Əli Əhmədov YAP-ın 700 mininci üzvünə vəsiqəni təqdim etdi - (YENİLƏNİB) FOTOLAR

Yeni Azərbaycan Partiyasına (YAP) üzv olanların sayı 700 min nəfərə çatıb.

Publika.az xəbər verir ki, bununla bağlı bu gün YAP-ın Mərkəzi Qərargahında toplantı keçirilib.

Tədbirdə çıxış edən Yeni Azərbaycan Partiyasının (YAP) sədr müavini-partiyanın icra katibi, Baş nazirin müavini Əli Əhmədov bildirib ki, hər il orta hesabla 25 min insan YAP-a üzv qəbul olunur: “Onların arasında gənclər üstünlük təşkil edir. Son illər isə tələbə və ali təhsilli gənclər arasında YAP-a üzv olanların sayı artıb”.

Ə.Əhmədov qeyd edib ki, belə bir günün Ümummilli Lider Heydər Əliyevin anadan olmasının 93-cü ildönümü ərəfəsinə təsadüf etməsi çox xoş andır: “YAP-ın sıraları kifayət qədər genişdir. Hakim Partiya sürətlə öz sıralarını genişləndirir. Əlbəttə, bu, Ümummilli Lider Heydər Əliyevin ideyalarına və cənab Prezidentin həyata keçirdiyi siyasətə dəstəkdən xəbər verir. Gənclərin YAP-ın sıralarına üzv olmağını da təbii hesab edirəm. Ayrı-ayrı idarələrdə, qurumlarda xeyli sayda gənclər önə çəkilir”.

Qeyd edək ki, tədbirdə YAP-ın İcra katibinin müavinləri Siyavuş Novruzov, Mübariz Qurbanlı, millət vəkilləri Eldar İbrahimov, Məlahət İbrahimqızı və mətbuat nümayəndələri iştirak ediblər.

Daha sonra Əli Əhmədov YAP-ın 700 mininci vəsiqəsini Azərbaycan Dövlət Tibb Universitetinin tələbəsi, qəbul imtahanlarında 690 bal toplayan prezident təqaüdçüsü Məmmədova Xatın Fərhad qızına təqdim edib.

Vasif Həsənli