Gülnarə Xəlilova əfsanəvi Yıldırım Mayrukun dəfiləsində - FOTOLAR

İstanbulda əfsanəvi dizayner, Türkiyə modasının yaradıcısı Yıldırım Mayrukun yaradıcılıq fəaliyyətinin 50 illiyinə həsr edilmiş dəfilə keçirilib.

2016-cı il mövsümü üçün hesablanmış “2023Е Нikayeler – XXIV “Minevra” adlı kolleksiya gecənin qonaqları tərəfindən gurultulu alqışlarla qarşılanıb. Dəfilənin əsas modeli “Best Model of he World”-ün vitse-missi, "Best Model of Azerbaijan"-ın qalibi, aktrisa Günay Musayeva olub.

Azərbaycandan dəvət edilmiş fəxri qonaqlar arasında tanınmış modelyer dizayner, sənətşünaslıq üzrə fəlsəfə doktoru Gülnarə Xəlilova da olub. O təəssüratlarını Publika.az-la da bölüşüb:

“Mayruk 2015-ci ilin martında Bakıda olarkən “Baku Fashion Night 2015” çərçivəsində özünün “Pret-A-Porter” kolleksiyasını təqdim edib. O, mənim “İlham” və “İlmələrin sehri” əl işi olan ziyafət geyimləri və toxunma libaslardan ibarət kolleksiyamı da yüksək qiymətləndirib. Türkiyə modasının yaradıcısından belə sözləri eşitmək çox xoş idi. Bizim ailəvi və mehriban münasibətlərimiz yarandı. Bir neçə ay əvvəl o məni özünün kolleksiyasının dəfiləsinə dəvət etdi və məmnuniyyətlə bu təklifi qəbul etdim. İstanbuldakı gecə çox möhtəşəm idi və tamaşaçılar əfsanəvi dizayneri və onun füsunkar kolleksiyalarını uzun müddət alqışladılar”.

Azərbaycandan olan fəxri qonarlar arasında əməkdar incəsənət xadimi, modelyer dizayner Fəxriyyə Xələfova da olub.

Y. Mayrukun kolleksiyaları London, Paris, Nyu-York, Abu-Dabi, Təl-Əviv və digər şəhərlərdə məşhurdur. İstedadlı dizayner Bursada anadan olub. Onun moda dünyasında hekayəsi 1950-ci ildə başlayıb. Y. Mayrukda üslub, dizayn, modaya sevgini böyük bacısı yaradıb. Türkiyəli dizayner evin yuxarı mərtəbəsindəki kiçik atelyedən üslub yaradıcısına çevrilib. Viktoriya Bekhem kimi super ulduz onun pərəstişkarıdır. Onun üslubu qadının azadlığını, bədənin gözəlliyini və xətlərin incəliyini tərənnüm edir. Məşhur dizayner kolleksiyalarında əsasən parçadan, şifondan, brilyantdan və rənglərdən istifadə edir.

Cəvahir