Azərbaycan səfirliyi Şəbəkə Forumuna ev sahibliyi edib
Bizi izləyin

Qırmızı.az

Azərbaycan səfirliyi Şəbəkə Forumuna ev sahibliyi edib

Azərbaycanın Cənubi Afrika Respublikasındakı Səfirliyi Milli Mətbuat Klubunun növbəti Şəbəkə Forumuna ev sahibliyi edib. Tədbirdə CAR-ın nüfuzlu kütləvi informasiya vasitələrinin nümayəndələri ilə yanaşı, diplomatik missiya rəhbərləri və üzvləri də iştirak edib.

İlk olaraq çıxış edən Milli Mətbuat Klubunun sədri xanım Tanya De Vente-Bijker bu görüşün müxtəlif profillərdə kütləvi informasiya vasitələri nümayəndələrinin CAR üçün gizli xəzinə olan Azərbaycanı yaxından tanıması və təbliğinə xidmət etdiyini bildirib.

Tədbirin açılış nitqində səfir Elxan Poluxov qonaqlara Azərbaycanın tarixi, zəngin mədəni irsi, tolerantlıq ənənələri barəsində məlumat verib. Bu xüsusda, səfir 1918-ci ildə yaranan Şərqdə ilk demokratik Respublika olan Azərbaycan Cümhuriyyətinin 23 aylıq qısa, lakin şanlı tarixindən bəhs edərək, Cümhuriyyətimizin Azərbaycanın dövlətçilik ənənələrinin formalaşmasında əvəzsiz rol oynadığı bildirib. Azərbaycanın yenidən müstəqilliyini bərpa etdikdən sonra Ümummilli lider Heydər Əliyevin uzaqgörən siyasəti sayəsində dünyanın sayılıb-seçilən dövlətləri sırasına qoşulduğunu və Ulu Öndərin həyata keçirdiyi islahatlar nəticəsində dövlətimizin nəzərəçarpan inkişaf səviyyəsinə nail olduğunu qeyd edib. Həmçinin, Ümummilli lider Heydər Əliyevin banisi olduğu inkişaf yolu strategiyasının Prezident İlham Əliyev tərəfindən layiqincə davam etdirildiyini əlavə edib. Səfir həmçinin ölkəmizin ən ağrılı problemi olan və ümumilikdə regional inteqrasiya proseslərinə mane olan Ermənistan-Azərbaycan münaqişəsi barəsində məlumat verərək, mətbuat nümayəndələrini Azərbaycanın ədalətli mövqeyini dəstəkləməyə çağırıb.

CAR və Azərbaycan arasında sürətlə inkişaf edən əlaqələrdən danışan E.Poluxov bu prosesdə kütləvi informasiya vasitələrinin mühüm rol oynadığını və bu xüsusda keçən il bir qrup Cənubi Afrikalı jurnalistin ölkəmizə səfər etdiklərini diqqətə çatdırıb və yerli mətbuatda silsilə olaraq Azərbaycan və onun turizm potensialına həsr edilmiş məqalə və telereportajların çıxması ilə əlaqədar yerli jurnalistlərə öz minnətdarlığını bildirib. Rio-2016 Olimpiya oyunlarında hər iki ölkə idmançılarının yüksək nəticə göstərdiyinin deyən səfir CAR şahmatçılarının gələn ay Azərbaycanda keçirilən Beynəlxalq Şahmat Olimpiadasına qatılacağını yüksək qiymətləndirib. Çıxışın sonunda E.Poluxov tədbir iştirakçılarını ölkələr arasında gedən siyasi, iqtisadi, sosial, mədəni və digər prosesləri yaxında izləyərək işıqlandırmağa dəvət edib.

Daha sonra Azərbaycan-Cənubi Afrika Ticarət Palatasının sədri Mayls Çambers Azərbaycanın iqtisadi potensialı və iki dövlət arasında iqtisadi əlaqələrin hazırkı durumu və perspektivləri barəsində geniş məlumat verib.

Qeyd edək ki, 1975-ci ildə əsası qoyulmuş və 400-ə yaxın üzvü olan Milli Mətbuat Klubu Cənubi Afrikanın ən iri jurnalist birlikləri sırasındadır.

Oxumağa davam et
Reklam
Reklam

Gündəm