Prezident məmurlara xəbərdarlıq etdi və anons verdi - Publika.az
Bizi izləyin

Siyasət

Prezident məmurlara xəbərdarlıq etdi və anons verdi

Publika.az millət vəkili Cavanşir Feyziyevin müsahibəsini təqdim edir:

- Ötən gün Prezident İlham Əliyev yerli telekanallara müsahibə verdi. Prezident ümumi olaraq vətəndaşlarına nə demək istədi, hansı mesajları çatdırdı...

- Prezidentin yerli telekanallara dünənki müsahibəsini ötən ilin yekunlarının icmalı kimi dəyərləndirirəm. Əslində bu görüş müsahibədən çox, keçən il ərzində dövlətin apardığı iqtisadi və siyasi fəaliyyətin müzakirəsi idi. Prezident əldə edilmiş uğurlar və onunla yanaşı görülməli olan işlər haqqında ictimaiyyətə ətraflı məlumat verdi. Ümumi olaraq Prezidentin vətəndaşlara demək istədiyini ən qısa şəkildə belə ifadə edərdim: Hər bir Azərbaycan vətəndaşı öz dövləti ilə və onun apardığı daxili və xarici siyasəti ilə fəxr edə bilər.

- Son vaxtlar çörəyin qiymətinin qalxması ciddi narahatlıq doğururdu. İlham Əliyev bunun səbəblərini də izah etdi…

- Mütəxəssislərə aydın olan bəzi məsələlərin ictimaiyyətə izah olunmasına ehtiyac vardı və bunu Prezident etdi. Əlbəttə, kütləvi şəkildə insanların gündəlik həyatına təsirsiz ötüşməyən məsələlərdən biri çörək və un məmulatlarının qiymətinin artması ilə bağlıdır. Bunun dünya miqyasında taxılın qiymətinin artması ilə bağlı olması obyektiv səbəbdir. Ölkədə tələbata uyğun həcmdə taxılın istehsal olunmaması da bir sıra obyektiv səbəblərlə bağlıdır. Prezident bu səbəbləri açıqlamaqla yanaşı, bu istiqamətdə hansı imkanların olduğu və hansı işlərin görüləcəyi barədə də kifayət qədər məlumat verdi. Düşünürəm ki, kənd təsərrüfatının inkişafı və o cümlədən iri həcmli aqrar müəssisələrin yaradılması ilə bağlı Prezidentin icra qurumları qarşısında qoyduğu vəzifələr tam həcmdə yerinə yetirilsə, bir çox ərzaq məhsulları üzrə idxaldan asılılığa son qoyula bilər. Bunun üçün suvarma sistemlərinin müasirləşdirilməsi, istehsalçılar arasında aqrotexniki biliklərin genişləndirilməsi və bir çox torpaqların, xüsusilə məhsuldar Qarabağ torpaqlarının yararlı hala gətirilməsi üçün hələ çox işlər görülməlidir. Prezident də ərzaq təhlükəsizliyinin təmin edilməsini dövlətin prioritet vəzifəsi olaraq elan edib və bu sahədə aparılan işlərin ildən ilə genişləndiyini görürük.

- İlham Əliyevin iqtisadi göstəricilər, habelə manatla bağlı fikirləri də mühüm məqamlardandır. Bununla bağlı nə deyə bilərsiniz?

- Manat hazırda dünyanın ən sabit milli valyutalarından biridir. Onun sabitliyi ölkənin obyektiv makroiqtisadi göstəricilərindən və eyni zamanda hökumət tərəfindən aparılan maliyyə-monetar siyasətin düzgünlüyündən asılıdır. Ümumdaxili məhsulun artımı, idxal-ixrac proseslərində davamlı olaraq müsbət saldonun qorunub saxlanması manatın sabitliyini şərtləndirən əsas məsələlərdir. Bunu etmək üçünsə ölkə iqtisadiyyatı daim artmalıdır, xüsusilə sənaye istehsalının artımı və qeyri-neft sənaye məhsullarının ildən ilə artan ixracı ölkə daxilində maliyyə sabitliyini möhkəmləndirir. Zənnimcə, işğaldan azad olunmuş ərazilərin ölkənin iqtisadi dövriyyəsinə cəlb edilməsi mümkün olduqda bu sabitlik indeksi daha da artacaq və bununla bağlı vətəndaşların sosial təminatı da yüksələcək.

- Prezident eyni zamanda məmurlara xəbərdarlıq etdi. Bildirdi ki, son illər ərzində göstərdiyimiz qətiyyət və sözlə əməl arasında olan vəhdət hər kəs üçün dərs olmalıdır...

- Məmur problemləri bütün ölkələrdə mövcuddur. Azərbaycan da istisna deyil. Problemin kökü təkcə məmurun öz vəzifəsini vicdanlı və qanunauyğun şəkildə icra edib-etməməsi ilə məhdudlaşmır. Bu həm də idarəetmə sistemində əsaslı dəyişikliklər etməyi tələb edir. Son illər ərzində aparılmış institusional islahatlar bu problemlərin bir çoxunu həll edib. Xüsusilə ASAN Xidmətinin tətbiqi və getdikcə təkmilləşdirilməsi məmur-vətəndaş münasibətlərinə xeyli şəffaflıq gətirib və bunun nəticəsini hər bir vətəndaş gündəlik həyatında hiss edir. Yerli idarəçilik orqanlarının işinin təkmilləşdirilməsi də bu baxımdan çox faydalı ola bilər. Prezident bu məsələyə də toxunaraq bu istiqamətdə aparılan islahatların dərinləşəcəyini bildirdi.

- İlham Əliyev Laçın dəhlizi, Zəngəzur dəhlizi ilə bağlı ciddi mesajlar verdi. Prezidentin bu istiqamətdəki fikrilərini necə şərh etmək olar?

- İstər Laçın dəhlizi, istərsə də Zəngəzur dəhlizi ilk növbədə bölgədə sülh yaradılması və dinc-yanaşı yaşamaq prinsiplərinin təmin olunmasına xidmət edir. Əgər Azərbaycan Qarabağda erməni əsilli insanların yaşaması üçün bütün lazımi tədbirləri görübsə, Ermənistanın Zəngəzur dəhlizindən imtina etməsi hansı məntiqlə izah oluna bilər. Zəngəzur dəhlizinin açılmasını ləngitməklə bağlı etdiyi manevrlər Ermənistanın, yumşaq desək, səmimi siyasət yürütmədyini bir daha göstərir. Lakin Zəngəzur dəhlizinin açılacağına heç şübhə yoxdur. Bu əminliyi yaradan Azərbaycan prezidentinin qətiyyətli mövqeyidir. O, bu barədə öz mövqeyini həm beynəlxalq təşkilatlara, bütün dövlətlərin və hökümətlərin başçılarına, həm də Azərbaycan xalqına bəyan edib. Bu dəhlizin açılması həm beynəlxalq hüququn Azərbaycana verdiyi imtiyazdır, həm də 10 noyabr 2020-ci il tarixli bəyanatın tələbidir. Ermənistanın bu tələbi yerinə yetirməkdən başqa yolu yoxdur.

- Prezident eyni zamanda, Ermənistana ciddi xəbərdarlıq etdi. Bir daha Ermənistanı ərazimizi tanımağa səslədi və tarixi gerçəkləri dilə gətirdi. Demək olar ki, sülh müqaviləsi üçün son çağırışını etdi və onlara altı ay vaxt verdi. Bu barədə düşüncələriniz necədir?

- Dünyada bütün dövlətlərin bir-birinin ərazi bütövlüyünü tanıması və bir-birinin daxili işlərinə qarışmaması beynəlxalq birliyin sabitlik və təhlükəsizlik şəraitində inkişafını təmin edən əsas şərtlərdən birirdir və BMT Nizamnaməsində də öz əksini tapıb. Bir qayda olaraq bütün dövlətlər bu şərtə sözsüz əməl edirlər. Ermənistan elə bir nadir ölkədir ki, bütün dünya tərəfindən qəbul olunmuş prinsipə qarşı saymazlıq edir. Millətçilik və işğalçılıq siyasəti Ermənistan ideoloqlarını o qədər heyran edib ki, onlar bu inadkarlığı ilə özlərini bütün dünyadan təcrid etdiklərinin və dalana dirəndiklərinin də fərqində deyillər. Mənə elə gəlir ki, 44 günlük müharibə bəzi erməni siyasətçilərinə bu həqiqətləri anlatdı. Amma hələ də erməni siyasi dairələrində və cəmiyyətində reallığı başa düşməyənlər çoxdur. Ümid etmək olar ki, zaman və Azərbaycanın qəti mövqeyi hər şeyi öz yoluna qoyacaq.

- İlham Əliyev babasının məzarı üzərində dediyi fikirlərə toxundu. Onun Zəngəzurda doğulduğunu, oradan etnik təmizləməyə məruz qaldığını bildirdi. Söylədi ki, biz əcdadlarımızın yolu ilə getməliyik...

- Səfəvilərin süqutundan sonra daim daralmaqda və kiçilməkdə olan Azərbaycan bu gün özünün ən güclü dövrünü yaşayır. Vətən torpaqlarını azad görmək, onu sevə-sevə çiçəkləndirmək, əlbəttə, hər bir insanın ən müqəddəs arzusudur. Zəngəzurun, Göyçənin, İrəvanın hansı şəraitdə və necə əlimizdən alındığı sirr deyil. Amma Azərbaycan müasir dünyanın qanunlarına uyğun şəkildə, ümumbəşəri dəyərlərə əsaslanan humanitar hüquq çərçivəsində öz torpaqlarına qayıtmaq missiyasını heç zaman unutmayıb. Prezidentin Zəngəzurla bağlı dediyi fikirlər də həm hüquqi, həm də mənəvi baxımdan müasir dünya reallıqları və imperativləri ilə səsləşən fikirlərdir və onların həyata keçəcəyinə heç şübhəm yoxdur.

- Ən maraqlı məqamlardan biri də Minsk Qrupunun fəaliyyətinə zarafatla cavab verməsi, eyni zamanda onlara yol gostərməsi oldu. Siz bu barədə nə deyə bilərsiniz?

- ATƏT-in Minsk Qrupu yalnız formal olaraq mövcuddur. Praktik həyatda biz onun fəaliyyətinin nəticələrini nə işğal zamanında, nə də müharibədən sonra görürük. Bu öz-özünü dəfn etmiş bir qurumdur və bizim Minsk Qrupundan heç bir gözləntimiz yoxdur. Minsk Qrupu Qarabağ münaqişəsi ilə bağlı öz fəaliyyəti və ya daha doğrusu, fəaliyyətsizliyi ilə hazırda dünyanın müxtəlif bölgələrində mövcud olan münaqişələrin də nə zamansa belə bir formatda həll oluna biləcəyinə inamı birdəfəlik məhv etdi. ATƏT-in Mİnsk Qrupu dünya siyasət tarixində ən səmərəsiz və zərərli bir presedent kimi qalacaq. Bu da 44 günlük Vətən müharibəsinin yaratdığı bir reallıqdır. Zənnimcə, Minsk Qrupunun həmsədrləri də bu reallığı qəbul edib, özlərini buraxmalıdır.

Rəylər
Oxumağa davam et
Reklam

Siyasət

Sahibə Qafarova üç ölkənin parlament nümayəndələri ilə görüşüb - FOTO

Milli Məclisin sədri Sahibə Qafarova mayın 23-də Azərbaycan, Türkiyə və Gürcüstan parlamentlərinin Xarici əlaqələr komitələrinin Şuşada keçirilmiş VII üçtərəfli iclasının iştirakçıları ilə görüşüb.

Parlamentin Mətbuat və ictimaiyyətlə əlaqələr şöbəsindən Publika.az-a  bildirilib ki, Sahibə Qafarova üç dost və qardaş ölkə parlamentlərinin Xarici əlaqələr komitələrinin növbəti iclasının Azərbaycanda keçirilməsini yüksək qiymətləndirərək bu görüşlərin ölkələrimiz arasında parlamentlərarası münasibətlərin inkişafına yeni töhfə verəcəyini deyib.

Bildirilib ki, üç ölkə arasında müxtəlif sahələri əhatə edən çox səmərəli ikitərəfli və üçtərəfli əməkdaşlıq formatı yaranıb. Bu münasibətlər regionda sülhə, sabitliyə, əməkdaşlığa və iqtisadi inkişafa kömək edir.

Milli Məclisin sədri qeyd edib ki, Azərbaycan, Türkiyə və Gürcüstan xalqları arasında möhkəm tarixi bağlılıq, dostluq və qardaşlıq münasibətləri mövcuddur. Azərbaycanın həm Türkiyə, həm də Gürcüstan ilə çox möhkəm təməllər üzərində qurulmuş münasibətləri var. Ölkələrimiz arasında mövcud olan yüksək səviyyəli siyasi dialoq dövlət başçılarımız, parlamentlər və digər səviyyələrdə ardıcıllıqla dəstəklənməkdədir. Nüfuzlu beynəlxalq qurumlarda biz həmişə həmrəylik nümayiş etdirir və bir-birimizin mövqeyini müdafiə edirik. Sahibə Qafarova deyib ki, Azərbaycan, Türkiyə və Gürcüstan qlobal əhəmiyyətə malik, irimiqyaslı enerji və nəqliyyat layihələrinin həyata keçirilməsində də uğurlu əməkdaşlıq edirlər.

Milli Məclisin sədri parlamentlər səviyyəsində əməkdaşlıqdan danışarkən, bir neçə gün əvvəl Türkiyə Böyük Millət Məclisin sədri Mustafa Şentopun İƏT PA-nın Üçüncü Ümumi Konfransında iştirakını və tədbirdə iştirak edən parlament sədrlərinin, nümayəndə heyəti başçılarının Şuşaya səfərlərini xatırladıb. O, bu ilin aprel ayında Gürcüstana rəsmi səfəri zamanı burada keçirdiyi görüşləri, aparılan danışıqları yüksək dəyərləndirib. Üç ölkə parlamentlərinin Xarici əlaqələr komitələrinin Şuşada keçirilmiş VII üçtərəfli iclasının əhəmiyyətini bir daha vurğulayan S.Qafarova belə bir tədbirin işğaldan azad olunmuş torpaqlarda, Azərbaycanın mədəniyyət paytaxtı Şuşada keçirilməsini müsbət dəyərləndirib.

Bildirilib ki, uzun müddət işğal altında qalmış ərazilərimizdə Ermənistan tərəfindən bütün şəhər və kəndlər dağıdılıb, tarixi, mədəni və dini obyektlər vandalizmə məruz qalıb.

Milli Məclisin sədri Avropa İttifaqı Şurasının Prezidenti Şarl Mişelin təşəbbüsü ilə Azərbaycan Prezidenti və Ermənistanın baş naziri arasında keçirilən görüşlərdən də danışıb. Bildirilib ki, Ermənistan üzərinə götürdüyü bütün öhdəliklərə əməl etməli, məsələyə konstruktiv yanaşma sərgiləməlidir. Postmünaqişə dövründə Cənubi Qafqazda əməkdaşlıq üçün yeni imkanlar yaranıb. Heç şübhə etmirik ki, bu imkanlardan istifadə bölgəyə sülh və əmin-amanlıq gətirəcək.

Görüşdə çıxış edən Gürcüstan parlamentinin Xarici əlaqələr komitəsinin sədri Nikoloz Samxaradze ölkəmizə səfərindən və burada keçirilən tədbirlərdən məmnunluğunu ifadə edib. Qeyd edilib ki, belə tədbirlər regional əməkdaşlıq və parlamentlərarası münasibətlərin inkişafı baxımından əhəmiyyətlidir. O, parlamentlərdə fəaliyyət göstərən dostluq qruplarının fəaliyyətini yüksək qiymətləndirib.

Görüşdə Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov üç ölkə parlamentinin Xarici əlaqələr komitələrinin Şuşada keçirilmiş iclası barədə danışıb, müzakirə olunan məsələlər barədə fikirlərini bölüşüb.

Türkiyə Böyük Millət Məclisinin Xarici əlaqələr komitəsinin sədri Akif Çağatay Kılıç tədbirin ölkəmizin işğaldan azad olunmuş Şuşa şəhərində təşkilinə görə təşəkkürünü bildirib. Qeyd edilib ki, Türkiyə Azərbaycanı həmişə dəstəkləyib. İki ölkə liderlərinin Şuşa görüşü bunun bariz nümunəsidir. İnanırıq ki, tezliklə regionda davamlı sülh və sabitlik yaranacaqdır. Türkiyəli qonaq parlamentlərin Xarici əlaqələr komitələrinin üç tərəfli görüşlərinin gələcəkdə də davam etdirilməsinin mövqelərin tutuşdurulması baxımından əhəmiyyətini vurğulayıb.

Söhbətdə tərəfləri maraqlandıran digər məsələlər ətrafında fikir mübadiləsi aparılıb.

Oxumağa davam et

Siyasət

Əli Hüseynli: "Bu, islahatların uğurlu nəticələrini şərtləndirən əsas amildir"

Mayın 19-da Azərbaycan Respublikasının Prezidenti İlham Əliyevin “Hüquqi Ekspertiza və Qanunvericilik Təşəbbüsləri Mərkəzi” publik hüquqi şəxs yaradılması barədə imzaladığı Fərman böyük əhəmiyyət kəsb etməklə Azərbaycanda həyata keçirilən ardıcıl hüquqi islahatlar çərçivəsində müstəqil, demokratik, hüquqi dövlət quruculuğu prosesinə mühüm töhfədir.

Bunu AZƏRTAC-a açıqlamasında Milli Məclisin Hüquq siyasəti və dövlət quruculuğu komitəsinin sədri Əli Hüseynli bildirib.

Əli Hüseynli qeyd edib ki, Mərkəzin Nizamnaməsində nəzərdə tutulan müddəalar hüququn müxtəlif sahələri üzrə islahatların həyata keçirilməsini və normayaratma fəaliyyətinin keyfiyyətinin yüksəldilməsini hədəfə alır.

Bildirilib ki, bu formatda olan dövlət təsisatları bir sıra xarici ölkələrdə mövcuddur və onlar hüquq sahəsində əhəmiyyətli nəticələrin əldə olunmasına kifayət qədər müsbət təsir göstərirlər. Bu baxımdan, “Hüquqi Ekspertiza və Qanunvericilik Təşəbbüsləri Mərkəzi” publik hüquqi şəxsin yaradılması prosesində beynəlxalq təcrübənin öyrənilməsi və nəzərə alınması yeni qurumun hüquqi islahatlar kontekstində fəaliyyətinin səmərəsini bir qədər də artıracaq.

Əli Hüseynli diqqətə çatdırıb ki, bu proses hələ 1993-cü ildə - Heydər Əliyevin Azərbaycana rəhbərliyinə qayıdışı ilə başlanmışdı. Demokratik hüquqi dövlət quruculuğunun, insan hüquq və azadlıqlarının fundamental prinsiplərinin qərar tutmasına zəmin yaradan ardıcıl və məqsədyönlü tədbirlərin həyata keçirilməsinə yönəlik islahatlar Ulu Öndərin siyasi xəttinin əsasını təşkil etmişdir. Heydər Əliyev bu istiqamətdə ardıcıl siyasət yürüdərək, ilk növbədə, ölkəmizdə insan hüquq və azadlıqlarının başlıca prinsiplərinin bərqərar olması üçün əsaslı zəmin yaradılmasını təmin etmişdir.

Həmin dövrdə ölkəmizdə hüquqi dövlət quruculuğuna və hüquq sisteminin islahatına müstəsna əhəmiyyət verən Ümummilli Lider 1996-cı ildə Hüquqi İslahat Komissiyası yaratmış və ona rəhbərliyi bilavasitə öz üzərinə götürərək islahatlara şəxsən rəhbərlik etmişdir.

Hüquqi islahatların əhəmiyyətinə dəyər verilməsi baxımından bu sahənin bu gün də ən yüksək səviyyədə prioritet istiqamət kimi müəyyən edildiyini vurğulayan Milli Məclisin komitə sədri deyib ki, Hüquqi Ekspertiza və Qanunvericilik Təşəbbüsləri Mərkəzi” publik hüquqi şəxsin yaradılması barədə Fərmana əsasən, Mərkəzin fəaliyyətinə nəzarəti Azərbaycan Respublikasının Prezidenti, həmçinin bu Nizamnamə ilə müəyyən edilmiş qaydada Mərkəzin idarəetmə orqanları həyata keçirirlər. Mərkəz hər il fəaliyyətinə dair hesabatı dövlət başçısına təqdim edəcəkdir. Göründüyü kimi, hüquqi islahatların gedişi və dövlətçilik prinsiplərinə ardıcıl olaraq riayət olunması Azərbaycan Prezidentinin bilavasitə nəzarəti altındadır və bu, islahatların uğurlu nəticələrini şərtləndirən əsas amildir.

“Diqqətçəkən məqamlardan biri də budur ki, Mərkəzə ümumi rəhbərliyi həyata keçirən Müşahidə Şurasında hakimiyyətin bütün qollarının təmsilçiliyi nəzərə alınmışdır.

Bütün bunlar belə bir əminlik yaradır ki, normayaratma fəaliyyətinin keyfiyyətinin yüksəldilməsi, dövlət orqanları əməkdaşlarının bilik və bacarıqlarının inkişaf etdirilməsi, hüquqi maarifləndirmə, hüquqi ekspertizanın keçirilməsi və hüquqi tənzimləmənin təsirinin qiymətləndirilməsi və bunlarla bağlı işlərin səmərəli əlaqələndirilməsi sahəsində fəaliyyət göstərəcək Hüquqi Ekspertiza və Qanunvericilik Təşəbbüsləri Mərkəzi qısa zamanda Azərbaycanda gedən davamlı hüquqi islahatların əhəmiyyətli həlqəsinə çevriləcəkdir”, - deyə Əli Hüseynli vurğulayıb. 

Oxumağa davam et

Siyasət

Aytən Mustafazadə: "Mərkəzin yaradılması mühüm əhəmiyyət kəsb edir"

Azərbaycan Respublikasının Prezidenti İlham Əliyevin Fərmanı ilə yaradılan Hüquqi Ekspertiza və Qanunvericilik Təşəbbüsləri Mərkəzi Azərbaycan üçün bir yenilikdir, həyata keçirilən ardıcıl hüquqi islahatlar çərçivəsində müstəqil, demokratik, hüquqi dövlət quruculuğu prosesinə mühüm töhfədir. Mərkəz hüquq sahəsində aparılan islahatlara dəstək göstərmək, normativ-hüquqi aktların layihələrinin hazırlanması, hüquqi ekspertizasının aparılması sahəsində dövlət orqanlarına xidmətlər göstərmək, normayaratma fəaliyyətinin keyfiyyətinin yüksəldilməsi məqsədilə yaradılıb. Mərkəzin fəaliyyətində hüquq sahəsində qabaqcıl beynəlxalq təcrübəni təhlil etmək və qüvvədə olan qanunvericiliyin təkmilləşdirilməsi, inkişaf etdirilməsi istiqamətində təkliflər hazırlamaq, hazırlanacaq və qüvvədə olan normativ hüquqi aktların qanunvericiliyin təsirinin qiymətləndirilməsinin aparılmasında iştirak etmək nəzərdə tutulub. Eyni zamanda, normayaratma sahəsində maarifləndirmə işi aparacaq, hüquqi islahatların məzmunu və mahiyyəti barədə ictimaiyyəti məlumatlandıracaq, ictimai rəyi öyrənəcək, müvafiq hüquqi aktların layihələrinə dair ictimai müzakirələr təşkil edəcək. Hüquq normalarının tətbiqi sahəsində dövlət orqanları əməkdaşlarının bilik, bacarıq və səriştələrinin inkişaf etdirilməsi məqsədilə təlimlər keçirəcək.

Bu fikirləri AZƏRTAC-a açıqlamasında Hüquq və İnsan Haqları İnstitutunun baş direktoru professor Aytən Mustafazadə deyib.

O bildirib ki, mərkəzin fəaliyyətinin elmi təminatı, hüququn ayrı-ayrı sahələrinin müqayisəli hüquqi tədqiqi, məcəllələrə və digər normativ hüquqi aktlara elmi və praktiki şərhlərin hazırlanması da diqqət mərkəzindədir. Belə ki, Azərbaycan Milli Elmlər Akademiyasının strukturuna daxil olan Hüquq və İnsan Haqları İnstitutu yeni yaradılan mərkəzin tabeliyinə verilməklə yenidən təşkil olunacaq. İnstitut tərəfindən hüquqi tənzimləmədə innovativ həllərin araşdırılması, hüququn ayrı-ayrı sahələrinin təhlili, hüququn potensial inkişaf sahələrinin müəyyən edilməsi və həmin sahələr üzrə tənzimetmə modellərinə dair təkliflər veriləcək.

Professor Aytən Mustafazadə məlumat verib ki, Hüquq və İnsan Haqları İnstitutu “İnsan Hüquqları üzrə Elmi-Tədqiqat İnstitutunun yaradılması haqqında” Azərbaycan Respublikası Prezidentinin 30 noyabr 1998-ci il tarixli Sərəncamına əsasən İnsan Hüquqları İnstitutu kimi yaradılıb. İnstitutun məqsədi cəmiyyətin demokratikləşməsi, insan hüquq və azadlıqları problemlərinə dair elmi-tədqiqat işlərinin aparılması, elmi tövsiyələrin hazırlanması və bu sahədə hüquqi biliklərin dərinləşdirilməsi, təkmilləşdirilməsi idi: “İnstitut öz elmi-praktik fəaliyyətində Azərbaycan Respublikası Konstitusiyası, Ümumdünya İnsan Hüquqları Bəyannaməsi və başqa beynəlxalq sənədlərlə təsbit olunmuş mülki, siyasi, iqtisadi, sosial və mədəni hüquqları öyrənir, həmçinin bu sahədə beynəlxalq və milli-tarixi təcrübəni tədqiq edir. Hüquq və İnsan Haqları İnstitutu bu günədək fəaliyyəti dövründə hüquq sahəsində xeyli iş görüb. Mərkəzin yaradılması və institutun mərkəzin tərkibində “Hüquq və İnsan Haqları İnstitutu” publik hüquqi şəxs kimi fəaliyyətini davam etdirməsi hüquq sahəsində yeni mərhələyə addımdır. 1998-ci ildən bu yana hər 5 ildən bir Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı təsdiqlənir. Bu fəaliyyət proqramları ilə bizim institutumuz qarşısında müəyyən vəzifələr qoyulur”.

Bu gün Azərbaycan beynəlxalq və milli hüquq sahəsində yeni mərhələyə addımlayır. Bu baxımdan mərkəzin yaradılması mühüm əhəmiyyət kəsb edir.

“Yeni yaradılan Mərkəzin qarşısında böyük vəzifələr dayanır. Bu gün Azərbaycanda müəyyən sahələrdə hüquqi boşluqlar var. İnanıram ki, boşluqların doldurulmasında mərkəzin fəaliyyəti uğurlu olacaq. Sevindirici haldır ki, hüquq sahəsi ölkəmizdə hər zaman diqqət mərkəzindədir. Prezident İlham Əliyev və birinci xanım Mehriban Əliyeva hər zaman insan hüquqlarının qorunmasına xüsusi önəm verirlər”, - professor Aytən Mustafazadə vurğulayıb.

Oxumağa davam et
Reklam

Gündəm