyə İraqda türkman Telaferin işğalına heç nə edə bilmədi, amma Suriya türkmanlarının məhv olmasına göz yummamalıdır. Buna türk olaraq hər birimizi dəstək verməliyik”.
Qeyd edək ki, Suriya münaqişəsi başlayandan bəri türkmanlar əvvəlcə İŞİD-in, daha sonra PYD-nin (PKK-nın Suriya qolu - red) hücumuna məruz qalıb. İŞİD hücumlarından sonra türkman kəndləri PYD tərəfindən boşaldılıb. Daha sonra hücumlara qarşı dirəniş göstərən türkmanlara qarşı Əsəd ordusu hücuma keçib.
Suriyaya girən Rusiya ordusu da İŞİD-ə qarşı əməliyyat
keçirəcəyini desə də, əsas hədəfi müxalifətlər və türkmanlar olub.
Bölgədəki türkmanların taleyi təhlükə altındadır.
Türkiyəli tarixçi Şemsettin Gürtekin
Publika.az-a açıqlamasında türkmanların düşdüyü
vəziyyətin beynəlxalq ictimaiyyət tərəfindən diqqətə alınmasının
vacibliyini bildirib: “Türkmanların bir türk olaraq öz yurdlarını
sona qədər qoruyacağına şübhə yoxdur. Amma bölgədə qlobal müharibə
gedir və bu müharibənin qarşısında dayanmaq çətindir. Bu baxımdan,
başda Türkiyə dövləti olmaqla bütün türk dünyası bu işğala göz
yummamalı, türkman qardaşlarımıza dəstək olmalıdır”.
Məlumat üçün bildirək ki, Türkiyənin Suriya türkmanlarına ərzaq
yardımı göndərdiyi, həmçinin 500-ə qədər “Bordo bereli”nin (xüsusi
təyinatlı dəstə) bölgəyə girdiyi haqda informasiyalar var.
Asif Nərimanlı
-
Dünya10:44
Bu valideynlər bir uşağa görə 125 min manat alacaqlar
-
Region10:10
Rusiyadakı azərbaycanlılara PİS XƏBƏR - Bu sahələrdə işləmək qadağan edildi
-
Cənubi Qafqaz09:48
Rusiya bu həftə Paşinyanı devirəcək - Şok iddia
-
Hadisə09:21
Məktəb binasında yanğın
-
Sosial08:43
Azərbaycanın tanınmış professoru vəfat etdi - FOTO
-
Magazin208:36
Kristofer Nolan cəngavər olacaq, xanımı isə... - FOTO
-
Ekologiya07:17
Bu günə olan hava PROQNOZU - 20 dərəcə isti
-
Magazin206:16
Leonardo Di Kaprio ilə sevgilisi arasında NƏ BAŞ VERİR?