Fuad Muradov: “Separatçı rejimlərə dəstək İrəvanın adətidir”

“Ermənistandan Krıma təyyarə reysinin açılması bütün beynəlxalq normaların pozulmasıdır. İrəvanın buna məhəl qoymaması bir daha Ermənistanın yürütdüyü siyasətin mahiyyətini açır və işğalçı dövlət olduğunu göstərir”.

Publika.az xəbər verir ki, bu barədə millət vəkili Fuad Muradov özünün rəsmi “facebook” səhifəsində yazıb.

F. Muradov qeyd edib ki, Ermənistanın separatçı rejimlərə dəstək verməsi ənənəvi siyasətdir.

“Bu gün Simferopol-İrəvan təyyarə reysinin açılması barədə xəbəri oxudum. Krımın “nəqliyyat naziri” Simferopol-İrəvan reysinin açılmasını təsdiq edib. Ermənistan bundan əvvəl Azərbaycanın işğal olunmuş ərazisi olan Xankəndidə hava limanı açmağa cəhd etmişdi. Bu növbəti fakt bir daha göstərir ki, İrəvanın separatçı rejimlərə dəstək verməsi onun ənənəvi dövlət siyasətidir. Bu isə Qərbin separatçı rejimləri dəstəkləyən ölkələrə qarşı elan etdiyi sanksiyalarının Ermənistana da tətbiq olunmasını zəruri edir. Ukraynanın ərazisi olan Krıma istənilən reys qanunsuz hesab olunur. Ukrayna 2014-cü ilin mart ayından “Simferopol” hava limanının bağlandığını rəsmən bəyan edib”, - deyə o bildirib.

Asif