Nida.az
Qarabağda sülh və müharibə versiyası: Putin Sarkisyanı niyə çağırır? – TƏHLİL
Ermənistan prezidenti Serj Sarkisyan martın 10-da Rusiyaya işgüzar səfərə yollanacaq. Bu haqda Rusiya mediası İrəvandakı diplomatik mənbəyə istinadən xəbər verib. Adətən, Putinin Sarkisyanı dəvət etməsi Kreml rəhbərliyinin ciddi tapşırıqları ilə bağlı olur.
Regionda yaşanan son siyasi proseslər fonunda da Sarkisyanın Rusiya səfəri fərqli olmayacaq. Lakin Kreml rəhbərinin İrəvana hansı tapşırıqları verəcəyi maraqlıdır. Dağlıq Qarabağ məsələsinin əsas gündəm olacağı şübhəsizdir. Ermənistan xarici işlər naziri Edvard Nalbandyanın səfərdən bir gün öncə “Kommersant” nəşrinə geniş müsahibə verməsi və Dağlıq Qarabağ münaqişəsinə daha çox diqqət ayırması da bunu deməyə əsas verir.
Dağlıq Qarabağ: sülh və müharibə versiyası
“Dağlıq Qarabağ münaqişəsi müharibə astanasında”, yaxud “Qarabağda
müharibə qaçılmazdır” kimi ehtimallar, iddialar son dövrlər
medianın gündəmindədir. Xüsusilə rusiyalı ekspertlər bu ehtimalı
tez-tez ortaya atırlar. Misal üçün, Minsk qrupunun keçmiş rusiyalı
həmsədri Vladimir Kazimirov son müsahibəsində Qarabağda müharibənin
qarşısını almağın çətin olacağını bildirdi. Türkiyə-Rusiya
münaqişələrinin gərginləşməsi belə ehtimalları daha da artırıb.
Bu baxımdan, Sarkisyanın Kremldə Qarabağla bağlı tapşırıqlar
alacağı şübhəsizdir. Burada iki mühüm aspekt nəzərdən qaçmır.
1. Hesab etmək olar ki, Moskva Qarabağda artan
gərginlikdən narahatdır. Rusiya Yaxın Şərqdə döyüşərkən sərhədləri
dibində “ikinci cəbhə”nin açılmasını istəmir və bunun üçün münaqişə
tərəflərini masaya dəvət edir.
Bu kontekstdə Rusiya xarici işlər nazirinin müavini Qriqori
Karasinin Bakı səfəri diqqət çəkir. Vladimir Putin bir neçə gün
öncə Karasini Azərbaycana göndərərək, rəsmi Bakını müharibədən
çəkinməyə dəvət edib. Sarkisyanın Moskvaya dəvəti də eyni məqsədə
xidmət edir.
Moskvanın 2014-cü ilin “avqust müharibəsi”ndən sonra prezidentləri
Soçidə bir araya gətirməsi və gərginliyin azaldılması təcrübəsi
var. Görünür, Rusiya eyni təcrübəni təkrarlamaq niyyətindədir. Bu
həm də Dağlıq Qarabağ münaqişəsində təşəbbüsü Qərbin əlinə verməmək
gedişidir. Hansı ki, ABŞ münaqişənin həlli üçün son dövrlər
fəallığını artırıb, yaxud belə bir görüntü yaradır. Hər iki tərəf –
ABŞ və Rusiya Cənubi Qafqaza hakim olmaq üçün Bakını yanına
çəkməyin vacib olduğunu anlayır. Onlar həm də anlayır ki, Bakı
yalnız ərazi bütövlüyünün bərpası halında tərəf seçəcək.
“Hər şey bu qədər sadədir” deyə bilərik. Lakin
Türkiyənin Rusiya ilə üz-üzə gəlməsi, İrana qarşı sanksiyalar
aradan qalxandan sonra Tehranın regional güc olmaq uğrunda hərəkətə
keçməsi, ABŞ-ın Azərbaycana marağının artması və hər bir tərəfin
Dağlıq Qarabağ münaqişəsindən siyasi maraqlar üçün istifadə etməyə
çalışması indiyə qədərki “sadə düsturu”
mürəkkəbləşdirir.
2. Mürəkkəbləşən regional situasiya fonunda
Sarkisyanın Moskvaya çağırılması ikinci aspekti önə çıxarır.
Kreml İrəvana cəbhə xəttində şiddəti artırmaq tapşırığı
verəcək.
Azərbaycan Türkiyə-Rusiya gərginliyində qardaş Ankaraya öz
dəstəyini nümayiş etdirdi. Bununla yanaşı, Londonda “Suriya və
regiona dəstək” humanitar konfransda iştirak etməklə Yaxın Şərq
böhranında dolayısı ilə mövqeyini ortaya qoydu. Azərbaycan
rəhbərliyinin bu manevrlərini Rusiya mediası “Moskva Bakını
itirir” deyə təqdim etdi. Bunun ardınca, ABŞ-ın
Azərbaycanla “buzları əritmək” üçün atdığı addımlar regionda Rusiya
maraqlarının qarşısını kəsir. Artıq Bakı Rusiyanın Dağlıq Qarabağ
münaqişəsində müsbət addım atmayacağını anlayır. Xüsusilə bir sıra
cəbhələrdə müharibə aparan Moskvanın hazırda buna ayıracaq nə
vaxtı, nə də marağı var. Rusiyanın Ermənistana hərbi texnika
verməsi də Kremlin münaqişəyə dair mövqeyini bir daha göstərdi.
Belə bir situasiyada Bakı haqlı olaraq öz milli maraqlarının tələb
etdiyi kontekstdə çıxış etməlidir. Moskva hazırda Bakıya verməyə
heç nəyi olmasa da, onu itirmək də istəmir. Belə olanda “təzyiq
dili” işə düşür.
Ehtimal etmək olar ki, Karasin Bakıya Kremlin müəyyən istəklərini
gətirmişdi və hansısa məsələlərdə razılıq əldə olunmayıb.
Sarkisyanı Moskvaya dəvət edən Kreml də Dağlıq Qarabağ üzərindən
Azərbaycana təzyiq etmək niyyətindədir. Hər-halda Sarkisyanın sabah
nəzərdə tutulan Moskva səfərindən sonra cəbhədəki situasiyanın
hansı istiqamətdə inkişafı birinci, yoxsa ikinci aspektin doğru
olacağını göstərəcək.
“Bakı-Ankara-Tehran” ittifaqına qarşı “Kreml-İrəvan”
həmləsi
Putinin Sarkisyana verəcəyi tapşırıqlar arasında ən çox ehtimal
olunan məsələlərdən biri də Bakı-Ankara-Tehran üçlüyünün
yaranmasına dair gözləntilər ola bilər.
İran üzərindən sanksiyalar aradan qalxandan sonra bu ölkəni
qazanmaq üçün regional mübarizə qızışdı. Azərbaycan lideri İlham
Əliyev çoxlarını qabaqlayaraq diplomatik manevrlərini işə saldı və
Tehran səfəri ilə İran-Azərbaycan münasibətlərinin gələcək
mərhələsini konkretləşdirdi. İranın Suriya məsələsində Rusiyanın
yanında olması regionda “Bakı-Moskva-Tehran” ittifaqının
yaranmasına dair iddiaları gücləndirdi. Bu Ermənistanı proseslərdən
kənarda qoymaq gedişi idi, lakin həm də Türkiyəyə qarşı olan addım
kimi təqdim olunurdu və Moskva belə bir ittifaqdan məmnun
görünürdü.
Türkiyə baş naziri Əhməd Davudoğlunun İrana səfəri isə regional situasiyanı dəyişdi və “Bakı-Ankara-Tehran” üçlüyünün ittifaq yaratması ehtimalını önə çıxartdı. Təbii ki, İranın regionda Türkiyə ilə toqquşması, Suriya məsələsində ciddi fikir ayrılığının olması, eləcə də Yaxın Şərqdə baş verən proseslərdə və Səudiyyə Ərəbistanı ilə toqquşan maraqlarda Tehran-Moskva maraqlarının çarpazlaşması “Bakı-Ankara-Tehran” ittifaqının yaranması ehtimalını zəiflədir. Lakin Davudoğlunu Tehranda qarşılayan Həsən Ruhaninin “Suriya məsələsində maraqlarımızın eyni olması bizim Rusiyanı həmişə dəstəkləyəcəyimiz demək deyil” tezisini irəli sürməsi və Türkiyəyə dair müsbət mesajlar verməsi proseslərə fərqli baxışı ortaya qoydu. Deməli, Moskva və Tehranın toqquşan maraqları çarpazlaşan maraqlardan daha çoxdur. Belə olan halda “Bakı-Ankara-Tehran” ittifaqının perspektivinə dair ümidləri artırır. Bu ittifaqa Tiflisi də əlavə etsək, regionda Rusiyaya qarşı daha böyük gücün yaranması deməkdir.
Belə bir situasiyada Sarkisyanın Kremlə dəvəti Rusiyanın regionun
dəyişən siyasi tarazlığında “Kreml-İrəvan” ittifaqını gücləndirmək
və yeni nizam formalaşdırmaq gedişidir.
Bakıda sonra İran, Türkiyə və Gürcüstana qarşı: Sarkisyan
nəyin hesabatını verəcək?
Sarkisyanın səfərində üçüncü istiqamət Gürcüstanın Azərbaycanla
enerji razılığına gəlməsi ola bilər. Rusiya “Qazprom”u Gürcüstan
bazarına salmaqla Azərbaycanın Qərbə yolunu kəsmək, Ermənistanla
quru yolunu təmin etmək və beləliklə regiona tamamilə hakim olmaq
istəyirdi. Lakin Bakının manevrləri Kremlin planlarını alt-üst
etdi.
Rusiyanın Gürcüstan həmləsinin boşa çıxması ilə Tiflisin Bakı-Ankara-Tehran oxuna tərəf çevrilməsi və Moskvanın mövqelərinin zəifləməsi baş verdi. Hazırda Rusiyanın şahmat taxtasında bircə piyadası – Ermənistan qalıb və hər an İran bu piyadanı onun əlindən ala bilər. Çünki Gürcüstan gedişinin iflas olması Ermənistanı məcburi olaraq İrana yaxınlaşdıracaq. Tehran üçün şahmat taxtasında pat vəziyyətinə düşmüş Rusiya şahını endirmək gələcək regional maraqları üçün əhəmiyyətlidir.
Belə görünür ki, Sarkisyanı Moskvaya dəvət edən Kreml son
kartlarını oyuna soxur.
a) Moskva Ermənistanın İran çətiri altına
düşməməsi üçün Sarkisyanla üzbəüz təmas quraraq, tapşırıqlarını
birbaşa onun qulağına pıçıldayır. Bu həm də Sarkisyana
“mərkəzdənqaçma” halında onu gözləyən acınacaqlı taleyi aydın ifadə
etməkdir.
b) Moskva Cavaxetiya erməniləri kartından istifadə
edərək, Ermənistanı Gürcüstan qarşı da qaldıra və Tiflisə təzyiq
edə bilər.
c) Ermənistan-Türkiyə sərhədində hansısa yeni hərbi hərəkətliliyin artması üçün birbaşa danışıqlar aparıla bilər. Bu Moskva üçün həm Türkiyənin Azərbaycan üzərindən Cənubi Qafqaza girişinə qarşı alternativ addım imkanı yaratmaqdır. Yəni Türkiyə regiona dair açıq həmlələrə əl atacaqsa, Rusiya həm Dağlıq Qarabağ üzərindən Ankaranın qardaşı Bakını, həm də Ermənistan üzərindən Türkiyənin özünü hədəfə ala bilər. İrəvan kulislərində Rusiyanın Ermənistanı Türkiyəyə qarı planlarına daxil etməklə fəlakətə sürüklədiyi haqda pıçıltılar artıq mediaya sızmaqdadır. Hesab etmək olar ki, Vladimir Putin Sarkisyandan bu pıçıltıların da cavabını istəyəcək.
Asif Nərimanlı
-
Nida Xəbər 10:16
General Mirzəyev və 40 məmura sanksiya təklif edilir - SİYAHI
-
Qarabağ 10:06
Araikin efirə getməyən müsahibəsi haqda sensasiyalı iddia: Nikol dərhal nə edib?
-
MDB09:45
Rusiya bu ərazidə nüvə silahı yerləşdirib - Şok iddia
-
Nəqliyyat08:25
Bakının bu yollarında tıxac var - SİYAHI
-
Magazin108:10
Şəbnəmin prodüseri vəfat etdi
-
Qoroskop07:39
Bu 3 bürcün may ayında bəxti gətirəcək
-
Magazin107:25
Məşhur aktyor Serenayla tərəf müqabili olacaq
-
Ekopublika.az02:19
Hansı sahələr daha çox varlandırır? - “Forbes” açıqladı