Nida.az
Minsk qrupu, yoxsa “5-lik SŞ” - MÖVQE
Prezident İlham Əliyevin Almaniyaya səfəri zamanı bu ölkənin kansleri Angela Merkelin Dağlıq Qarabağla bağlı açıqlaması xüsusi maraqla qarşılandı. Xanım kansler ölkəsinin münaqişənin həllinə məsul olan ATƏT-in Minsk qrupunun həmsədri olmaq istəyindən bəhs etdi.
Qeyd edək ki, ATƏT-in Minsk qrupunun həmsədrliyində ABŞ, Fransa və
Rusiya təmsil olunur. 1992-ci ildə yaradılan bu missiya 22 il
keçməsinə baxmayaraq, münaqişənin həllində ciddi dönüş yarada
bilməyib. Bəzi ekspertlərə görə, buna səbəb olan amillər arasında
Qərb və Rusiya arasındakı qarşıdurma da var. Son zamanlar isə iki
cəbhə arasındakı qarşıdurma kəskin dönəmə qədəm qoyub və bunun
Minsk qrupunun fəaliyyətinə də təsirsiz ötüşməyəcəyi gözlənilir.
Azərbaycan üçün əsas olan münaqişənin həllinin tezləşdirilməsidir.
Bu baxımdan, Minsk qrupu formatında dəyişiklik həll prosesinə
müsbət mənada təsir edə bilər. Lakin Avropanın lider ölkəsi olan
Almaniyanın Minsk qrupunda təmsil olunması praktiki olaraq
mümkündürmü? Məsələ gündəmə gələrkən qarşılaşdığımız ilk sual
budur. Azərbaycanda isə məsələyə yanaşma birmənalı deyil.
Almaniyanın həmsədrliyi ATƏT qarşısında
qaldırılacaq
ATƏT PA-da Azərbaycan nümayəndə heyətinin üzvü, millət vəkili
Azay Quliyev Prezidentin Almaniya səfərindən sonra
Berlin və Ankaranın Minsk qrupunun həmsədrliyinə daxil edilməsi
təklifini irəli sürüb.
A. Quliyev Almaniya ilə yanaşı Türkiyənin Minsk qrupunun
həmsədrliyinə gətirilməsi barədə ATƏT PA-nın fevral ayında Vyanada
keçiriləcək qış sessiyasında məsələ qaldıracağını bildirib.
“Almaniya kansleri xanım Angela Merkelin cənab Prezident İlham
Əliyevlə yanvarın 21-də keçirtdiyi brifinqdə Dağlıq Qarabağ
münaqişəsinin həlli ilə bağlı ölkəsinin və Avropa Birliyinin daha
fəal olacağı haqqında səsləndirdiyi fikirlərini təqdir edirəm.
Düşünürəm ki, Almaniyanın ATƏT-in Minsk qrupunun həmsədrliyinə
gətirilməsi məsələsi Xarici İşlər Nazirliyi tərəfindən rəsmi olaraq
müzakirəyə çıxarılmalı və bu istiqamətdə müvafiq addımlar
atılmalıdır. ATƏT PA-nın gələn ay Vyanada keçiriləcək qış
sessiyasında həm Almaniyanın, həm də Türkiyənin
Ermənistan-Azərbaycan, Dağlıq Qarabağ münaqişəsinin Minsk həll
prosesinə yaxından cəlb edilməsi, 3 ölkədən ibarət həmsədrlik
institutunun dəyişdirilərək “5-lik Sədrlər Şurası” (SŞ) ilə əvəz
olunması haqqında məsələ qaldırmağı planlaşdırıram”, - deyə millət
vəkili təklifinin mahiyyətini açıqlayıb.
“Rusiya, ABŞ və Fransanı dəyişməklə məsələnin həllini
zəiflətmiş olarıq”
Milli Məclisin Müdafiə və təhlükəsizlik komitəsinin üzvü
Aydın Mirzəzadə Publika.az-a açıqlamasında bunun
praktiki olaraq baş verməsini çətin hesab edir. Onun sözlərinə
görə, Minsk qrupunun həmsədr ölkələri Cənubi Qafqazdakı dövlətlərlə
sıx bağlılığı olan və nüfuzlu ölkələrdən yaranmış qurumdur:
“Almaniya güclü ölkədir, amma Cənubi Qafqaz regionunda aktiv
işləyən dövlətlərdən deyil. Yaxud burada olan ölkələrlə xüsusi
münasibətləri yoxdur. Biz Rusiya, ABŞ və Fransanı digər ölkələrə
dəyişməklə əslində məsələnin həllini zəiflətmiş olarıq. Proses
ölkələrin müəyyən dövrdən bir növbələşməsi ilə aparıla bilməz.
Qarabağ probleminin həllinə təsir edə bilən və nəticəni onlardan
tələb edə biləcəyimiz ölkələr Rusiya, Fransa və ABŞ-dır. Bu
baxımdan, ən optimalı bu üç ölkədir”.
A. Mirzəzadə həmsədr ölkələri dəyişdirməkdənsə, onlardan daha fəal
işləməyi tələb etməyin daha məqbul olduğunu düşür.
“Biz bu qrupdan imtina etsək, problemi sonsuzluğa qədər uzadar və
onun həlli potensialını azaldarıq. Bundan başqa, həmsədrləri
dəyişsək məsuliyyəti konkret heç kəs daşımayacaq. Həmsədrliyi
sadəcə növbətçilik xarakteri daşıyan amorf bir vəziyyətə gətirib
çıxarmaq olmaz”, - deyə o bildirib.
“Üçlük beşliyə çevriləndə qarşıdurma və savaş daha da
genişlənəcək”
Eyni komitənin digər üzvü Zahid Oruc da
Publika.az-a məsələni şərh edərkən bu təklifin əvvəllər də olduğunu
bildirib.
“Zaman-zaman Türkiyə və Almaniyanın ATƏT-in Minsk qrupuna cəlb
olunması məsələsi səsləndirilib. Azay Quliyev Qarabağ probleminin
həllinin hazırki ölü nöqtədən tərpənməsi üçün mövqe axtarışındadır.
Onun bu təklifi alqışa layiqdir. Amma biz bir neçə məqamı nəzərə
almalıyıq. Həm Almaniya, həm də Türkiyə Minsk qrupunun üzvləridir.
Lakin qrupda yer alan bəzi dövlətlərin Qafqazda xüsusi maraqları
yoxdur. İstəsə də təsir edə bilməzlər. Məsələn, Finlandiya format
təşkil olunanda 11-liyin içərisində yer alıb. Digər tərəfdən,
ATƏT-in Minsk qrupunda həmsədrlik institutu təsis olanda konsensus
prinsipi tətbiq edilib. Yəni Ermənistan və Azərbaycan tərəfindən
hər-hansı biri razılıq verməsə, həmin format dəyişdirilə bilməz.
Almaniya və yaxud Türkiyənin prosesə qoşulmasına Ermənistan razılıq
verərmi?
Təbii ki, yox. Digər tərəfdən Almaniyanın özünün rol alması ABŞ, Rusiya, Fransanı həqiqətənmi razı salacaq? Onlar da bu prosesə müqavimət göstərəcək. Ən önəmlisi üçlük beşliyə çevriləndə, problem bir az da beynəlmiləşəndə onlar arasında qarşıdurma və savaş daha da genişlənəcək. Sıra sayını artırmaqla problemi həll edəcəyimizi düşünmək o qədər də uğurlu nəticə verməyə bilər”, - deyə komitə üzvü qeyd edib.
Z. Oruc hesab edir ki, üç həmsədr ölkənin fəaliyyətinin məqbul
olmadığına dair təbliğatın aparılması informasiya, siyasi və
psixoloji müharibədə daha xeyirlidir: “Bunu Avropa Şurasında,
ATƏT-də qaldırmaq faydalıdır. Üç həmsədr ölkəsinin yarıtmaz
fəaliyyət apardığını, Ermənistana hər hansı sanksiya tətbiq etmək
fikrindən uzaq olduğunu beynəlxalq təşkilatların diqqətinə
çatdırmalıyıq”.
“Almaniya Fransanı əvəz edə bilər, lakin...”
Keçmiş təhlükəsizlik zabiti, “Trend” informasiya agentliyinin
eksperti Arzu Nağıyev Almaniyanın münaqişənin
həllində birbaşa iştirakının Azərbaycanın xeyrinə olduğunu hesab
edir. Lakin o, bunu reallaşdırmağın bir qədər çətin olduğunu
deyir.
Keçmiş təhlükəsizlik zabiti Publika.az-a açıqlamasında Minsk qrupunun 22 il müddətdə heç bir irəliləyişə nail olmadığını bildirib: “ATƏT-in Minsk qrupu məhz Dağlıq Qarabağ münaqişəsinin ATƏT-in prinsipləri əsasında danışıqlar və sülh yolu ilə həll etmək üçün yaradılmış qurumdur. Bu qurum 1992-ci ildə Helsinkidə yaradılıb. Qrupun üzvləri Azərbaycan, Ermənistan, Rusiya Federasiyası, Amerika Birləşmiş Ştatları, Fransa, Polşa, Almaniya, Türkiyə, Belarus, Finlandiya və İsveçdir. 1996-cı ildən Rusiya, ABŞ və Fransa həmsədr kimi qurumda fəaliyyət göstərir və onların bilavasitə vəzifələri Ermənistan-Azərbaycan, Dağlıq Qarabağ probleminin dinc vasitələrlə həll edilməsinə kömək etməkdən ibarət olmalıdır. Təəssüf ki, buna nail ola bilmədilər və 20 ildə heç bir irəliləyiş yoxdur”.
Onun fikrincə, Almaniyanın həmsədrlik məsələsi reallaşarsa, üç
dövlətdən birini əvəz edə bilər.
“Özəl maraqlar olduğuna görə Rusiya və ABŞ qrupdan çıxmayacaq.
Almaniyaya yerini verə biləcək həmsədr ölkə Fransa ola bilər. Lakin
ermənilər buna heç vaxt razılaşmaz. Digər tərəfdən, Almaniya
həmsədr olsa belə bu prinsiplərin dəyişəcəyi demək deyil. Yəni bu,
inandırıcı görünmür”, - deyə A. Nağıyev qeyd edib.
Asif Nərimanlı
-
Magazin202:22
Məşhur model çimərlikdə çılpaq pozalar verdi - FOTO
-
Nəqliyyat01:00
ŞOK İDDİA: Dubayda su altında qalan avtomobillər Azərbaycana gətirilə bilər - VİDEO
-
Magazin100:45
“Səhvlərinizin əllərindən öpün”
-
MDB00:30
Azərbaycanlı milyarder Rusiyanın ən zəngin adamı oldu
-
Qoroskop00:15
Günün ULDUZ FALI: münasibətlər gərginləşə bilər
-
MDB18 Aprel 23:12
Bu ölkədə falçı və cadugərlərlə bağlı SƏRT QƏRAR VERİLƏCƏK
-
Magazin118 Aprel 22:48
Məşhur xanəndə ONLARI QINADI: "Bu saat necə gəldi geyinirlər" - FOTO
-
Səhiyyə18 Aprel 22:36
Ürək ritminin pozulmasının YENİ TƏHLÜKƏSİ: Hər beşinci insan...