“Neftçi” polisə müraciət etdi - RƏSMİ AÇIQLAMA

Avropa Liqasının “Neftçi” – “Çixura” oyunundan əvvəl biletlərin “qara bazar”da satılması faktı aşkarlanıb.

1 manatlıq biletlər dəyərindən qat-qat baha, 7-10 manata satılıb.

“Neftçi” rəhbərliyi baş verənlərlə bağlı tədbir görmək niyyətindədir. Bunu Publika.az-a verdiyi açıqlamada komandanın mətbuat xidmətinin rəhbəri Gündüz Abbaszadə bildirdi. Klub rəsmisi bu kimi hadisələrin qarşısını almaq üçün polisə müraciət edəcəklərini qeyd etdi:

“Təəssüf ki, “Qarabağ” – “Zalsburq” matçından öncə olduğu kimi, “Neftçi” – “Çixura” görüşündən də əvvəl bəzi şəxslər “qara bazar”da kütləvi halda bilet satdılar. 1 manatlıq bilerlərin 3, 5, hətta 10 manata satılması faktı da aşkarlanıb.

Biz bununla bağlı polisə müraciət etmişik. Onlar da öz tərəflərindən lazımi tədbiri görürlər. Bununla bağlı mübarizə aparmağa çalışsaq da, onlar öz işlərini görürdülər.

İşbazların qarşısını almaq üçün ən yaxşı yol polisə müraciətdir. Ümid edirəm ki, növbəti oyunlarda belə hal təkrarlanmaz”.

Aygün İlqarqızı