Getmək istəmirəm! - Publika.az
Bizi izləyin

Köşə

Getmək istəmirəm!

Leyla Sarabi

Nə mən onun gələcəyinə inanırdım, nə də o mənim. Nə mənim ona sevgim səngiyirdi, nə də onun mənə mərhəməti. Nə mən onun yerinə ölmək istəyirdim, nə də o mənim yerimə yaşamaq.

Gözümə baxmadan görməyi, səssiz danışmağı, lal zarımağı öyrənmişdi. Yad hava əsirdi evin içində. Divarları qarla yuyub təmizləsən də, ciyərimizin külü ağarmırdı. Nəfsim yalana sarmaşıb xəstə otağında kök salırdı.

Əslində, küt duyğudur ölümü dadacağını bilə-bilə danmaq istəyin. Məsələn, mən müqəddəs yalanlara inandırmışdım onu... Ən çox da özümü...

İndi düşünürəm, bəlkə elə onun varlığı fantaziyamdan ziyadə, zeynimin yaradıcı gücündən başqa bir şey deyildi. Bəlkə onu da, aramızdakı sarsılmaz əlaqəni də ayıla bilmədiyim yuxumda özümdən uydurmuşdum. O, qızdırmadan üşüyəndə, istidən boğulmağım da, yeməkdən kəsilib, bədənindəki suyu quruyanda, stressdən acmağım da zərurətdən doğan yalanlarım imiş.

Ümumiyyətlə, çox ziddiyyətli yönlərim var. Havalar soyuyanda ən nazik ətəklərimi geyinmək, yanacağımdan əmin olsam da, alovun üstündə ayaqyalın gəzmək, günlərlə ac-susuz gəzməyə razı qalıb, hamı iştahdan küsəndə, mədəmi deşən vəhşi aclıq. Bəlkə elə o da xəyal idi. İnsanların axınına tərs gedəndə, öz unumdan yoğurub yapdığım, acıtmağa macal qoymadığım yarıminsan xəmiri.

Axı mən heç bir yuxuma illər sonra da xatırlayıb, belə çarəsiz təslim olmamışam. Mən onun bütün hallarının tək şahidi idim sanki. Ətrafındakıları qapının kəndarında saxlayıb, məni lap nəfəsinin içinə çəkmişdi. Qəribə düzənə bax, indi qapının o üzündə qalanlara da əlim çatır. Hər gün, lap hər saat toxuna bildiklərim, amma duyğu yükləri tərəzidə onun tərəfinə uduzanlar burdadırsa, o, niyə uzaq planetdə gizlənir?! Yoxluğa toxunmaq, görmək, sevmək olmursa, mən niyə təbiətə yenə zidd gedirəm?!

Əslində, yaşadığımız hər şeyin yarım qaldığını düşünürük. Ölümün vaxtsız gəlməyindən, sevgilinin zamansız gedişindən şikayətlənirik. Və bəlkə də hər şey ən doğru məqamında baş verir.

Necə ki, onun mənə son etirafı kimi: Getmək istəmirəm!

Ömür boyu ömründən narazı gəzən, gözünün içindəki gülüşü xərcləməyən, həyatın şanssız yerdəyişməsindən şikayət əsirgəməyən o, bu dəfə xəzəl canını küləyə yem etməkdən qorxurdu. Qorxusunun kökünü çürütməkçün dilimə hər yalanı dolayırdım. Dilim dolaşdıqca, onun canından çimdik-çimdik qopurdu. O, qopduqca, mənim içimə yapışırdı. Böyüyüb, boyumu aşırdı, çəkisi dizimi çökdürürdü. Mən adam olmağı da, acı olmağı da, acıyıb adam olmağı da ona bürünəndə hiss etdim. Bir səhər oyanıb yorğanının ayağıma, boyunun boyuma biçildiyini gördüm.

Bu gün özümü ikimizin yerinə sevməyi öyrənmişəm. Sən mənim oyaqkən gördüyüm ən şirin yuxumsan, anacan!

Rəylər
Oxumağa davam et
Reklam

Köşə

Diasporsuz Komitə

Azərbaycana növbəti səfərim, Diasporla İş üzrə Dövlət Komitəsinin Şuşada təşkil etdiyi Dünya Azərbaycanlılarının 5-ci qurultayı ilə eyni tarixlərə düşsə də, bu tamamilə təsadüfdən ibarət idi.

Yəni, mənim Azərbaycana gəlməyim əvvəlcədən ailəliklə etdiyimiz planın bir parçasıydı və aylar öncədən övladlarımızın oxuduğu məktəbdəki bahar tətilinin tarixlərini nəzərə alaraq planladığımız və ailə büdcəmizdə nəzərdə tutulan səfər və tətil planı idi.

Şuşadakı qurultay hazırlıqlarıyla bağlı xəbəri də, elə səfər əsnasında öyrəndim.

Əvvəlcə, burada bir haşiyəyə çıxmaq istəyirəm:

Mən, 11 illik ayrılıqdan sonra vətənə ilk səfərim və səfər sonrasında müxtəlif dövlət qurumlarının nümayəndələriylə Şuşada Dünya Azərbaycanlılarının Forumunun keçirilməsiylə bağlı layihəni icra etməklə bağlı fikirlər səsləndirmişdim.

Tarixi qələbənin Şuşa ili |

Lakin format və prosesin icrası, Diaspor Komitəsinin təşkil etdiyindən fərqli idi, bu barədə az sonra danışacam.

Qurultay ərəfəsində və sonrasında, dünyanın müxtəlif ölkələrində yaşayan azərbaycanlıların sosial şəbəkələrdə Diaspor Komitəsini “quru yuyub yaş sərməsinin” kifayət qədər haqlı səbəbləri vardı.

Diaspor Komitəsi, korrupsioner oliqarx İbrahimov qardaşlarından yaxa qurtaranda, gənc deputat, Fuad Muradovun təyinatı, bu komitənin gələcək fəaliyyəti ilə bağlı müsbət düşünməyə vadar edirdi.

Lakin, onun rəhbərliyi altında keçən 4 ildə, çox təəssüf ki, kosmetik dəyişiklərdən başqa Diaspor Komitəsinin fəaliyyətində ciddi dəyişikliklər və irəliləyişlər baş vermədi.

Fuad Muradovun təltiflərindən imtina edildi – Diasporada qalmaqal

Diaspor Komitəsi, xaricdəki yaşayan milyonlarla azərbaycanlını əhatə etmək, və kəmiyyəti keyfiyyətə, siyasi-ictimai gücə çevirməyi bacarmadı. Fuad Muradovun rəhbərlik etdiyi bu komitə, elə Nazim İbrahimovun dövründə olduğu kimi, dar çərçivədə və çevrədə, içinə qapanıq şəkildə öz fəaliyyətini davam etdirməkdədir.

Ümumi fəaliyyətini, müxtəlif ölkələrdə fəaliyyət göstərən, əhatəsində 5-10 azərbaycanlının olduğu Azərbaycan evləri üzərindən quran Diaspor Komitəsinin, bu illər ərzində əldə etdiyi uğurlar maraqlı olardı.

Hansısa evdə, yaxud dönərçidə yemək yeyib, hesabını Diaspor Komitəsinə yazaraq, adını yeni İl, yaxud Novruz bayramı tədbiri qoymaqla kimi aldatmış oluruq?

Son 4 ildə, Diaspor Komitəsi, Azərbaycanın hansı ölkəylə münasibətlərinin yaxşılaşmasına, inkişafına, stratejik müttəfiqliq səviyyəsinə gəlməsinə öz ciddi töfhələrini vermişdir ?

Bu komitənin yaranma məqsədi və fəaliyyət istiqamətinin necə olması gərəkdiyini doğrudan da bilirikmi ?
Bu sualların bir cavabı da olmalıdır.

Bu gün Avropada, Amerikada, Rusiyada və bir çox dünya ölkəsində əslən azərbaycanlı olan, lakin Azərbaycanda doğulmayan, azərbaycan dilini kifayət qədər yaxşı bilməyən, əvəzində yaşadığı ölkənin vətəndaşlığını daşıyan, yaşadığı cəmiyyətə uğurla inteqrasiya etmiş yeni nəsil gəlir.

1990-cı illərdə, hətta 2000-ci illərin əvvəllərində, bu və ya digər səbəbdən Avropaya, Amerikaya üz tutmuş minlərlə azərbaycanlı ailənin, yerləşdikləri ölkədə doğulan övladları, bu gün artıq 20-25 yaşlarında gənclərdirlər.

Görəsən, Azərbaycan Respublikasının Diasporla İş üzrə Dövlət Komitəsinin bu gənclərlə bağlı hansısa fəaliyyət planı varmı?! 

Mən zənn etmirəm!

Bu yaxınlarda, ölkə prezidenti İlham Əliyevin Gəncə səfəri zamanı, yol qırağına əkilən ağacların yerindən çıxarılması videolar paylaşılmışdı.

Bax, Diaspora Komitəsinin tədbirlərinə dəvət olunanların arasında xeyli dəyərli insan olsa da, əkilib sonra yerindən çıxarılan ağac rolunu oynayanlar da az olmur.

Bu cür dekorativ adamlar, sadəcə fiquran yaxud dekorasiya rolunu oynayır və kəmiyyət artırırlar. Diaspor Komitəsinin puluyla Azərbaycana gəlir və gəzirlər.

Araşdırsanız, görəcəksiniz ki, bu insanların bir qismi, ümumiyyətlə yaşadıqları ölkədə işsizdirlər, sosial yardımlarla yaşayırlar, yaşadıqları ölkənin dilini belə düz-əməlli bilmirlər, qonşularının belə tanımadığı, əlaqə qurmadığı adamlardır.
Yazının əvvəlində də bilrdiyim kimi, hələ keçən il, Şuşada xaricdə müxtəlif dövlət qurumlarında və holdinqlərdə işləyən, yüksək vəzifə tutan, yaxud böyük şirkətlərə rəhbərlik edən gənc azərbaycanlıların və Azərbaycan əsilllilərin (25-45 yaş arası) iştirak edəcəyi forum layihəsi ilə bağlı təklif səsləndirmişdim.

Bu təklifdə, dünyanın bir sıra aparıcı ölkələrində rəhbər vəzifələrdə çalışan, böyük bizneş şəbəkələri və ictimai-siyasi əlaqələri olan azərbaycanlılar və azərbaycanlılarla yanaşı, bu ölkələrin dövlət strukturlarından da xarici rəhbər şəxsləri bu foruma dəvət edərək, beynəlmiləl forum havasında, yaxud Beynəlxalq Şuşa Forumu adlandıra biləcəyimiz formatda bir tədbir keçirilməsini nəzərdə tuturdum.
Biz, Fransada bəzən qohumlar, azərbaycanlı dostlar yığışanda, Diaspor Komitəsinin Fransada öz ətrafına mobilizasiya edə biləcəyi kütlədən dəfələrlə çox oluruq.

Bu baxımdan, Diaspor Komitəsinin nə Avropada, nə Amerikada heç bir ağırlığı, dövlət qurumu kimi, azərbaycanlıların nəzərində heç bir çəkisi yoxdur.

Mən, Diaspor Komitəsində işləyən, xeyli vətənpərvər insanın olduğunu da bilirəm, Azərbaycana səfərimdə həmin insanların bir qismiylə görüşdüm, indi yazdığım iradların bənzərlərini onlara da bildirdim, ancaq bilirəm ki, fəaliyyət mexanizmini onlar müəyyənləşdirmirlər.

Bəs Diaspor Komitəsini niyə bu qədər tənqid olunur və fəaliyyət istimatləri necə olmalıdır, maddə-maddə yazmağa çalışacam.

1. Xaricdə böyüyən gənc nəsil və iki yaxud ikinci vətəndaşlığı olanlar

Yuxarıda da qeyd etdiyim kimi, inkişaf etmiş qərb ölkələrində formalaşmaqda olan yeni gənc nəsil var. Onlar, bu ölkələrə qısammüddətli təhsil almağa gələn tələbələrdən fərqli olaraq, burada doğulmuş, böyümüş və yaşadıqları cəmiyyətin bir parçasına çevrilmiş fərdlərdir.
Bəzən, biz də toplaşanda, bir məqam həmişə diqqətimi çəkir, böyüklərin azərbaycan dilində danışdığı məclislərdə, kiçiklər, yəni övladlarımız öz aralarında fransız dilində danışırlar, əminəm ki, ABŞ-da da, Almaniyada da, Britaniyada da belədir, bunun qarşısını almaq qeyri-mümkündür.

Lakin, biz uşaqlarımıza qürbətdə belə milli vətənpərvərlik, azərbaycançılıq hisslərini aşılamağa davam edirik. Necə ki, bir müsəlman kimi, ərəbin dilini bilməsək də, Məkkə və Kəbə bizim üçün müqəddəsdir, eləcə də, bizim övladlarımız azərbaycan dilində səlis danışa bilməsələr də, Azərbaycan onların Kəbəsi olmalıdır.

2-ci Qarabağ müharibəsi zamanı, mən bu gəncliyin Fransadakı aktivliyinin şahidi oldum, çalışdıqları iş yerlərindən tutmuş, dostları arasında, sosial şəbəkələrin fransız seqmentində apardıqları söz savaşı, yeri gələndə mobilizasiya olaraq göstərdikləri qətiyyət həqiqətən alqışa layiq və dəyərləndirilməli addımlar idi.

Ölkə xaricində, Diaspor Komitəsinə yaxın adamların, təşkilatların müharibə dövründə, erməni diasporunun həyasız təbliğatına qarşı, bizim aqressiv qarşılıq verməyimizi emosional adlandırması, özlərini “ehtiyatlı” aparması və passiv mövqe sərgimələri nəzərdən qaçmırdı.
Qarabağ müharibəsi dövründə, erməni diasporunun iftira dolu təbliğatının qarşısına sinəsini verənlərin əksəriyyəti, siyasi mövqesindən asılı olmayaraq və bir mənalı olaraq bu ölkələrdə yaşayan və böyüyən sıravi insanlar idi.

Hansı ki, siz o insanların böyük əksəriyyətini, Diaspor Komitəsinin yaxud bu komitəyə bağlı təşkilatların keçirdiyi tədbirlərdə görə bilməzsiniz.
Bu gənclərin içində, TOTAL, BP, Renault, Peugeot, Mercedes, BMW kimi texnologiya nəhənglərində, müxtəlif dövlət qurumlarında, finans sektorunda çalışanlar, müxtəlif sektorlarda böyük şirkətlərə rəhbərlik edənlər var.

Hansı ki, onlar, yaşadıqları ölkələrdə Azərbaycan diasporunun ümumi işinə, diasporun institut kimi formalaşmasına, siyasi-ictimai rəy gücünə böyük töfhələr verə bilərlər. Hazırda isə, biz bu insanların bu və ya digər səbəbdən görməzdən gəlindiyini, kənarda saxlandığını görürük, bu qəbuledilməzdir.

Əvəzində, Diaspora Komitəsinin informasiya bazasını çalxalasaq, 3 Novruzəli, 2 Tükəzban çıxacaq.

Kifayər qədər uğurlu, stratejik vəzifə və qurumlarda işləyən bu gəncləri, ümummilli məsələlərə cəlb etməməkdə Diaspor Komitəsi necə maraqlı ola bilər?

Digər məsələ, yaşadığı ölkənin vətəndaşlığını qəbul edən – ya ikili vətəndaşlıq daşıyan, yaxud ümumiyyətlə yaşadığı ölkənin vətəndaşlığı olan azərbaycanlılarla bağlıdır.

Bu gün, Avropa ölkələrində, ABŞ və Kanadada yaşadığı ölkənin vətəndaşlığını almış və yaşadıqları ölkələrdə səs vermə hüquqları olan çox ciddi sayda azərbaycanlı və Azərbaycan əsilli vətəndaş var. Bu vətəndaşlarımızın bir hərəkət etməsində, yaşadıqları ölkələrdəki siyasi atmosferdə özlərini diaspor gücü kimi formalaşdırmasında ilk növbədə Diaspor Komitəsi maraqlı olmalıdır.

Azərbaycanın bu ölkələrdə və o ölkələrin nüfuz etdiyi yerlərdə milli maraqlarının təmin olunması prosesi də, məhz bu ölkələrin daxili siyasətində azərbaycan diasporunun güclü ictimai və siyasi rəy formalaşdırmasından asılıdır.

Diaspor Komitəsi xaricdə yaşayan azərbaycanlılara müraciət etdi » BAKU.NEWS

2. Diaspor Komitəsinin fəaliyyət mexanizmi necə olmalıdır ? – Erməni diasporu ilə müqayisə

Avropa və Amerika ölkələrində erməni diasporunun 1 əsrdən çox tarixi olsa da, Diasporla İş üzrə Ali Komissarlığın Aparatı 2019-cu ildə Ermənistan Respublikasının baş naziri tərəfindən yaradılıb.

Bu komissarlığın fəaliyyəti aşağıdakı 9 istiqaməti əhatə edir:

1. Diasporda dövlət mərkəzli şəxsiyyət formalaşmasının təşviqi

2. Tərəfdaşlıq, proqramlar və tədbirlər vasitəsilə vətənlə güclü diaspor əlaqələrinin inkişaf etdirilməsi

3. Diasporda gənclərin liderliyinin və icma təşkilatının dəstəklənməsi

4. Pan-erməni təşkilatlarının birləşdirilməsi və Ermənistanın inkişafına cəlb edilməsi

5. Ermənistanda institutların qurulması və gücləndirilməsinə erməni peşəkar potensialının cəlb
edilməsi

6. Repatriasiyanın təşviq edilməsi və repatriantlar üçün rahat inteqrasiya prosesinin təmin edilməsi

7. Diaspor investorlarına və xeyriyyəçilərinə Ermənistandakı layihələrdə köməklik etmək

8. Diasporun peşəkar potensialının xəritəsini çəkmək

9. Diasporu Ermənistanda və diaspor icmalarında cari hadisələrlə bağlı məlumatlandırmaq.

İnternetdə, siz bu komissarlığın 2 illik fəaliyyətinin hesabatını asanlıqla tapa bilərsiniz.

Eyni zamanda bu komissarlığın, ölkə xaricində yaşayan 22-35 yaşlı gənc erməniləri, “Diaspor Gənclik Səfiri” layihəsinə cəlb etməsini, 13-18 yaşlı diaspor gəncləri üçün “Evə doğru addımlayın” adıyla 2 həftəlik Ermənistanda təhsil yay proqramı və erməni dilinin qorunub saxlanması və inkişafıyla bağlı layihələr, “iGorts” adlı diaspor erməni peşəkarlarını Ermənistan Respublikasının dövlət sektorunda və hökumətində işləməyə dəvət edən təqaüd proqramını həyata keçirdiyini, “NerUzh” adında texnoloji startap diaspora sahibkarlarını öz startaplarını Ermənistanda qurmaq imkanları ilə tanış etmək üçün nəzərdə tutulmuş layihəni və s. sadalamaq mümkündür.

Bütün bu yuxarıda yazdıqlarımdan sonra, müharibədə məğlub olmuş Ermənistanın cəmi 2 yaşlı diaspor komissarlığının fəaliyyəti qarşısında, düşmən qarşısında böyük zəfər çalmış, qalib Azərbaycanın 20 illik tarixi olan Diaspor Komitəsinin fəaliyyətinin necə də çəlimsiz və sönük olmasını görmək, çox üzücü bir haldır.

Təəssüf ki, Diaspor Komitəsinin diaspor azərbaycanlıları qarşısında yerinə yetirdiyi heç bir öhdəlik olmamaqla bərabər, heç bir hesabatlılığı da yoxdur.

1516027164419506_1000x669.jpg (103 KB)

3. Diaspor Komitəsinin büdcəsi necə formalaşmalıdır?

Diaspor Komitəsinin fəaliyyəti üçün illik təxminən dövlət büdcəsindən 10 milyon manat ayrılmaqdadır.

Şuşadakı qurultaya isə, 3 milyon manat büdcə ayrıldığı bildirilir. Ümid edirəm ki, bu qurultayın hesabatını da, şəffaf şəkildə ictimaiyyətə verə biləcəklər.

Mənim fikrimcə, ümumiyyətlə Diaspor Komitəsinə büdcədən pul ayrılmamalıdır, yaxud fəaliyyəti üçün ayrılan büdcə daha simvolik olmalıdır.
Diaspor Komitəsi öz fəaliyyətini və layihələrini daha çox, xaricdəki azərbaycanlılardan yığılan ianələr və üzvlük haqqları hesabına, yaxud azərbaycanlı iş adamlarının maddi dəstəyi ilə həyata keçirilməlidir.

Bu təklif, indiki reallıqda bəlkə də bir qədər utopik səslənsə də, bunun günahkarı elə Diaspor Komitəsinin özüdür. Xaricdə, ətrafına yığdığı 3-5 nəfəri yaxud təşkilatı ələ baxıma öyrəşdirmənin adı diaspor fəaliyyəti deyil!

Diaspor fəaliyyətini, diaspor azərbaycanlıları şəkilləndirməli və maliyyələşdirməlidir.

Büdcə ayırdığınız adamların və təşkilatlara, finans yardımını dayandıraraq, həm də o təşkilat və şəxslərin fəaliyyətini və vətənpərvərliyini də test etmiş olarsınız!

10 milyon manat xaricdə yaşayan azərbaycanlılar üçün böyük büdcə deyil, bu prosesə yüzlərlə və hətta minlərlə azərbaycanlını cəlb etmək olar, bir şərtlə ki, şəffaf və kollektiv idarə etmə təmin olunsun və Diaspor Komitəsi, sözün həqiqi mənasında, Azərbaycanda ölkədən kənarda yaşayan azərbaycanlıların səsi olsun!

İllik dövrüyyəsi, yaxud kapitalı milyonlarla dolları əhatə edən nə qədər xaricdə yaşayan azərbaycanlı iş adamı var, illik maaşı 100 min dolların üzərində olan minlərlə həmvətənimiz var.

Bu insanları, müxtəlif şəbəkə və layihələrlə prosesə cəlb edərək, Azərbaycan daxilində müəyyən imtiyazlar tanımaqla, kiçik üzvlük haqqlarıyla belə Diaspor Komitəsinin indiki büdcəsini formalaşdırmaq mümkündür.

Şuşada keçirilən qurultaya öz puluyla təyyarə biletini alıb, hotel rezervasiyasını edəcək minlərlə azərbaycanlı var!

Belə bir halda, bu qurultaya ayrılan məbləği yeyinti və israf kimi də görmək olar.

4. Diaspor Komitəsinin fəaliyyət istiqamətləri

Diaspor Komitəsi, Təhsil Nazirliyi ilə çalışmalıdır.

Xarici ölkələrdə, azərbaycanlıların kompakt yaşadıqları yerlərdə azərbaycan məktəblərinin qurulması, yaxud Təhsil Nazirliyi vasitəsiylə azərbaycan dili və ədəbiyyatı müəllimlərinin bu ölkələrə göndərilməsi məsələsi layihələndirilməlidir, hansı ki, bənzər prosesi Türkiyə Milli Təhsil Nazirliyi on illərdir həyata keçirir, bu təcrübədən faydalanmaq lazımdır.

Ümumiyyətlə, qardaş Türkiyədə, xaricdəki türk diasporu üçün qurulan “Yurtdışı Türkler ve Akraba Topluluklar Başkanlığı” kifayət qədər nümunə alacağımız və birgə əməkdaşlıq edəcəyimiz məqamlar var.

Eyni zamanda, xaricdə yaşayan və təhsil almış azərbaycanlıların diplomlarının tanınması və Azərbaycanda işlə təmin olunma imkanları da prioritet mövzulardan biri olmalıdır.

Diaspor Komitəsi, İqtisadiyyat Nazirliyi ilə çalışmalıdır.

Diaspor azərbaycanlılarının ölkədə iş qurma və investisiya cəhdlərinin dəstəklənməsi və vergi güzəştlərinin edilməsiylə bağlı Diaspor Komitəsi, İqtisadiyyat Nazirliyi ilə birgə layihələr həyata keçirməlidir.

Mən bildiyim qədər, ABŞ-da yaşayan və şirkətini 50 milyon dollara Twitter-a satmasıyla məşhurlaşan, hər uğuruyla fəxr etdiyimiz gənc həmvətənimiz Tural Bədirxanlı, Azərbaycanda informatika sahəsində çalışdırdığı işçilərə görə vergi məsələlərində çətinliklərlə üzləşib, hansı ki, indi üzərində işlədiyi layihənin dəyəri 100 milyon dollardan çoxdur. Belə bir gəncin, gənc iş adamının Azərbaycanda investiyası davamlı təşviq olunmalıdır.

Həmçinin, işğaldan azad olunmuş ərazilərə xaricdəki milli investisiyanın cəlbi üçün Diaspor Komitəsi öndə olmalıdır, bununla bağlı İqtisadiyyat Nazirliyi ilə birgə forumlar təşkil etməli, şəbəkələr qurmalıdır.

İşğaldan azad etdiyimiz ərazilərdə milli aqrar sənayenin qurulması və inkişafı, kənd təsərrüfatının formalaşmasına diasporun azərbaycanlı iş adamları da cəlb oluna və onlar üçün geniş imkanlar yaradıla bilər.

Bu gün, həmin iş adamları, öz şəxsi əlaqələri hesabına, yaxud müxtəlif qurumlarla ünsiyyət quraraq Qarabağın yenidən qurulmasında iştirak etməyə can atırlar.

Diaspor Komitəsi Gənclər və İdman Nazirliyi ilə çalışmalıdır.

Gənclər və İdman Nazirliyi deyəndə, ilk başda ağlıma rəhmətlik Azad müəllim gəlir.

FASE forumlarında iştirakı və verdiyi dəstək, Azərbaycanın gənclər diasporu üçün böyük töfhə idi, bu gün də xüsusi ehtiramla yad edilir.

Bu proses bu gün də davam etdirilməli, Diaspor Komitəsi, ölkə daxilində yay kampları, ölkə xaricində müxtəlif beynəlxalq qurumlarda, aparıcı dövlətlərin institutlarında forumlar təşkil etməli, ziyalı diaspor şəbəkəsi formalaşdırmalıdır.

Diaspor təşkilatları, Diaspor Komitəsindən pul istəmək yerinə, yaşadıqları ölkənin qurumlarından, bələdiyyələrindən, fondlardan, Avropa Komissiyasından və s. idarələrdən subvansiya və qrant layihələri almağa çalışmalıdırlar, necə ki, bunu digər millətlərin diaspor təşkilatları edir.

Mən yaxşı xatırlayıram ki, tələbə olarkən, bizim tələbə təşkilatımız, yerləşdiyi şəhər meriyasından kiçik ölçülü subvansiyalar ala bilirdi və biz həmin subvansiya ilə mədəni və təbliğat xarakterli tədbirlər təşkil edə bilirdik.

2-ci Qarabağ müharibəsi dövründə, biz Azərbaycanlı Tələbələrin Avropa Forumunun (FASE) fəaliyyətinin yenidən bərpasının nə qədər vacib olduğunu bir daha görmüş olduq.

Avropa Komissiyasından subvansiya almağı bacaran, Avropa Parlamentində qeydiyyata düşən FASE, fəaliyyətini davam etdirsəydi, müharibə dövründə artıq 15 illik köklü bir təşkilat olacaqdı və Avropadakı Azərbaycanlı İcmasının səsi beynəlxalq tribunalardan daha gur çıxacaqdı.

Bununla yanaşı, bu gün Avropada və Amerikada çox sayda müxtəlif idman növləri üzrə və o cümlədən tanınmış klubları təmsil edən azərbaycanlı yeniyetmə və gənclərin, Azərbaycan idmanına qazandırılması prosesində də Diaspor Komitəsi bir başa iştirak etməli və bununla bağlı ətraflı daxili data baza yaradılmalıdır.

Diaspor Komitəsi Xarici İşlər Nazirliyi ilə çalışmalıdır.

Diaspor və lobbiçilik fəaliyyətlərində XİN ilə işləmək mütləqdir və bunun özü elə bir-birini tamamlayan prosesdir. Azərbaycan XİN və Diaspor Komitəsinin ortaq layihə və tədbirlər həyata keçirməsi zərurətdir.

Həmçinin, xaricdə doğulan azərbaycanlıların və Azərbaycan əsilli xarici vətəndaşların qeydə alınması, onlara sürətli şəkildə vətəndaşlıq verilməsi, sadələşdirilmiş qeydiyyat prosesinin yaradılması və s. kimi məqamlar üzərində bu iki qurumun ortaq işləri və töfhələri olmalıdır.

Diaspor Komitəsi Turizm Nazirliyi ilə çalışmalıdır.

Azərbaycana xarici turist cəlbində, azərbaycan diasporu mühüm rol oynaya bilər. Tibbi turizm, kulinariya və tarix turizminin təbliğində Diaspor Komitəsi də maraqlı olmalı, diaspor azərbaycanlılarıyla birgə yaşadıqları ölkələrdə ortaq layihələr həyata keçirməlidir.

Sadələşdirilmiş viza rejiminin təbliği və diaspor azərbaycanlıların turizm planlarını Azərbaycana salmaqla bağlı proqramların hazırlanması mütləqdir.

Diaspor Komitəsi Mədəniyyət Nazirliyi ilə çalışmalıdır.

Azərbaycan mədəniyyətinin xaricdə təbliği ilə yanaşı, xaricdəki Azərbaycan mədəni irsinin tapılması, qorunub saxlanmasıyla bağlı layihələrə, Heydər Əliyev Fondunun verdiyi töfhələrdən Diaspor Komitəsi özünə nümunə götürməlidir.

Diaspor komitəsi, diaspor irsinin qorunmasında və milli çalarlarla ötürülməsində təşəbbüslər göstərməli və prosesdə aktiv rol almalıdır.

31 Aralık Dünya Azerbaycanlılarının Dayanışma Günü

Diaspor Komitəsi bütün dövlət qurumlarıyla diaspor azərbaycanlıları üçün çalışmalıdır.

Diaspor Komitəsi müxtəlif dövlət və qeyri-dövlət qurumlarıyla diaspor azərbaycanlılarını özünə cəlb edəcək layihələr işləməlidir.

Məsələn, diaspor azərbaycanlıları üçün ölkədəki yerli banklarla, müəyyən güzəşt və imtiyazlarla, həmçinin xarici ölkələrdə ödəmələri faizsiz edən bank hesablarının açılmasıyla bağlı fəaliyyəti ola bilər.

Qısaca icra ediləcək layihələr və görüləcək işlər çoxdur və bütün bu işləri bacaracaq gücdəyik. Yetər ki, Diaspor Komitəsi öz fəaliyyətini bu yöndə qurmağı bacarsın.

Diaspor Komitəsi, həm də Azərbaycanın diaspor siyasətini müəyyənləşdirən qurumdur.

Məhz, buna görə də, bu komitənin diaspor azərbaycanlıları ilə bağlı dövlət qarşısında daşıdığı böyük məsuliyyət var.

Bu məsuliyyətin ciddi şəkildə dərk edilməsi və layiqli şəkildə doğruldulması, olduqca vacibdir.

Diaspor azərbaycanlılarını, Azərbaycanın iqtisadi inkişafına və beynəlxalq nüfuzunun artmasına töfhə verməyə cəlb etmək, Diaspor Komitəsinin işidir.

Anlamaq lazımdır ki, Diaspor Komitəsinin quruluşu və mövcudiyyəti, bir başa diaspor azərbaycanlılarıyla bağlıdır, diasporu olmayan, öz diasporuyla hərtərəfli işləməyən komitə, diasporun dəstəyindən məhrum, diasporsuz komitədir. (Musavat.com)

Oxumağa davam et

Köşə

Şər-böhtan kampaniyası iflasa uğradı

İtaliyanın Milan Apellyasiya Məhkəməsinin İkinci Cinayət Palatası 16 may 2022-ci ildə tarixi qərar qəbul edərək bir neçə il davam edən şər-böhtan kampaniyalarına,  qondarma korrupsiya iddialarına son qoydu.  

Belə ki, Milan Məhkəməsi 2018-ci ildə azərbaycanlı deputatlar Elxan Süleymanov və Müslüm Məmmədovu AŞPA üzvü və qurumun ən böyük siyasi fraksiyası olan Avropa Xalq Partiyası (EPP) qrupunun sədri, italiyalı deputat və beləliklə, dövlət rəsmisi Luka Volonteyə öz vəzifələrindən Azərbaycanın maraqları naminə icra etməsi və xüsusilə Azərbaycanda siyasi məhbuslara dair “Ştrasser Məruzəsi”nin əleyhinə səs vermələri üçün digər parlamentariləri inandırması üçün ödəniş etməkdə günahlandırmaqla məhkəmə prosesi başlamışdı. Birinci instansiya məhkəməsində prokuror korrupsionerlər qismində Elxan Süleymanovu qərarverici, Müslüm Məmmədovu göstərişlərin icraçısı kimi müəyyənləşdirmişdi və onlara qarşı 21 epizod üzrə ittiham irəli sürmüşdü.

Milan Məhkəməsi bir neçə il davam etmişdir məhkəmə prosesinin nəticəsi olaraq 2021-ci ilin yanvar ayında Süleymanov, Məmmədov və Volonte barəsində yalnız 3 epizod üzrə (2012-ci ilin dekabr ayı ilə 19 mart 2013-cü il aralığında) hökm çıxardı və digər 18 epizodla bağlı bəraət verdi. Bununla belə, Milan Məhkəməsi günahlandırılan üç şəxsin (Luka Volonte, Elxan Süleymanov, Müslüm Məmmədov) hər biri barəsində 4 il azadlıqdan məhrumetmə qərarı verdi.

Lakin İtaliya qanunlarına əsasən məhkəmənin yekun qərarı yalnız apellyasiya məhkəməsi və kassasiya məhkəməsi tərəfindən təsdiq edildikdən sonra və ya heç kim qərar barədə apellyasiya şikayəti vermədiyi halda qüvvəyə minmiş hesab edilir. Odur ki, Milan Apellyasiya Məhkəməsinin İkinci Cinayət Palatası birinci instansiya məhkəməsinin qərarı ilə bağlı araşdırmalara başladı və, nəhayət, Milan Apellyasiya Məhkəməsinin İkinci Cinayət Palatası 16 may 2022-ci ildə qeyd edilən işlə bağlı qərar qəbul etdi. Apellyasiya Məhkəməsi italiyalı deputat Luka Volonte, azərbaycanlı deputatlar Elxan Süleymanov və Müslüm Məmmədov barəsində Milan birinci instansiya Məhkəməsi tərəfindən 2021-ci ilin yanvar ayında verilmiş 4 il həbs cəzası qərarını ləğv etdi. Diqqəti çəkən məqam ondan ibarətdir ki, Milan Apellyalsiya Məhkəməsində Dövlət Prokurorluğu Milan Məhkəməsi tərəfindən Elxan Süleymanov və Müslüm Məmmədov barəsində verilmiş qərarın ləğvini istədi və bildirdi ki, Prokurorluq Ofisi istintaqın əldə etdiyi bütün nəticələri protokola daxil etməmiş və beləliklə birinci instansiyada daha şüurlu, tam və olduqca mükəmməl müdafiənin qarşısını almışdı.

Beləliklə, Milan Apellyasiya Məhkəməsi bir neçə il davam edən əsassız iddialara, şər-böhtan kampaniyasına son qoydu. Belə ki, korrupsiya iddiaları ilə başlamış bu iş əvvəlcədən siyasi xarakter daşıyırdı, AŞPA-da və bir sıra Avropa təsisatlarında ölkəmizin beynəlxalq aləmdə uğurlarından narahat olan güc mərkəzlərinin, ermənilərin, ermənipərəst qüvvələrin, daxili bədxahların Azərbaycana qarşı apardığı təzyiq kampaniyasının tərkib hissəsi kimi gündəmə gəlmişdi. 

Lakin bu siyasi xarakter daşıyan əsassız, qondarma və saxta korrupsiya iddiaları haradan qaynaqlanmışdı və nə üçün Elxan Süleymanov və Müslüm Məmmədova qarşı ittihamlar irəli sürülmüşdü? 

Bu suallara cavab axtarmaq üçün heç də uzağa getmək lazım deyil.

Əlbəttə ki, əvvəlcədən siyasi xarakter daşıyan bu iddiaların əsas hədəfi Azərbaycan dövləti idi. Belə ki, davamlı olaraq AŞPA-da Azərbaycana qarşı aparılan təzyiqlərə baxmayaraq, ölkəmiz bu qurum çərçivəsində bir çox ciddi uğurlara nail olmuşdu və bu Azərbaycanın düşmənlərini narahat etməyə bilməzdi. Bu nailiyyətlərdən bəzilərini qeyd etmək zəruridir:

AŞPA-da siyasi məhbuslara dair qəbul edilmiş heç bir meyar olmadığı halda Avropa Şurasının 47 üzvündən yalnız Azərbaycan üzrə siyasi məhbuslar məsələsinə dair məruzəçilər təyin edilirdi, Azərbaycanın AŞPA-ya qəbul olunduğu gündən indiyədəkdaim bu qondarma məsələ  Azərbaycana qarşı siyasi təzyiq vasitəsi kimi istifadə edilirdi. Yalnız Azərbaycanın mübarizəsi nəticəsində, təvəzökarlıqdan uzaq olsa da, insan haqları komitəsinin üzvü kimi Elxan Süleymanovun bir neçə il ərzində davamlı təkidlərindən sonra  siyasi məhbusların müəyyənləşdirilməsi üçün hüquqi meyarların mövcud olmaması AŞPA tərəfindən etiraf edildi. AŞPA-da məruzəçi Ştrasser müstəqil ekspertlərin 2001-ci ildə təklif etdikləri müvəqqəti meyarları öz məruzəsinə daxil etdi və 2012-ci ildə həmin meyarlar qəbul edildi. Lakin Ştrasserin Azərbaycanda siyasi məhbusların izlənilməsinə dair məruzəsi 2013-cü ilin yanvar sessiyasında qəbul edilmədi.

Azərbaycan nümayəndə heyətinin üzvü Elxan Süleymanov tərəfindən “Azərbaycanın işğal edilmiş Dağlıq Qarabağ və digər ərazilərində gərginliyin artmasına dair” və  “Azərbaycanın cəbhəyanı rayonlarının sakinləri qəsdən sudan məhrum edilməsinə dair” qətnamə layihələri irəli sürüldü. Britaniyalı deputat Volterin hazırladığı “Azərbaycanın işğal edilmiş Dağlıq Qarabağ və digər ərazilərində gərginliyin artmasına dair” məruzə ATƏT-in ermənilərin xeyrinə absurd bəyanatdan sonra cəmi 3 səslə qəbul edilməsə də, onun hazırlanaraq plenar iclasda müzakirəyə çıxarılması düşmənlərə böyük zərbə oldu. Bosniya və Herseqovinalı deputat Milisa Markoviçin hazırladığı “Azərbaycanın cəbhəyanı rayonlarının sakinləri qəsdən sudan məhrum edilməsinə dair” məruzəyə dair 2085(2016) saylı qətnamənin qəbul edilməsi, bu qətnamədə Ermənistanın işğalçı kimi tanınması, Dağlıq Qarabağ və digər işğal edilmiş ərazilərdən silahlı qüvvələrinin dərhal çıxardılması tələbi, sudan mülki əhaliyə qarşı silah kimi istifadə etməyin yolverilməzliyi, bölgədə ekoloji terrora görə məsuliyyət daşıması kimi müddəaların olması Azərbaycanın böyük uğuru, düşmən tərəfin iflası oldu.   

Azərbaycanın AŞPA-da əldə etdiyi uğurlardan ciddi şəkildə hiddətlənən anti-Azərbaycan qüvvələr Azərbaycana qarşı strategiya işləyib-hazırlamış və bu strategiyanı reallaşdırmağa davamlı səylər göstərmişlər. Onlar öz məqsədlərinə nail olmaq üçün Azərbaycana qarşı məkrli planların həyata keçirilməsinə məruzələrin gündəmə gətirilməsi yolu ilə, yəni dünyada qəbul edilmiş demokratik səsvermə yolu ilə nail olmasının qeyri-mümkünlüyünə əmin olaraq yeni strategiya seçdilər – Azərbaycana qarşı əsassız korrupsiya iddiaları irəli sürərək AŞPA-da qəbul edilmiş qərarların obyektivliyini şübhə altına almaq və yenidən gündəliyə gətirilməsinə nail olmaq. 

Əlbəttə, AŞPA-da anti-Azərbaycan və ermənipərəst qüvvələrin Azərbaycana qarşı yeni siyasi təsir imkanları əldə etmək məqsədilə hazırladıqları strategiyaların əsasında qondarma siyasi məhbus məsələsinin hər vəchlə yenidən gündəliyə qaytarılması və ondan Azərbaycana qarşı istifadə edilməsi dayanırdı. 

Sadəcə, bu məkrli strategiyanın reallaşdırılması üçün “Ştrasser məruzəsinin” qəbul edilməməsinin səbəbi qismində Azərbaycan hakimiyyətini korrupsiya yolu ilə Avropa deputatlarını ələ almaqda günahlandırmaq lazım idi və bu qondarma korrupsiya əməllərini həyata keçirən deputatları müəyyən etmək qalırdı. Bu məqsədlə AŞPA-da korrupsiya iddialarının araşdırılmasına dair İstintaq Orqanı yaradıldı. İstintaq Orqanı tərəfindən qısa müddət ərzində Azərbaycana qarşı heç bir dəlil və sübut olmadan saxtalaşdırılmış və böhtanla dolu cinayət işləri fabrikləşdirildi, anti-Azərbaycan güc mərkəzlərinin, ermənipərəst qüvvələrin, daxili bədxahların köməyi nəticəsində 60-dan çox AŞPA üzvü, komitə və fraksiya sədrləri, hətta Avropa Şurasının prezidenti istefa verməyə məcbur edildi.

Elxan Süleymanovun və Müslüm Məmmədovun korrupsiya iddiaları ilə ittiham edilməsi isə Azərbaycana qarşı yönəlmiş kampaniyaların qarşısının alınmasında onların xüsusilə aktivlik göstərməsi ilə bağlı idi. Belə ki, 2010-cu ildən bəri AŞPA-da, AP-də, Avronest PA-da insan hüquqları və söz azadlığı, siyasi məhbus məsələsi, seçkilər, Ermənistanın Azərbaycanın Dağlıq Qarabağ və ətraf rayonlarını işğal altında saxlaması və digər məsələlərdə Azərbaycanın maraqlarının təmin edilməsi istiqamətində aktiv mübarizə aparması, onun AŞPA-da “Azərbaycanın işğal edilmiş Dağlıq Qarabağ və digər ərazilərində gərginliyin artmasına dair” və  “Azərbaycanın cəbhəyanı rayonlarının sakinləri qəsdən sudan məhrum edilməsinə dair” qətnamə layihələri irəli sürməsi, AŞPA-da siyasi məhbuslara dair meyarların olmamasını sübuta yetirməsi, qərəzli “Ştrasser məruzəsinin” qəbul edilməsinin qarşısının alınmasında davamlı və genişmiqyaslı mübarizə birbaşa məni-Elxan Süleymanovu və Müslüm Məmmədovu ittiham edilməsi üçün hədəfə çevirmişdi. Qənaətimcə, “böyük” Almaniya dövlətinin deputatı Ştrasserə qarşıkiçik Azərbaycan Respublikasının deputatı Elxan Süleymanovun prinsipiallıq nümayiş etdirərək dirəniş göstərməsini həzm etmək iqtidarında olmadığını göstərdi.

Qeyd edim ki, mən məruzəçi Ştrasserin Azərbaycana qarşı düşmən mövqeyinə qarşı Azərbaycan, Avropa mətbuatında daima çıxış etmişəm. 

Odur ki, bu mübarizənin və uğurların qarşısını almaq üçün Elxan Süleymanov və onun yaxın həmkarı Müslüm Məmmədov anti-Azərbaycan qüvvələr tərəfindən hədəf kimi seçildilər və qondarma korrupsiya iddiaları ilə ittiaham edildilər. Bu illər ərzində biz qondarma ittihamlar, mənəvi və maddi  təzyiqlərlə üzləşdik, heç bir əsası olmadan iztirablara məruz qaldıq. 

Milan Apellyalyasiya Məhkəməsinin İkinci Cinayət Palatası 16 may 2022-ci il tarixdə qəbul etdiyi qərarla Luka Volonte, Elxan Süleymanov və Müslüm Məmmədova qarşı irəli sürülmüş korrupsiya ittihamlarının heç bir əsasının olmadığını bir daha sübuta yetirdi. Bununla da AŞPA-da şər və böhdan kampaniyası iflasa uğradı.

Mən 20 illik siyasi və ictimai fəaliyyət təcrübəmə əsaslanaraq Milan Məhkəməsinin bugünkü qərarını ədalətin təntənəsi hesab etmirəm, bu qərarla hakim sadəcə olaraq özünü vicdan məhbusluğundan azad etdi. Çünki bizim, Elxan Süleymanov və Müslüm Məmmədovun  heç bir günahı yoxdur və cinayət işlətməmişdik. Biz AŞPA-da Azərbaycana qarşı yaradılmış birləşmiş güc mərkəzlərinin apardığı terrorun, şər-böhtan kampaniyalarının əleyhinə mübarizə aparamışıq.

 Bu, Azərbaycanın uğurlarına qarşı terror idi, güc mərkəzlərinin sifarişi əsasında ermənilərin və ermənipərəstlərin, daxili bədxahların ölkəmizə qarşı apardığı şər və böhtan kampaniyası idi. Azərbaycan həqiqətlərini dünyaya çatdırmaq uğrunda fəaliyyətimi dayandırmaq, məni susdurmaq üçün atılmış məkrli addım idi.  Biz Azərbaycana layiqli xidmət göstərmişik, şərə, böhtana qarşı mübarizə aparmışıq və bunun qurbanı olmuşuq. 

Bu günkü reallıqlarda isə bu məsələ artıq gündəmdə deyil və məhkəmə hüquqa tamamilə göz yuma bilməzdi. Lakin məhkəmə ədaləti bərpa etməyib, günahsız insanların haqqını özünə qaytarmağa məcbur olub. Mən millət vəkili və AVCİYA prezidenti kimi Avropa strukturlarında fəaliyyətimə, təcrübəmə əsaslanaraq, deyə bilərəm ki, Avropada həqiqi demokratiya yoxdur, onlar   güc mərkəzlərinin sifarişlərini icra edirlər. 

AVCİYA prezidenti,

qondarma iddialardan azad olunmuş Elxan Süleymanov

Oxumağa davam et

Köşə

Tüstüsü buluda bənzəyən sürreal parovoz

Günün tək doğrusu - postkarantin dövrünün insanları bıçaq kimi itiləndi. İtiləndikcə, bir-birindən itələndi.

Avropalı rəfiqəm danışır: Elə şüursuz, duyğusuz epoxanı geridə qoyduq ki, küçədə adam yıxılıb ölsə, heç kim əyilib gözünü qapamayacaq. Bu avtomatlaşma dövrü kiminə sonsuzluq, kiminə də göz qırpımı gəldi. 

Amma ölmək xofu ilə yaşamağın özü də bir növ cüzamdır. Bu gün oğlumun timsalında dijital nəsil tornadosu xəfif-xəfif burulmağa başlayır. Mən onun bir düyməni sıxıb, monitorumu sahmana salmaq qabiliyyətinə paxıllanmıram. Əsla! 

Amma elektron yollarda tövşəmədən dövrə vurub, köynəyinin düyməsini mənə bağlatdırmaq inadı səbrimi zorlayır. Anam ixtisasca ekonomist idi. İllərlə statistika idarələrinin ən mürəkkəb kompüterlərində hesab-kitab işi aparmışdı. Amma mən ona telefonunda sosial hesab açanda, fövqəltəbii bacarığıma həsəd aparmışdı. 

Bir yandan da əlimdən düşməyən qacetin hiddətini qurtumlayırdı. Anamın hadisələrə münasibəti eyni nöqtədən iki səmtə ayrılan dəmir yoluna bənzəyirdi. Ömür boyu çalışdığı rəqəm selindən də sürətli TGV qatarı və tüstüsü buludlara bənzəməyə çalışan sürreal parovoz... 

İşlədiyi müddətdə gözü çox pul saymışdı. Bəlkə də ona görə yox, vaxtı da tox ola bilirdi. Tək aclığı bizə idi. Qazan-qazan boğazına töksə də, doymadıqları idik - bacım və mən... 

Ən gerçək həyat romanlarını oxutmuşdu mənə. Amma öskürməyə başladımmı, Qırmızı papağa dönürdü. 11-ci sinfin son akkordlarında gəzişirdik bacımla. O, məndən iki yaş böyükdür. Amma anam bizi cüt cücə kimi geyindirməyi sevirdi. Bəlkə də bu məntiqdən yola çıxıb, ibtidai beynimə yazdım ki, mən də bacımla eyni sinifdə oxumalıyam. Gizlin-gizlin sayıb-oxumağı öyrəndim 4 yaşımda. 

İki ayağımı bacımın başmağına dirədim ki, məni də onun sinfinə yazdırın. Nəhayət 5 yaşımda bacımla 2-ci sinfin qapısını açdım. Son sinfə çatanda, ikimizin də ali məktəb həyəcanı sıyıq olub şəhərin küçələrinə dağılmağa başladı. İkimiz də ikiyə bölünüb repetitor müəllimlərin iş otaqlarında yuxulayırdıq. Bir ovuc zaman qalmışdı imtahana. Hətta gizlin-gizlin düşünürdük ki, mən qəbul olunsam, onun balı çatmasa, bu il oxumaqdan imtina edəcəm. 

Belə tragikomik şərqtəhər ailə bağımız var. Elə bu dəmdə bütün məktəblərə məxmərək virusu yayıldı. Sinfimiz qırmızıya bələndi. Öncə bacımı otağına dustaq edib sağaltdı anam. Sonra bir gecədə təbiət mənim dərimə məxmərdən üz çəkdi. Anam həkimin yazdığı müalicəyə də, pəhrizə də sərt əməl edirdi ki... bir səhər qaçaraq otağıma girdi.

Yastığımdan tutmuş çəkələyimə qədər hamısını qırmızı rənglə əvəzlədi. Mübarəksən deyib, pörtmüş əlimi öpdü. Qızdırmanın içində göynəyən bədənimin bütün hüceyrələri bu divanəliyinə bağırmaq istəyəndə, otaqdan çıxdı. Sən demə anam qonşuluqdakı kürd nənədən belə bir inancın olduğunu eşidibmiş. Xəstə adam qırmızıya baxanda, tez sağalırmış. Bilmirəm, bunu hansı kürd Quru Everestin zirvəsindəki meditasiya zamanı kəşf etmişdi, amma virusun bədənlə real sevişmə müddəti var. İki həftə sonra məxmərim söküldü. 

Anam gəlin otağımı əvvəlki palitrasına qaytardı. Yaxşı ki, pandemiya günlərini yerin altında, göyün üstündə, cəmi bir qırmızı pərdənin bizi ayırdığı şəffaf planetdə yaşadı. Yoxsa əminəm, gözü önündə koronavirusa yoluxsaydım, öncə bütün interneti, dünya səhiyyə təcrübəsini oxuyacaqdı. Sonra da həkim resepti olmadan dərman boxçasına bir kapsul da qatmayan anam, kürd nənə əlac buyurub deyə bütün cərəyanların vəhdətindən ibarət sevgisi ilə fil sümüyündən tac düzəldib, başıma qoyacaqdı. 

Necə ki, dinlərdən yan gəzən mən hər körpə canı "maşallah" deyib sevirəm. Nitsşenin daim təriflənmək istədiyi üçün uzaq durduğu Allahın adını unudan mən, oğlumun parlaq gələcəyindən "inşallah" demədən danışmıram.

Oxumağa davam et
Reklam

Gündəm