Qırmızı.az

“İrəli” nümayəndəsi Yunanıstan-Azərbaycan Gənclər Mərkəzinin sədri ilə görüşüb

17 Aprel 2014 17:08

“İrəli” İctimai Birliyinin İnsan Resursları üzrə katibi Aydan Əliyeva Yunanıstanın paytaxtı Afina şəhərinə səfəri çərçivəsində Yunanıstan-Azərbaycan Gənclər Mərkəzinin sədri Yuannis Papaqriqori ilə görüşüb.

Publika.Az-ın məlumatına görə, görüş zamanı Aydan Əliyeva “İrəli” İctimai Birliyinin fəaliyyət istiqamətləri, təşkilatın strukturu, müxtəlif sahələrdə gəncləri əhatə edən yerli və beynəlxalq layihələri haqda ətraflı məlumat verib.

Görüşdə həmçinin “İrəli” nümayəndəsi Azərbaycanda uğurla aparılan gənclər siyasətindən, gənclər üçün yaradılan şəraitdən danışıb. Qeyd olunub ki, bu gün dövlət tərəfindən gənclərin hərtərəfli inkişafı üçün bütün imkanlar yaradılıb, gənclər bütün sahələrdə böyük uğurlara imza atır və Azərbaycanı beynəlxaq tədbirlərdə layiqincə təmsil edirlər.

Qeyd edək ki, Yunanıstan - Azərbaycan Gənclər Mərkəzi 2014-cü ilin yanvar ayından fəaliyyət göstərir.