Tabloid.az
“Qadın obrazını oynaya bilmədim” - BRİFİNQ
Əməkdar artist, Gənc Tamaşaçılar Teatrının aktyoru Şövqü Hüseynov “Brifinq”in qonağıdır. Prezident mükafatçısı ilə söhbətə aktyorların məvacibinin dolanışıq üçün yetərli olub-olmaması və sənət adamlarının sosial vəziyyəti ilə başladıq. Aktrisa Şəbnəm Hüseynova ilə evli olan aktyor ailədəki sənət söhbətindən danışdı, teatrdakı intriqalara toxundu. Uzun illər Bakı Kamera Teatrında çalışan Şövqü Hüseynov teatrı şou səhnələrinə qurban verməməsinin səbəblərinə aydınlıq gətirdi.
“Deməzdim ki, sənət adamları ehtiyac içində yaşayır”
N.Ehlamqızı: Şövqü bəy, bu həftə xalq şairi Vaqif
Səmədoğlunu itirdik. O, uzun müddət ağır xəstəlikdən əziyyət
çəkirdi. Dövlətin maddi dəstəyi ilə İsraildə bir müddət müalicə
olundu, təəssüf ki, müsbət nəticə alınmadı. Mərhum Xanım
Qafarovanın timsalında gördük ki, heç də sənət adamlarının həyatı
tamaşaçıların gördüyü kimi parlaq deyil. Aldıqları məvacib barədə
azdan-çoxdan məlumatlıyıq, amma ağır durumda yaşayanların sosial
vəziyyəti barədə ictimaiyyət bixəbərdir. Ümumiyyətlə, istər
Mədəniyyət və Turizm Nazirliyinin, istərsə də dövlətin sənət
adamlarına olan qayğısından razısınız?
- Rəhmətlik Xanım Qafarova ilə birlikdə uzun müddət işləmişəm. Onun
ətrafında olan insanların prosesdən xəbəri vardı. Vaxtaşırı baş da
çəkirdik. Dövlət, o cümlədən Mədəniyyət və Turizm Nazirliyi
tərəfindən müxtəlif formada yardım olurdu. Allah uzaq eləsin,
özümün başıma nə isə gəlsə, gedib kiməsə bu barədə danışmaqdan
utanaram. Xarakter etibarilə heç kəsə problemimi açıb deyə
bilmərəm. Allah verən paydır, kimə nə qismətdir o olacaq.
Jurnalistlər sağ olsun, məsələni ictimailəşdirdilər. Gözəl
aktrisamız Gülnar Salmanova xəstədir, ona da həm teatr, həm də
nazirlik tərəfindən diqqət yetirilir. Elə bir haldadır ki, xoş
sözdən, yoluxub yanında 10-15 dəqiqə oturmaqdan başqa əlimizdən bir
şey gəlmir. Deməzdim ki, sənət adamları ehtiyac içində yaşayır.
Hacı Zeynalabdin Tağıyevin qızının vəziyyətində deyillər. İmkan
daxilində köməklik göstərilir. Allah şəfalarını versin.
“Teatrımızın inkişafını təqaüdə göndərilən sənətkarlarsız təsəvvür edə bilmirəm”
Aqil Lətifov: Bu yaxınlardan xalq artisti Valeh
Kərimov 70 yaşı olduğuna görə təqaüdə göndərildi. İllərini sənətə
vermiş şəxsin teatrdan uzaqlaşdırılması sərt reaksiyalara səbəb
oldu. Bu məsələdə Sizin mövqeyiniz necədir?
- Nazirliyin müvafiq qərarı var, hər tərəfdə gəncləşmə prosesi
gedir. Amma hesab edirəm ki, bu qərar üzərində fikirləşməli,
incəsənətə aid hissəsinə yenidən baxmalıdırlar. Hər bir gənc və
orta yaşlı aktyor kiməsə baxıb öyrənməlidir axı. Düzdür, onların
heç biri teatrdan birdəfəlik uzaqlaşmır. Mənim ustadım Cənnət
Səlimovanın 70 yaşı olanda baş rejissor vəzifəsindən getdi, amma
rejissor kimi işini görür. Əgər sənətkara ehtiyac varsa, o qərara
fikir verilməməlidir. Valeh Kərimova ehtiyac var. İstənilən teatrda
rolunu oynaya biləcək. Səhv etmirəmsə, Ağdam Teatrından artıq
təklif gəlib. Bu qərar ona görə ağrılı qarşılandı ki, təsəvvür edin
40-50 il gəlib-getdiyi teatrın binasına gələ bilməyəcək. Bizim
işimiz ürək işidir. Mən öz rekvizitlərimi heç vaxt rekvizit sexinə
vermirəm. Ona görə yox ki, işlətdiyim eynəyimin başqasının
taxmasını istəmirəm. Xeyr! Elə şeylər sanki məhrəm olur.
Oturduğumuz stola, işlətdiyimiz qrimə də yanaşmamız başqa olur. Bir
şeyi də deyim, Ağaxan Salmanlı 70 yaşında Gənc Tamaşaçılar
Teatrından təqaüddədir, amma buna baxmayaraq bu yaxınlarda “III
Riçard” tamaşasında möhtəşəm obraz yaratdı. Teatrda hər yaşda və
hər ölçüdə aktyor mütləq olmalıdır. Mən teatrımızın inkişafını
təqaüdə göndərilən sənətkarlarsız təsəvvür edə bilmirəm.
N.Ehlamqızı: Sizi qonaq dəvət edəndə sıx qrafikdə
çalışdığınızı dediniz. Səhərdən axşamadək məşqlər səhhətinizə təsir
etmir?
- Yox, fasilələr olur. Şekspirin “III Riçard”ı çox ağır əsər idi,
hərtərəfli diqqət istəyirdi. Əksinə rollarım, məşqlərim az olanda
kökəlməyə meyilli adamam deyə özümü yaxşı hiss etmirəm. Məsələn,
biz Kamera Teatrında olanda ayda 40-a qədər tamaşa oynayırdıq. O
kiçik səhnəmizdə gündə bəzən iki tamaşamız olurdu. Cüzi miqdarda
məvacib alırdıq, amma çox xoşbəxt idik. Böyük teatrda truppa
çoxdur, Gənc Tamaşaçılar Teatrının repertuarında həddən artıq
tamaşalar var. Bütün aktyorlar da məşqdə olmalıdır, deyə bilmərəm
ki, ayda 30 tamaşa oynamaq istəyirəm. Oynasam, çox xoşbəxt olaram.
Xoşbəxt sənət sahibiyik, sənətimiz problemlərimizi heç olmazsa, 3
saat ərzində yaddan çıxarır.
“Kamera Teatrının tamaşalarını indi xəyallarımızda oynayırıq”
N.Ehlamqızı: Kamera teatrı Gənc Tamaşaçılar Teatrına
birləşəndən sonra rollarınız azalıb?
- Xeyr, oynadığımız tamaşaların sayı azalıb. Kamera teatrında 40-a
yaxın tamaşamız vardı, onları bu dəqiqə də oynaya bilərik,
aktyorların hamısı sağdı. Sadəcə, o tamaşalardan bəziləri Gənc
Tamaşaçılar Teatrının səhnəsinə köçdü, bəzisi qalıb. Biz onları
yuxularımızda, xəyallarımızda oynayırıq. Uşağa paltar alanda
ölçüsünü böyük alırlar ki, 3 il geyinsin. Mən 18 yaşında 80 yaşlı
qazini oynamışam, onu ömrümün axırına qədər oynaya bilərəm. “Şeyx
Sənan” 10 il qabaq hazırlanıb, onu nə qədər ömrüm var oynamağı
bacararam. O rolları böyük sevgi və həssaslıqla qoruyub saxlamışıq.
Çünki o tamaşalar çox böyük zəhmət, məhrumiyyətlər bahasına başa
gəlmişdi. Aclıq, yoxsulluq, soyuq, evsizlik, şəraitsizlik
şəraitində əmələ gələn tamaşalar idi. Soruşanda tamaşa
yadınızdadır, deyirəm, yox, tamaşa yadda olmur, əzələmizin
yaddaşında olur. Onların çoxunu Gənc Tamaşaçılar Teatrının
səhnəsində oynayırıq. Ondan əlavə, ora birləşəndən bəri 4-5 yeni
tamaşada rolum var.
“Teatrdan aldığım 210 manat mənə dünyada ən əziz puldur”
A.Lətifov: Maddi ehtiyaclarınızı ancaq teatrdan
aldığınız məvaciblə ödəmək indiki dövr üçün çətin
deyil?
- Hamımızın teatrdakı məvaciblər barədə məlumatı var, bunu açmağa
da ehtiyac yoxdur. Bunu heç əldə bayraq eləmək də düzgün deyil.
Bayraq edən insan gərək ərizəsini yazıb getsin. Teatrda teatrsız
yaşaya bilməyənlər qalıb çalışır. Böyük həvəs və şövqlə də
işləyirik. Maddi vəziyyəti seriallar, dublyajlar, sənədli filmlərə
çəkilməklə ödəyirik. Bir seriala çəkilib əlimə 10-15 min manat pul
alsam da, teatrdan aldığım 210 manat mənə dünyada ən əziz puldur.
Kartdan az-az çıxarıb xərcləyirəm ki, qurtarmasın. Bizə dövlət
tərəfindən də köməklik olunur. Prezident mükafatı təsis olunub. MDB
məkanında belə bir şey yoxdur. Aldığımız 500 manat mükafat bütün
problemləri ödəməsə də, rahat oluram. Bir ay ərzində hansısa əlavə
çəkilişim, serialım olmasa, teatrdan aldığım maaş və o mükafatla
yaşamaq mümkündür. Yaşlı sənətkarlarımızın ömürlük təminatı var.
Bunu kim necə qəbul edir etsin, çox böyük köməklikdir.
A.Lətifov: Siyasətlə aranız necədir? Xəbərləri
haradan izləyirsiniz?
- Həvəskarı deyiləm, amma vətəndaş olaraq gərək maraqlanaq. Məncə,
öz işimi görsəm, daha yaxşı olar. Vətəndaş kimi hansısa məsələlərə
münasibətimi bildirərəm. Əsasən “Euronews”-un xəbərlərini
izləyirəm.
N.Ehlamqızı: Kamera Teatrında oynanılan tamaşalar
Gənc Tamaşaçılar Teatrında səhnəyə qoyulanda bu, tamaşaçılar
tərəfindən birmənalı qarşılanmadı. Bununla razılaşırsınız? Sizcə,
səbəbləri nədən asılı idi?
- Kamera Teatrı, adından göründüyü kimi, kamera teatrı idi. 100
nəfərlik zalımız və kiçik səhnəmiz vardı. Sonra onu genişləndirdik
və oradan çıxmazdan 3 ay əvvələ qədər axırıncı mismarını belə
dəyişmişdik. Kamera teatrında tamaşaçım çox yaxınımda idi və mənim
səhv nəfəs almağa şansım yox idi. Kamera Teatrındakı tamaşalar məhz
o tamaşaçılara hesablanmış tamaşalar idi. O tamaşalar böyük səhnəyə
gələndə aktyorların adaptasiyasında müəyyən vaxta ehtiyacı vardı.
Düzü, tamaşaçılar tərəfindən narazılıq eşitmədik, ola bilsin, bizə
deməyiblər, amma mən şəxsən özümü narahat hiss edirdim. Akustika
cəhətdən bir az problem vardı, biz qışqırıb danışmağa
öyrəşməmişdik, Kamera Teatrında pıçıltı ilə danışanda da arxa
cərgədəki tamaşaçı eşidirdi. Zaman keçdikcə uyğunlaşdıq.
“O qız soruşdu ki, tərəf müqabilinizlə danışmırsınız?”
N.Ehlamqızı: Teatrda intriqalar qaçılmazdır. Kamera
Teatrı Gənc Tamaşaçılar Teatrına birləşəndə çox güman ki, hansısa
daxili mübarizə və narazılıqlar oldu...
- Şəxsən özümə qarşı bunu hiss eləmədim. Amma intriqalar vardı və
bunu təbii qəbul edirəm. Təsəvvür edin redaksiyada işləyirsiniz,
işçilər bir-birinə öyrəşib, hansısa redaksiyanın binasını söküb
sizin içinizdə yerləşdirirlər, istər-istəməz uyuşana qədər müəyyən
sıxıntılar olur. Teatrda intriqanın olmasını da normal
qarşılayıram. Kamera teatrında intriqa anlayışı yox idi. Çünki 10
aktyordan 5-i bir-biri ilə ailəli idi. Ona görə kiminləsə intriqa
etməyə yer qalmırdı. İntriqanı xəstə nöqtə kimi də
qiymətləndirmirəm, mütləq olmalıdır. Sağlam rəqabət nə xoşdur,
sağlam olmayanda, əlbəttə, zərər verir. İnandırım sizi ki tamaşaçı
onu görür. Biz aktyor olaraq çox sadəlövhük. Bizə elə gəlir ki,
üzümüzü çevirib kiməsə nə isə işarə edə bilərik, onsuz da tamaşaçı
görməyəcək. Əslində, tamaşaçı məhz çevrilib işarə etməyimi görür.
Biz səhnədə imkan daxilində müəyyən sıxıntıları gizlətməliyik. Bir
misal çəkim, bir aktrisa var, onunla salam-əleykimimiz var, amma
gözəl münasibətimiz yoxdur. Nə isə xarakter uyğun gəlmir. Amma mən
onunla illərdir səhnədə ən yüksək sevgini oynayıram. Söhbət “Şeyx
Sənan” sevgisindən gedir. Rollarımız normal da alınır. Bir dəfə
bizi tələbələrlə görüşə dəvət etdilər, getdik. Suallar verirdilər,
bir xanım ayağa qalxıb soruşdu ki, siz bir-birinizlə danışmırsınız?
İndi də danışanda tüklərim biz-biz olur. Dedim niyə ki, danışırıq.
Qız söylədi ki, üzr istəyirəm, əyləşdi. Deməli, gizlətmək mümkün
deyil, o qız hiss edib. Yəni intriqaları, narazılıqların hamısını
tamaşaçı görür.
A.Lətifov: Özünüz də seriallara çəkilirsiniz. Serial
bazarının vəziyyətini necə qiymətləndirirsiniz?
- 5 ballıq şkala ilə 3 deyə bilərəm. Çünki serialdan danışırıqsa,
indi türk seriallarına yəqin baxırsınız. 20 il əvvəlki türk
seriallarını indi izləyə bilərsiniz? Düzü, Azərbaycan seriallarına,
özümün çəkildiklərimə də, türklərinkinə də baxa bilmirəm. 20 il
əvvəl İbrahim Tatlısəs, Mahsun Kırmızıgülün serialları çox primitiv
və həddən artıq aşağı problemli seriallar idi. İndiki vəziyyətə
nəzər yetirsək, bütün dünyada Türkiyə seriallarını tərcümə edib
baxırlar. Bizdə deyirlər çox çəkirlər, 10 serial çoxdur. Mən
deyirəm, qoy 20 serial çəkilsin, pul ayrılsın, 10 dənə serialdan
biri tutursa, kifayətdir. 10 ildən sonra 1 işçi qrupu, prodakşn onu
əlində saxlaya bilsə, “Möhtəşəm yüzil” səviyyəsində bir şey çəkə
bilsə, bəsdir.
“Həsən Məmmədov və Rasim Balayevin işi teatrda alınmadı”
Elçin Murad: Türk rejissorlarından biri Bakıya
gələndə belə bir söz işlətmişdi ki, Türkiyədə teatrdan gələn
aktyorlar serial çəkilişində qəbul edilmir. Onlarda belə düşüncə
var ki, teatr aktyoru kinoda özünü göstərə bilmir. Hündürdən
danışmağa adət edir, səs oturmur, rejissorun istədiyini tam olaraq
canlandıra bilmir.
- O, həmin rejissorun subyektiv fikridir. Biz Türkiyədə çəkiliş
prosesində olmuşuq. Mənim türk dostlarım, tanışlarım var ki, sırf
teatr aktyor və aktrisalarıdır, seriallara da çəkilirlər. O
rejissor, sadəcə, teatr aktyorunu oynatmaq istəmir. Əlbəttə, teatr
aktyoru filmə çəkiləndə problem yaşayır. Mən də yaşamışam, amma az
yaşamışam. Çünki balaca teatrdan çıxmışdım. Qulağımdadır o sözlər,
deyirdilər, əşi, teatr aktyorudur. Kinodan teatra gəlmək çox
rahatdır. Amma böyük kinoaktyorlarımız Həsən Məmmədov, Rasim
Balayevin işi teatrda alınmadı. Məsələn, Məlik Dadaşov, Səməndər
Rzayev, Hamlet Xanızadə ikisində də nəhəng idi.
A.Lətifov: Başqa teatrlardakı tamaşalara gedib
baxırsınız?
- Əlbəttə. Sonuncu dəfə “Nadir Şah”, “Əmir Teymur” tamaşalarına,
“Nabat” filminə baxmışam. Həmin ərəfədə tamaşamız olmasa, gedirəm.
Premyeralar, adətən, şənbə-bazar günləri olur, aktyorların çoxu
eyni vaxtda tamaşaları olduğuna görə gedib baxa bilmirlər.
Rəhmətlik Xudu Məmmədovun 1990-cı illərdə tamaşaçıların qıt
vaxtında “Hardasan, ay tamaşaçı?” adlı məqaləsi vardı. Yazırdı ki,
incəsənətlə məşğul olan insanların özü teatrla maraqlansalar, zalda
oturmağa yer olmaz. Doğrudan da, həmkarlarımızın oyununa gedib
baxmaq lazımdır.
Dilqəm Əhməd: Siz “Şeyx Sənan”, “Nadir Şah”, “Əmir
Teymur” tamaşalarının adlarını çəkdiniz. Bu gün Bakı meqapolisə
çevrilmək üzrədir, insanların dünyagörüşü, mədəniyyəti, həyata
baxışı dəyişir. Bəs Bakı həyatı tamaşalara
daşınırmı?
- Çox böyük məmnuniyyətlə olmasını istəyərdik. Amma yoxdur. Cənnət
xanıma müasir mövzular təklif edilmişdi. Yazan varmı? İlqar Fəhmi
yaza bilər. Vaxt azlığından teatrla az məşğuldur. Əsasən, romanlar
yazır, qələmi çox güclüdür. Bir dəfə Samir Sədaqətoğlunun əsəri
olub. Kamal Abdullanın çox gözəl əsərləri var, bir neçəsini də
oynamışıq. Amma cavanlardan “yazıram, bu işimin arxasında
dayanmışam” deyən yoxdur. Yazıb gətirənlər var, amma çox primitiv
olur, KVN, şou-proqramlardakı səhnəciklər səviyyəsində olur. Bəlkə
də var, mən oxumuram, bilmirəm. O yaxşını teatra təqdim etmək
lazımdır.
D.Əhməd: Rafael İsgəndərovla Coşqun Rəhimovun
səhnəcikləri insanların məişətinə o qədər yaxındır ki, 10 gün
konsert verirlər, hamı da gedir.
- Bəli, insanların damarını tutublar, konsertlərinə bilet tapmaq
mümkün deyil. Amma şou hər halda sənət deyil. Ondan istifadə etməyi
də doğru saymıram. Rafael və Coşqunla eyni nəslin nümayəndələriyik.
Çox gözəl aktyorlardır. Teatrda Şekspir, Əli Əmirlinin
dramaturgiyasından gözəl rollar oynayırdılar, amma heç kim onlar
tərəfə baxmırdı. Balaca səhnəcik göstərən kimi milyonlar onların
ardınca baxdı. Qismət belə gətirdi, onlar da o yolu seçdilər. Amma
fikrimcə, bundan istifadə etmək olmaz. Neçə il əvvəl İrandan bir
qonağımız gəlirdi, elə qar yağdı ki, reyslər ləğv olundu.
Aeroportda 5-6 saat gözlədim, təyyarə böyük gecikmə ilə gəldi.
Maşın yox idi, biz hava limanından Buzovnada dostumuzgilin evinə
piyada gəldik. Səhər avtobusa mindik, qapıdakı uşaq “minin, adamın
birini 2 manata aparır”, - deyə insanları çağırırdı. Gəldim dedim
niyə 2 manat, axı gediş haqqı 20 qəpikdir. Evdə ehtiyacın var? Anan
xəstədir, dərman alacaqsan? Qayıtdı ki, qiymət budur, istəməyən
getməsin. Bizim milli “qaqaş”lardan biri idi. Düzdür, uşağa yaxşı
davranmadım, amma çox əsəbləşmişdim. Dedim sən qardan istifadə
edirsən? Camaatın biri işə, biri xəstəxanaya tələsir, sən isə
bundan istifadə edirsən? Dedi: “Bəli, istifadə edirəm, 1 gündür də,
qoy pulumuzu qazanaq”. Sözümün canı odur ki, o qar, yağışdan
istifadə etmək olmaz. Elə bir məqam oldu ki, sənətimizin üstünə qar
yağdı, hər tərəf buz bağladı, dondu. Ondan istifadə etməyə
başladılar. Camaat oraya yönəldi. Axı burada qalan yazıqdır. O, bu
gün var, sabah yoxdur. Ələsgər Ələkbərov sənəti dünya durduqca
duracaq. O vaxtlar mənim də şansım var idi, komediyanı pis
bacarmıram. Sadəcə, özümə, hisslərimə yazığım gəldi. Neçə illər
əziyyət çəkdik, ehtiyaclara dözdük, buna görəmi?
E.Murad: Sənət adamlarından biri deyirdi ki,
“xaltura” ilə sənət nümunəsini bir-birindən fərqləndirməyin çox
asan üsulu var. Söyləyirdi ki, “xaltura” dediyimiz səhnəciyə 2
gündən sonra yenidən baxmağa cəhd edin, görün alınacaq? Doğrudan
da, birinci dəfə güldürür, amma ikinci dəfə avtomatik
itələyir.
- Amma bir söz deyim, Rəfaellə Coşqun səhnədə heç də “xaltura”
eləmirlər. Onlar əziyyət çəkirlər. Coşqun hansısa qadın personajını
canlandıranda yüz faiz inanıram ki, bu qadındır. Mən tələbəlik
vaxtı, Cənnət xanımdan Çexovun “Yubiley” tamaşasındakı yaşlı qadın
obrazını oynamağını xahiş etmişdim. Vallah, oynaya bilmədim.
Sevil Hilalqızı: Bəzən deyirlər ki, teatr səhnəsi
tamaşaçıya 5 il qabağı göstərməlidir. Bizim mövzularla beynəlxalq
aləmdəki ssenariləri necə müqayisə edərdiniz?
- Niyə 5 il qabağı göstərməlidir ki? Teatr məktəb deyil. Heç kimə
heç nə öyrətmir. “Tamaşaçıları insan olmağı öyrətmək üçün
gətiririk” fikirləri artıq getdi.
S.Hilalqızı: “Azdrama”nın direktoru İsrafil
İsrafilov teatrı məbəd sayır və hesab edir ki, həm də cəmiyyəti
öyrədir.
- Bunlar İsrafil İsrafilovun subyektiv fikridir. Mənim anlamımda
teatr öyrədən yer deyil. Tamaşaçını ekran qarşısında “necə baş
verir” sualı ilə saxlamaq mümkün deyil. “Nə baş verir?” sualı ilə
saxlamaq olar. “Necə baş verir?”in 10-15 dəfə daha effektlisi
“Youtube” sosial şəbəkəsi və sirkdə var. Sirk 100 faizlik
incəsənətdir. Onu 99,9 faizlə oynamaq olmaz, yıxılıb ölərsən. Gərək
100 faiz əmin olasan. Teatrda 50-60 faiz oynayırıq. Mən tamaşaçını
“Nə baş verir?” sualı ilə saxlaya bilərəm.
Səhnədə lazer effekti, gözəl geyim, ucaboy aktyorlar lazımdır. Amma
çox da vacib deyil. Mən tamaşaçını yalnız və yalnız insanla baş
verən hansısa nəsnələrlə saxlaya bilərəm. Bu, komediya da, faciə də
ola bilər. Mənim tutduğum yol budur. Əminəm ki, ürəyim işləməsə,
məni heç nə xilas etməyəcək. Nə dramaturgiya, nə paltarım, nə də
səsim xilas edər.
S.Hilalqızı: TQDK sədri Məleykə Abbaszadə deyir ki,
incəsənət adamları üçün qabiliyyət imtahanı tələb edən ixtisaslar
üçün qəbul imtahanları ləğv ediləcək. Bunu da belə əsaslandırır ki,
müşahidələrinə görə, məsələn, rejissor üçün başqa fənlərdə yüksək
bilik tələb olunmur. Təhsil ekspertləri isə hesab edir ki,
qabiliyyət imtahanları obyektiv keçmir. Sizin bu məsələdə
mövqeyiniz necədir?
- Mən də bu barədə eşitmişəm. Deyirlər ki, qabiliyyət imtahanları
götürülməyəcək, amma aktyor, yaxud jurnalistika sənətinə yiyələnmək
istəyən pul ödəyəcəyək. Bir sözlə, məndən imtahan götürmə, pul
ödəyim məni aktyor elə. O, mütləq nəticəsini verəcək. İndi 120
nəfər aktyorluq fakültəsini bitirir, əksəriyyəti də aktyor olmur.
Ayda pul ödəsəm, tələb edəcəyəm ki, məni öyrətməlisən. Qabiliyyət
imtahanlarının obyektivliyinə gəlincə, şəxsən məndən imtahanı
obyektiv götürüblər. Özüm də heç kəsdən pul almamışam. Çünki elə
sənətin sahibiyəm ki, mənə heç kəs rüşvət verə bilməz. İmtahan
zamanı abituriyent gəlir, ona tapşırıq verirlər ki, monoloq, yaxud
şeir de. Ekspert deyir ki, düz demirsən. Axı bu insan öyrənməyə
gəlib. Əlbəttə, pis deməlidir də, yaxşı desəydi, burada nə işi
vardı? Yüksək aktyor kimi etüd göstərə bilməz axı. Bəli, onun
tərəfdarıyam ki, 120 nəfər əvəzinə 10 nəfər götürürlər, onların
ödədiyi pul 120 nəfərin ödədiyi puldan çox olur, amma
öyrədirlər.
S.Hilalqızı: Ödəniş nə qədər
olmalıdır?
- Nə qədər çox olsa, o qədər çox öyrənəcək. Ayda 100 manat versə,
heç nə öyrənməyəcək. Amma müəllim 5 min manat tələb etsə, o
tələbədən Robert de Niro düzəldəcək.
“Üzüm indiki kimi qalsa, deməli, hamını aldatmışam”
A.Lətifov: Qarşıdakı hədəflər nədir? Bəzi sənət
adamları deputat olmaq istəyirlər...
- Mən maksimum aktyor ola bilərəm. Bu, çox çətin sənətdir. 60
yaşında aktyorun üzünün təmiz olmasına inanmıram. Əgər 60 yaşında
üzüm indiki kimi qalsa, deməli, mən hamını aldadırmışam. İv
Montanın, Robert de Nironun üzünə baxanda bunu dərk elədim. Deməli,
səhnədə əzab çəkməmişəm, texnikam yüksək olub istifadə etmişəm.
İnsan səhnədə vallah əzab çəkir. “Aydın” tamaşasında səhnədə balaca
nar ağacı var, mən də adətim üzrə mütləq gəlib tamaşadan əvvəl
stolumu yoxlayıram. Böyük aktyorlar heç vaxt onu etmir. Gənc
Tamaşaçılar Teatrına gələndə deyirdilər “a kişi, get otur otağında,
səhnədə nə işin var, bizə söz gəlir axı”. Mən deyirdim ki, yox,
mənə görə söz gəlməz, mütləq mismarı özüm vurmalıyam. Həmin proses
idi, gördüm ki, ağac yerində deyil, bir qədər yerini dəyişmək
lazımdır. Çünki ona o cür öyrəşməmişəm. Dedim ki, ağacı mismarla
vurublar, yerini dəyişmək istəyirəm. İşçi qayıtdı ki, direktor
kamera ilə baxır, hara istəyirsənsə, de, özüm edim. Çıxartdı, ağaca
təpiklə də vurdu. İnanın elə bildim o təpiyi ürəyimə vurdular.
Dedim, heç olmasa, aktyor baxanda belə etməyin, bu ağacın altında
ömrüm gedir, onun altında ağlayıram. Allah haqqı, ömrüm gedir,
mənim üçün müqəddəs bir şeydir, ona təpik vurmaq olmaz. Bu baxımdan
çox çətin sənətdir. Hədəfim ancaq aktyor olmaqdır.
N.Ehlamqızı: Həyat yoldaşınız Şəbnəm xanımla tərəf
müqabili olmusunuz?
- Bəli, olmuşuq. “Mavi yuxular” tamaşamız var. Düzdür, o zaman evli
deyildik, amma birgə oynamışıq.
N.Ehlamqızı: Tərəf müqabiliniz həyat yoldaşınız
olanda Sizin üçün rahatdır, yoxsa başqa aktrisa ilə
oynayanda?
- Həyat yoldaşım ilə ifa etmək işə mane olur. Tanımadığım adamla
rol daha yaxşı alınır. Əslində, bu situasiyanın konkret cavabı
yoxdur. Bir gün belə olar, bir gün başqa cür. Canlı sənət olduğuna
görə dəqiq bir şey demək olmur.
N.Ehlamqızı: Hər ikinizin peşəniz eynidir, evdə
hansı mövzular ətrafında müzakirələr gedir?
- Evdə də sənət söhbətləri davam edir. Oğlum da artıq bu işə
girişib, hekayələr yazır. Dünən gecə 4.00-dək yazı işimiz vardı,
bir yerdə təhlil etmişik. Nə xoş ki, belədir. Bir dəfə təklifim
vardı. 2000-ci ildə Gənclər günü ilə bağlı hər nazirlik iclaslar
keçirirdi. Hər nazirliyin bir gənci şöbə müdiri olurdu, məni də
mədəniyyət sektorunun müdiri qoymuşdular. Biz gəncləri düşündürən
suallar ətrafında iclaslar edirdik. Son 5 iclasda o zamankı
mədəniyyət və turizm naziri Polad Bülbüloğlu da iştirak etmişdi.
Prezident rəhmətlik Heydər Əliyevin qarşısında hesabat verməli
idik. Mən də şöbə müdiri kimi hesabat verdim və təklifimi
səsləndirdim. Heydər Əliyev təklifimi şəxsən qeyd etmişdi.
Bildirmişdi ki, bunu mütləq həyata keçirmək lazımdır. Hazırda
deputat olan Arif Rəhimzadə məni yanına çağırdı, detalları soruşdu.
Təklifim o idi ki, bu qədər tikintilər içərisində yaradıcı gənclər
üçün bir dənə 5 mərtəbəli ailə yataqxanası tipli ev tikilsin.
Rəssam, şair, aktyor, rejissorlar orada yerləşdirilsin. Sağa
baxanda da, sola baxanda da yaradıcı gənc görəcəkdik, bununla da
yaradıcılıq bitmir. Səhnədə 3 saat ərzində aktyor olmaq rahatdır.
İstər-istəməz aktyorsan, oynamalısan. Görüm həyatda tamaşa
olmayanda psixologiyada aktyor ola bilirsənmi?
“İstəyirəm ki, övladım da aktyor olsun”
N.Ehlamqızı: Facebook sosial şəbəkəsinin məşhur
qəhrəmanı, oğlunuz Ülvinin gələcəyini necə görürsünüz? Bayaq
dediniz hekayələr yazır...
- Aktyorlardan soruşanda “istəyərdinizmi övladınız aktyor olsun”
qayıdırlar ki, “yox, yox, nə danışırsınız, istəmirəm, bu, çox çətin
sənətdir”. Xeyr, mən istəyirəm ki, övladım aktyor olsun. Məhz ona
görə ki, çətin sənətdir. İstəyirəm ki, o, kişi kimi böyüsün və
çətin sənətlə məşğul olsun.
Nərgiz Ehlamqızı
Foto: Elçin Murad
-
Magazin121:05
O getdi, mən də daha yoxam! - Əməkdar artist səhnə ilə vidalaşdı
-
Sosial19:35
Özünü öldürən sabiq pediatrın iş yoldaşı DANIŞDI: “Ailə məsələsi deyil..."
-
ABŞ19:25
Bayden Ukraynaya hərbi yardım haqqında qanunu İMZALADI
-
Rəsmi xronika18:40
Prezidentlər mətbuata bəyanatlarla çıxış etdilər - FOTO/YENİLƏNDİ
-
Hadisə18:33
Bakı hava limanında həyəcan siqnalı: Təyyarə qəza enişi etdi - FOTO
-
Sağlamlıq17:27
Yapon alimləri xərçənglə mübarizə üçün unikal vasitə hazırladı
-
Sosial17:00
Sabiq baş pediatrın intiharı ilə bağlı cinayət işi başlandı - Yeniləndi
-
Cənubi Qafqaz16:39
Ukrayna deputatları Vardanyanı biabır etdilər - Nobel Komitəsinə müraciət