Amerikanın Türkiyə PLANI

"ABŞ Türkiyənin parçalanması üçün situasiya yaradacaq”.

Bu sözləri Axar.az-a açıqlamasında rusiyalı politoloq Qriqori Trofimçuk söyləyib. O, Türkiyənin ABŞ-ın əleyhinə çıxacağı təqdirdə ölkədə xaos yaradacağını bildirib: “ABŞ-ın fikrincə, Türkiyənin hələ özünü “düzəltmək” üçün şansı var. Bunun üçün Türkiyə savaşmalıdır. İndi artıq iki güclə həm İŞİD-lə, həm də ki, Əsədlə savaşmalıdır. Türkiyənı artıq iki dəfə döyüşməyə məcbur ediblər. Bunlardan birincisi, 2013-cü ilin yazında Əsədlə baş vermişdi. O zaman küçələrə “ekoloqlar” çıxdılar. Bu isə Ərdoğana xəbərdarlıq idi ki, döyüşməsən, Türkiyədə inqilab olacaq. İkinci dəfə isə Türkiyənin bir müddət öncə İŞİD-lə savaşmağa məcbur edilməsi idi. Lakin Ankara bu dəfə maksimum dərəcədə özünü kənarda saxlayaraq, kürdlərə texniki dəstək göstərdi ki, onlar radikallara qarşı dayana bilsinlər. Türkiyə hazırda hətta İraqa da kömək etməyə hazırdır ki, özü burada döyüşməsin. Artıq Türkiyənin çıxış yolu qalmayıb. Ya o İŞİD-ə qarşı döyüşəcək və bu zaman radikallar ölkə ərazisinə keçib, ölkənin daxildən stabilliyini pozacaqlar, ya da ki, ABŞ Türkiyənin parçalanması üçün situasiya yaradacaq.

Avtomatik olaraq Türkiyənin Kiprdə problemləri yaranacaq. Bu, Qərbə yaranmış eskalasiyanı sonradan Cənubi Qafqaza yönəltmək üçün lazımdır. Türkiyəyə qarşı həmçinin onun Rusiya ilə “Türk axını” layihəsi ilə bağlı danışıqları da işləyir. Artıq Ankaranı onun NATO üzvü olması da xilas etməyəcək. NATO üzvü kimi İŞİD-ə qarşı döyüşməyə məcburdur. Yaranmış situasiyadan yeganə çıxış yolu Azərbaycan, Türkiyə, Rusiya, Ermənistanın maraqlarını özündə cəmləyən “Qafqaz qalası” yaratmaqdan ibarətdir. Lakin bu hələ ki, mümkün deyil. Çünki bölgədə Amerika yönlü Gürcüstan, həll olunmamış Qarabağ problemi, hələ də yerinə yetirilməmiş erməni-türk protokolları var. Üstəlik, bu layihə yerinə yetsə, gərək Türkiyə NATO-dan çıxsın”.