Şimal təhlükəsi - Amerikalı diplomat nəyi nəzərdə tutur?

ABŞ-ın Azərbaycandakı səfiri Riçard Morninqstarın Ukrayna böhranı fonunda Dağlıq Qarabağ açıqlaması xüsusi diqqət çəkdi. Amerikalı diplomat artıq ikinci dəfədir ki, belə bir fikri ortaya qoyur. Bu həm də “Rusiya təhlükəsi” dalğası ilə paralel olaraq da nəzəri öz üzərinə çəkir.

“Ukraynada baş verənlər Dağlıq Qarabağ münaqişəsinin artıq birdəfəlik həllini tələb edir”.

Morninqstar belə deyir. Lakin diplomatik dillə, amma bir qədər açıq formada deyilən bu sözlərlə “Ağ Ev”-in Bakıdakı elçisi nəyi nəzərdə tutur? Vaşinqton Bakıya Şimal təhlükəsindən və Kiyevdən sonra eyni müstəvisinin Cənubi Qafqaza köçürüləcəyinin “SOS”-nu verir, yoxsa həqiqətənmi münaqişənin həllinə çalışır?

“Şərq-Qərb” Araşdırmalar Mərkəzinin rəhbəri Ərəstun Oruclu Publika.Az-a açıqlamasında bildirib ki, amerikalı diplomat bununla daha çox Rusiya təhlükəsinə diqqət çəkir: “Bu gün Ukraynada Krımı ilhaq etməklə problemi Rusiya yaratdı. Azərbaycanın da faktiki olaraq buna bənzər problemi var və Şimaldan Bakının ünvanına təhdidlər səslənməkdədir. Şübhəsiz ki, belə olan şəraitdə münaqişənin həll olunmamış qalması təhdidlərin reallaşması və bu təhdidlərin daha geniş miqyaslı istifadə edilməsinə imkanlar tanıyır. Səfir bunu nəzərdə tutur”.

Lakin politoloq qeyd edib ki, indiki mərhələdə münaqişənin həlli dalana dirənib. Onun sözlərinə görə, atəşkəsin də müddəti başa çatır: “Minsk qrupunun həmsədrləri faktiki olaraq ən yaxşı halda sülhü qoruyub saxlaya bilər. Ona görə də burda münaqişənin həlli ilə bağlı perspektiv görmürəm”.
Ə. Oruclu bildirib ki, Azərbaycanın Rusiyanın iradəsinə boyun əyməyi faktiki olaraq suverenliyin itirilməsidir: “Təkcə Gömrük İttifaqına qoşulsaq bu itki reallaşacaq. Hələ mən vətəndaşlıq məsələsini, Dağlıq Qarabağ münaqişəsini demirəm. Rusiyanın niyyəti bəllidir. Belə bir dövlətlə dost olmaq müstəqilliyindən imtina etmək deməkdir”.

Asif