Çingiz Abdullayev "Neftçi"yə yeni rəhbəri seçildi -YENİLƏNİB

Publika.az xəbər verir ki, SOCAR-ın inzibati binasında keçirilən iclasda əvvəlcə Sadıq Sadıqov "Ağ-qaralar"da işlədiyi müddətdəki fəaliyyəti haqqında hesabat verib. Daha sonra isə seçki ilə "Neftçi"yə yeni rəhbər seçilib və həmçinin Müşahidə Şurasının üzvləri təsdiqlənib. Bundan sonra paytaxt təmsilçisinə tanınmış yazıçı Çingiz Abdullayev rəhbərlik edəcək.

Bu barədə məlumatı jurnalistlərə AFFA prezidenti Rövnəq Abdullayev məlumat verib. Ümumilikdə sədrlə birgə şuranın 7 üzvü var. Bunlar futbol veteranları - Mübariz Zeynalov, Səməd Qurbanov, SOCAR-ın iki nümayəndəsi, aktyor, şoumen Bəhram Bağırzadə və Sadıq Sadıqovdur.

İclasdan sonra AFFA prezidenti Rövnəq Abdullayev çıxış edib:

"Bu gün nəinki "Neftçi"nin, Azərbaycan futbolunda dəyişiklik vaxtı gəlmişdi. Keçən il qərara alınmışdı ki, klublarda Müşahidə Şurası yaradılsın. Müəyyən problemlər oldu. Bilirsiniz ki, "Neftçi" Futbol Klubu ayrı qurum idi. Bizim "Neftçi" İdman Klubumuz var ki, 36 idman növündə 5 minə yaxın idmançı var.

"Azərneftyağ" neft emalı zavodu bağlandıqdan sonra qərara gəldik ki, futbol klubunu cəmiyyətin tərkibinə verək. Futbolun inkişafı üçün yeni struktur düşündük. Bu gün bunun qərarını verdik. "Neftçi" Futbol Klubunda artıq Müşahidə Şurası yaradıldı. Bu Müşahidə Şurasına 7 üzv təklif edirik. Seçim sonra olacaq. Düşündük ki, tanınmış simalar yer alsın bu şurada.

Çingiz Abdullayevdən xahiş etdik ki, bu şuraya rəhbərlik etsin. O, "Neftçi"sevərlərdəndir. Sağ olsun ki, təklifimizi qəbul etdi. Bəhram Bağırzadə də təklifimizi müsbət qarşıladı. Tanınmış futbolçularımız Mübariz Zeynalov və Səməd Qurbanov da razılıq verdilər bu Şurada iştirak etməyə. Zaur Qəhrəmanov və mən də bu şurada yer alacağıq. "Neftçi"nin aksiyaları buraxılacaq. Biz də gələn ilə qədər artıq şəxsi klub olmayacaq, ictimaiyyət tərəfindən idarə ediləcəyik".

Komandanın aksiyalarının satılacağını deyən AFFA rəhbəri bildirib ki, klub idarəçiliyi ictimailəşəcək:

"Bunun təhlilini aparmışıq. Azərbaycanda son 15 ildə 18 klub fəaliyyətini dayandırıb. Bunun qarşısını almağa çalışırıq. Avropada klubların 100 yaşları var. Çünki orda klublar ictimailəşib. Biz də qərara aldıq ki, bu yolla getməliyik. Rayonlardakı klublar da belə idarə olunacaq. Dövlət tərəfindən maliyyələşmə mexanizmi düşünüləcək. Artıq heç bir klub bir adamın olmayacaq. Artıq hər klub öz bölgəsinin klubu olacaq, orda hamı cavabdeh olacaq. Məncə, bu daha doğru yoldur. Biz də bunu "Neftçi"dən başladıq. Bu, İdarə Heyətinin giriş iclasıdır. Müşahidə Şurasında yer alanlar bu işə həvəslə girişirlər. İnanıram ki, bunun futbolumuza dəstəyi olacaq. Bütün klubun idarəçiliyi Müşahidə Şurasına keçib".

Ardından Çingiz Abdullayev çıxış edib:

"Son iki gündə bu barədə çox oxudum. Futbolu çox sevirəm. Biz hüquq fakültəsində oxuyanda – 1976-cı ildə böyük komanda yaratmışdıq. Hətta həmin vaxt "Neftçi"ni də məğlub etmişdik. O vaxt cəsarətim çatırdı, başa düşürdüm ki, məndən güclü oynayanlar var. İndi görürəm ki, mənim bu təyinatımı tənqid edənlər var. Amma söz verirəm ki, meydana çıxmayacam. Futbolu da bilirəm. Uşaqlıqda həmişə "Neftçi"nin stadionunu dolu görürdük. Amma 1966-cı ildən sonra böyük uğurumuz olmadı. Bu təklifi eşidən kimi razılıq verdim".

- Düz başa düşdüksə, "Neftçi" artıq futbol brendinə çevrilib. Sizin missiyanız nə olacaq? Beynəlxalq aləmdə bu klubu tanıtmaq üçün hansı addımlar atacaqsınız?

Çingiz Abdullayevə ünvanlanan bu suala AFFA prezidenti Rövnəq Abdullayev cavab verdi: "Birincisi, ölkə daxilində uğurlar qazanılsın. İlk növbədə azarkeşləri bura yığmaq lazımdı. Çingiz müəllimin də bunda böyük rolu olacaq.

Ç.Abdullayev: Oturan kimi dedim ki, Olimpiya stadionunu "Neftçi"yə verin. Amma dedilər ki, əvvəlcə indiki stadionu doldurun. Hamı gəlməlidi ki, böyük stadion dolsun.

- Çingiz müəllim, yeni sistemdə "Neftçi"nin hansı planları var?

- İlk iş yığışıb danışmaqdır. İnsan vəzifəyə gələndə düşünür ki, hamıdan ağıllıyam. Bu yanlış düşüncədir. Mən o vaxt elə bilirdim ki, harasa rəhbərlik edə bilmərəm. Amma sonra Yazıçılar Birliyinə çağırdılar, rəyasət heyətinə rəhbərlik etməli idim. Halbuki, onda dahi şəxsiyyətlər var idi. Dedim ki, mən bu iclası apara bilmərəm. O vaxt onlardan biri desəydi ki, cavansan, dur get, gedərdim. İndi "Neftçi"də də təcrübəli adamlar var, ömür boyu futbolla məşğul olanlar var. Səmədağa Qurbanovun oyununu yaxşı xatırlayıram. İlk növbədə məsləhətləşməliyik. Bu təcrübəlilər nə məsləhət verirlər. Fakt mən yazıçıyam. Bu işləri tək həll edə bilmərəm, peşəkarlarla çalışacam.

- Müşahidə Şurasında jurnalist olmayacaq? AFFA tərəfindən bu məsələ də qeyd edilmişdi...

Rövnəq Abdullayev: Seçim dediyim kimi, yerlərdə olacaq. Rayonlarda ictimaiyyət özü seçəcək. Bu məşvərətli orqan olmayacaq. Qərar verən orqan olacaq.